" أكبر انفجار في تاريخ البشرية "

 العالم الفترة الأخيرة عنده تخوفات من انتهاءه 

لأسباب كتير مختلفة ، كوارث طبيعية

حروب .. أزمات إقتصادية ، ومجاعات 

ولكن من المخاوف اللي ما نقدرش ننكرها (السلاح النووي)

واللي بتمتلكه دول كتير بينهم خلافات سياسية من سنين 

وعلى مدار السنين دي الخلافات كبرت 

وزادت احتمالية انهم يجيبوا أخرهم 

وحد منهم يتهور ويضغط ع الزرار 

زي أمريكا وروسيا وإيران وكوريا الشمالية وغيرهم 

زي ما حصل قبل كده في تفجيرين نووين هما الأكبر في العالم 

(هيروشيما ونجازاكي) واللي وصل عدد قتلاهم 

لـ ٢٢٠ ألف بني آدم .. ولكن لو فاكر 

إن ده أكبر إنفجار نووي حصل في العالم تبقى غلطان 

لأن في تاريخ البشرية الحديث وتحديداً في ٣٠ يونيو ١٩٠٨ 

حصل انفجار هو الأكبر في تاريخ البشرية المعروف 

واللي حصل في حوض نهر تونجوسكا بأعماق سيبيريا

 وبسببه ارتفعت كتلة ضخمة من اللهب إلى السماء 

وعملت انفجار بقوة 15 ميجا طن 

والميجا طن وحدة لتقدير شدة الانفجار النووي 

بحيث إن الميجا تعادل مليون طن 

في الوقت ده اكد شهود عيان إن دي 

اضخم واغرب كتلة نيران رأوها في حياتهم

وشبهوها بأنها طائر مخيف له ديل أنار السما وحول ليل تونجوسكا لنهار

 واثر على مناطق في أوروبا لدرجة انه انار سماء ستوكهولم عاصمة السويد 

وتحول يوم ألمانيا لنهار دام لمدة 24 ساعة

 وحصل بسببه تغيير كبير في الضغط الجوي في بريطانيا

و بعد الانفجار اهتزت الارض بقوة 

 وسجلت أجهزة قياس الزلازل الروسية والاوروبية والامريكية

 تقلب غير عادي في القشرة الارضية

 وبعد دقايق بسيطة قامت عاصفة مغناطيسية استمرت 5 ساعات 

وكانت مشابهة للعواصف اللي بتظهر بعد تفجير القنابل الذرية

بعدها ظهرت تغيرات جينية في النباتات 

و تحولت للون الأصفر و بعد عدة ساعات تحولت للون الأسود 

وقع الانفجار ده 80 مليون شجرة وبسببه تم تدمير ٢٠٠٠ كيلو متر مربع من الغابات

 بما فيها من حيوانات و طيور وكائنات حية

من شدة الانفجار ده خاف العلماء الاقتراب من المنطقة 

ولم يتم دراسة المنطقة الا بعد 19 سنة 

لما قام العالم الجورجي (ليونيد كوليك) بالتحقيق في الموضوع

 واعتقد ان نيزك ضخم ضرب الارض بسبب المنظر الغريب اللي شافه

لما وصل كوليك وفريقة للمنطقة سنة 1927 

كان منظر الدمار هائل ومشي هو وفريقه لساعات 

محاولين الوصول لفوهة الانفجار ولكن بلا جدوى 

وأنهوا بعثتهم الاستكشافية بدون ما يعرفوا سبب الانفجار الحقيقي 

وفضل سبب الانفجار مجهول لفترة طويلة

 لحد ما قرر العلماء انه كان بسبب مذنب وليس نيزك

وإن المذنب كان طوله حوالي من 30 إلي 40 متر

ولكن برضه التفسير ده كان بلا دليل واضح

توقفت البعثات الاستكشافية بخصوص الحدث ده

 بسبب الحرب العالمية الثانية و وفاة العالم كوليك

حتى أواخر الأربعينات لما جه مهندس من الجيش الروسي إسمه الكسندر كازانتسيف 

 وأكد إن الانفجار ده لا ينتج الا عن تفجير نووي 

 وبما ان الإنسان وقتها ما كانش توصل للقنبلة الذرية لسه 

فافترض انه بسبب طبق طاير متفجر أو سفينة فضائية 

والحقيقة إن فيه أكتر من ٣٠ فرضية أو نظرية 

عن سبب تفجير تونجوسكا أغربهم هو التفسير الأخير (انفجار سفينة فضائية)

آخر حديث عن انفجار سيبيريا الغامض كان سنة 1994

 على يد العالم (يوري لافبين) اللي كرس من حياته 12 سنة لدراسة الظاهرة 

وتوصل انه حدث تصادم بين مذنب وصحن طائر غامض 

على ارتفاع 10 أمتار من مكان وقوع الانفجار

وبرضه ده كلام غير مؤكد تمامًا 

الحقيقة حادث تونجوسكا بيسيبنا قدام أسئلة كتير جدًا

أولهم ، هل معنى انفجار زي ده اللي تفسيره المنطقي قنبلة ذرية ..

هل معناه انه الإنسان توصل لإختراع القنبلة الذرية قبل الإعلان عنها بكتير ؟

السؤال التاني ، في حالة إنه طبق طائر .. هل ده معناه 

إن الأطباق الطائرة معروفة للبشر من زمان كده 

من قبل ما يظهر مصطلح الأجسام الطائرة المجهولة أصلاً أو الـ ufo ؟

ولا ده كان مجرد مذنب ضرب الأرض في المكان ده ؟

طب لو هو كده ؟ ليه ما استسلموش للرأي ده وخلاص ؟

بعد ما سمعت عن أكبر انفجار في تاريخ البشرية .. تفتكر ايه رأيك ؟