كل ما تحتاج أن تعرفه عن الموساد الإسرا-ئي-ل*ي !
سنة ١٩٩٧ أدين الجاسوس الاسرائيلي عزام عزام
في قضية من أكبر قضايا التخابر في مصر
لصالح الكيان الإسرائيلي ..
أُدين عزام عزام بتهمة نقل معلومات للكيان عن المنشآت الصناعية المصرية
من خلال استخدامه لشركة بتشتغل في تجارة الغزل والنسيج
وتصنيع وتسويق الملابس الداخلية ، إسمها (تيفرون)
أو (دلتا تكتستيل) وكان عزام بينقل معلوماته
بالحبر السري عن طريق كتابتها على الملابس الداخلية
وتمريرها للموساد الإسرائيلي
والحقيقة دي مش القضية الوحيدة اللي تم اكتشافها
في مجال الجاسوسية من خلال شركات ومؤسسات
بتشتغل في مصر بأوراق رسمية وسجل تجاري
وبطاقة ضريبية سليمة ونشاط رسمي ، ولكن هي في الأساس
مجرد غطاء للتجسس لصالح الموساد الإسرائيلي
وده أمر خطير جدًا .. كيانات ومؤسسات
ممكن تعيش لسنين بين المصريين بأوراق رسمية صحيحة
ولكن هي في الأساس هدفها التجسس لصالح الموساد
لكن السؤال الأهم هنا .. هو ايه الموساد
وايه نشاطه وهدفه من كل ده ؟
هيئة الإستخبارات والمهمات الخاصة
أو وكالة الاستخبارات الاسرائيلية المركزية
أو (موساد لعالياه بت) .. منظمة الهجرة غير الشرعية
واللي اتأسس في ١٣ ديسمبر ١٩٤٩
بهدف تنظيم وحماية هجرة اليهود لإسرائيل
وإنقاذ اليهود من الدول اللي بتمنع الهجرة منها لإسرائيل
أو إنقاذهم من الدول اللي بيتم التعامل معاهم فيها بشكل غير لائق
ده كان الهدف الأساسي من تأسيس الموساد
قبل ما يتحول لوكالة هدفها جمع المعلومات في المجالات
السياسية والاجتماعية والعسكرية والأمنية في شتى أنحاء العالم
غير تنفيذ العمليات الخاصة خارج حدود إسرائيل
وتقديم التوصيات للجهات السياسية بناءاً على المعلومات اللي تم تجميعها
وهو الجهاز الاستخباراتي الثالث في الكيان
اللي عنده ٣ أجهزة استخبراتية ، الأول جهاز الأمن العام الداخلي (الشاباك)
وشعبة الاستخبارات العسكرية (أمام)
بيدير الموساد من أول لحظة لتأسيسه رئيس الحكومة نفسه بشكل مباشر
وده يوضح قد ايه المكان ده حساس
ده غير إن كل أعضاءه كانوا في الأساس ضباط في الجيش الإسرائيلي
أول رئيس للموساد الإسرائيلي كان (رؤوبين شيلواح)
في وقت كان القانون بيمنع الكشف عن اسم رئيس الموساد
وفضل الوضع كده لحد سنة ١٩٩٦
الموساد الإسرائيلي متورط في عدد كبير من الاغتيالات
وعمليات التخريب والتخابر واستقطاب الجواسيس من كل دول العالم تقريبًا
لدرجة إن فيه تقارير وردت من صحيفة news week الأمريكية في ٢٠١٤
بتقول إن سيطرة الموساد الإسرائيلي ونسبة وصوله
خارج إسرائيل وصلت ل ١٩٠ دولة
وإن عملياتهم وصلت لقلب أمريكا نفسها
والموساد الإسرائيلي بيتكون من عدة أقسام
كل قسم له مهام محددة ، زي قسم المعلومات
اللي هدفه جمع المعلومات وتحليلها ووضع الاستنتاجات
وقسم العمليات ، اللي بيخطط للعمليات الخاصة بأعمال التخريب
والخطف والقتل وغيرها من الأمور غير الشرعية
كمان قسم الحرب النفسية ، اللي وظيفته نشر عدد من الأخبار المزيفة
اللي بتضمن تقوية وتضخيم صورة وسمعة إسرائيل
حتى لو بشكل مزيف وكمان تزييف الحقائق عن الدول المعادية
ده غير قسم تدريب العملاء ، واللي بيتم من خلاله
تجنيد الجواسيس وتدريبهم على العمل السري والانشطة التجسسية
زي استخدام أجهزة التجسس الحديثة ، والتدريب على
التعامل مع أجهزة كشف الكذب والمراقبة
والقسم ده بيدير تجنيد وتوزيع الجواسيس لكل دول العالم
كمان قسم إدارة المعلومات العلنية ، واللي بيرصد
المعلومات اللي بتنشر في الجرايد والصحف
ووسائل التواصل الاجتماعي والدراسات الاكاديمية
وحجب منها المعلومات اللي قد تضر الكيان
وبروزة منها المعلومات اللي تفيد وجود الكيان
غير قسم خاص بإحباط تطوير الأسلحة غير التقليدية
زي الأسلحة النووية المتطورة ،
ده غير قسم احباط النشاطات التخريبية داخل الكيان اللي بتهدده
و قسم اقامة العلاقات السرية اللي بيشرف على
المعاهدات السرية بين الكيان وبعض الدول
أو الكيانات الاقتصادية والسياسية جوه الدول دي
اتأسس الموساد على يد (ايسر هاريل) عضو الكينيست
و(دافيد بن غوريون) أول رئيس وزراء إسرائيلي
الموساد الإسرائيلي يعتبر ثاني أكبر جهاز استخبراتي في العالم
بالأرقام لأنه بيوظف بشكل دائم أكتر من ٧ آلاف موظف
وعنده ميزانية ٣ مليار دولار أمريكي
ده غير انه على موقعه الرسمي بيعلن دايمًا عن الحاجة لأشخاص وكوادر تشتغل معاه
الموساد .. جهاز استخبراتي كان من ضمن الأسس
اللي اعتمد عليها الكيان الإسرائيلي في تواجده
ولكن بيفتقد دايماً لميزة موجودة في باقي الاجهزة الاستخباراتية
وهي الولاء .. لأن كل اللي بيقدر على تجنيدهم الموساد
بيكون هدفهم من ده الفلوس .. وبمجرد احساسهم بالخطر
بيعترفوا بانهم اشتغلوا معاه بسبب الاغراءات المالية مش اكتر
على عكس باقي أجهزة الاستخبارات في العالم
واللي كل أعضاءها بيتم تجنيدهم بناءاً على الولاء للدولة نفسها
بعد ما سمعت عن الموساد الإسرائيلي تفتكر الهالة الضخمة حول الموساد
حقيقية ولا هي مجرد معلومات كاذبة ومزيفة غرضها تضخيم صورة الكيان مش أكتر ؟
.jfif)
المشاركات
ليست هناك تعليقات:
إرسال تعليق
أتشرف بتعليقك ونقدك دائمًا ..