" سفينة Icon of the seas قاهرة التايتانيك "
في تجربة مشابهة لتجربة تايتانيك
وبعد أكتر من ١٠٠ سنة بتكرر التجربة
شركة (رويال كاريبيان انترناشيونال)
وبتقرر إنتاج أكبر سفينة في تاريخ البشرية
Icon of the seas أو معجزة البحار
بدأت الحكاية لما صرح المدير التنفيذي لشركة
رويال كاريبيان (مايكل بايلي) في ١٠ أكتوبر ٢٠١٦
إنهم طلبوا تصنيع أكبر سفينة في العالم
من شركة (ماير توركو) في مدينة Turku بفنلندا
واللي كان المفروض دخولها للخدمة في سنة ٢٠٢١
لولا جائحة كورونا اللي عطلت الحدث ده
لتاريخ يناير ٢٠٢٤
وسفينة icon of the seas
سفينة بتكسر أرقام قياسية كتير جدًا في تاريخ بناء السفن
بالنسبة لحجمها وطولها وعدد الطوابق وحمولتها
وكل حاجة تقريبًا
السفينة طولها ٣٦٥ متر
يعني قد طول ٣ ملاعب كرة قدم وزيادة شوية
وبتتكون من ٢٠ طابق ما بين أجنحة وغرف للمعيشة
ومطاعم وأماكن للترفيه وده حجم مهول
والمقرر إنها هتبدأ أول رحلاتها في ٤ مارس ٢٠٢٤
من مدينة فورت لودرديل في ولاية فلوريدا
علشان تبحر لجرز البحر الكاريبي في رحلة مدتها سبع أيام
هتضم فيهم على متنها من ٥٦١٠ راكب
لـ ٧٦٠٠ راكب كحد أقصى بيخدمهم طاقم مكون من ٢٣٥٠ فرد
يعني حمولة السفينة كحد أقصى ١٠ آلاف فرد تقريبًا
وده عدد ضخم جداً بالنسبة لسفينة
يعني لو جينا قارننا عدد ركاب السفينة دي
بعدد ركاب سفينة تايتانيك هنلاقي إن عدد ركاب تايتانيك كان ٢٣٠٠ فرد تقريبًا
يعني الربع وكانت سعتها ٤٦ ألف طن GT
أو Gross tonnage (السعة القابلة للإستخدام)
في حين إن سعة Icon of the seas ٢٥٠ ألف طن و ٨٠٠
ومع كل الحجم والسعة المهولة دي
إلا إنها بتجري بسرعة ٤١ كيلو متر في الساعة
وده معناه إن محركاتها استثنائية ومختلفة عن أي سفينة قبلها
فعلى سبيل المثال سفينة تايتانيك كانت محركاتها بتدور عن طريق الفحم
اللي بيتحرق ويتحول لبخار ، إنما محركات icon of the seas
بتشتغل عن طريق الغاز الطبيعي المُسال
ده غير تكنولوجيا خلايا الوقود واللي بتعتبر طفرة
في تاريخ المحركات ، واللي بتقدر السفينة من خلالها
من تحويل الطاقة النظيفة لوقود وكمان لمياه عذبة
وزي ما بتكسر icon of the seas أرقام قياسية كتير
في الطول والحجم والسعة .. كمان بتكسر كل الأرقام القياسية في الترفيه
وده بسبب إنها بتحتوي على ٧ حمامات سباحة
منهم أكبر حمام سباحة في العالم Royal Bay
و ٦ منزلقات مائية وأعلى شلال مائي في العالم
وأكبر حديقة مائية وأول مسبح لا متناهي أو infinity
وده بيخليها أكنها قرية سياحية متكاملة
في حين إن معدل الترفيه في تايتانيك كان حمام سباحة واحد ومطعم وملعب جولف
وفي حين إن تايتانيك كانت بتحتوي على ٨ طوابق بس
سفينة icon of the seas بتحتوي على ٢٠ طابق
بيحتووا على ٢٨ مطعم و٢٨٥٠ غرفة متقسمين لأربع فئات على حسب المزايا والسعر
وأول فئة فيهم فئة الأجنحة واللي مساحتها بتوصل ل ١٦٥ متر
ببلكونات كبيرة بتشوف المحيط بشكل بانورامي
ودي سعر تذكرتها ١٩ ألف دولار
وتاني فئة هي ال balacony واللي غرفها بتيجي بمساحة ٢٦ متر
وبتحتوي على بلكونة كبيرة مطلة على المحيط
وسعرها ٥٤٠٠ ألف دولار
والفئة التالتة هي ocean view ودي غرف من غير بلكونات
ولكن فيها شباك كبير بيطل على المحيط
وتذكرتها ب ٤٣٠٠ دولار
والفئة الرابعة بقى .. فئة الغلابة
إسمها ال inside ودي غرف مساحتها نفس المساحة اللي قبلها
ولكن بدون لا شباك ولا بلكونة ودي ب ٣٦٠٠ دولار .. يا بلاش
ده غير إن الحديقة المركزية للسفينة بتحتوي على
قبة إسمها Aqua dome ودي مخصصة للعروض المائية
حاجة زي النافورة الراقصة كده
ده غير إنه بتحتوي على أكبر شاشة سينما
في تاريخ السفن السياحية في العالم
هتنضم سفينة icon of the seas
لأسطول شركة رويال كاريبيان انترناشيونال في ٢٦ أكتوبر في السنة الحالية
ده بعد ما تم تجربتها بالفعل في مياه مفتوحة
دلوقت بعد ما عرفت عن (معجزة البحار)
وبعد ما عرفت أسعار تذاكرها .. هل هتقدر تكون جاهز
تطلع الرحلة الجاية ؟ ولا محتاج تحوش كام سنة ؟
ولا انت خايف يكون مصيرك مصير ركاب التايتانك ؟
ليست هناك تعليقات:
إرسال تعليق
أتشرف بتعليقك ونقدك دائمًا ..