أنواع البياعين !

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

أهلاً بيكوا مرة تانية في مدونتكم ، وموضوع مقالنا النهارده

عن الناس الشقيانة .. الناس اللي بتكره الفصال كره العمى 

الناس اللي رافعين شعار السعر في الخاص .. إنبوكس 

الناس اللي شايفين إن بضاعتهم أحلى بضاعة 

وسعرهم أرخص سعر .. وعروضهم مغرقة الدنيا 

حلقتنا النهارده عن البياعين .. 

والبياعين اشكال وألوان .. وأنواع كتير جدًا 

فيه منهم اللي لازم ينزل محله يفتحه ويشغل قرآن 

ويرش ماية ويولع بخور .. ومنهم اللي مجرد 

ما يفتح صفحة الفيس بوك ويعمل لوج ان بقى في الشغل خلاص

منهم اللي بيطبع شوية ورق يوزعهم ع الجوامع بعد صلاة الجمعة

ومنهم اللي بيعمل إعلان ممول ويقلب الدنيا على الفيس بوك 

وسواء كان البياع أونلاين أو اوفلاين .. 

في محل ولا على النت .. فالبياعين أنواعهم واحدة

واللي فيهم فيهم والنهارده هنقسمهم لكذا قسم وكذا نوع

النوع الأول : الدوغري .

الراجل اللي بيجي معاك م الآخر .. 

الراجل الحقاني اللي عايز مكسب بسيط من ورا بضاعته 

والنوع ده من البياعين نادر الوجود .. 

وهو وفصيلته وجنسه مهددين بالإنقراض 

وفيه منهم اللي إنقرض بالفعل أو قفل محله و شحت مش متأكد

والنوع ده على قد ما هو محترم وبياع حقيقي 

وعنده أخلاق إلا إنه غريب جدًا .. غريب في بلاد غريبة 

إن حد يستقبلك في محله ويقولك السعر الحقيقي 

للحاجة اللي بيبيعها ده أكنه خيال علمي 

حدوتة ما تتصدقش .. والراجل ده أكتر بياع مش مرتاح وسط البياعين 

لأنه بيكون غرضه من انه يقول السعر الحقيقي

إنه يريح دماغه من الفصال والكلام الكتير 

ولكنه بيواجه رد فعل غريب من حاجتين 

يا إما الزبون بيشك إن حاجته أي كلام علشان سعرها رخيص 

يا إما الزبون برضه بيفاصل معاه 

لأنه إتعود إنه يفاصل ، وما اتعودش إنه حد يجي معاه دوغري قبل كده 

فبالتالي بيبيع بالرخيص وبرضه بيتعب من الفصال 

ده غير نظرة المجتمع له .. كونك بياع وسط سوق 

بتبيع بسعر رخيص عن اللي حواليك ده بيخليك مكروه 

وابسط حاجة ممكن تحصلك إن البياع المنافس ليك 

هيقول على بضاعتك مضروبة علشان كده رخيصة 

والبياعين اللي بالشكل ده ما بيكملوش في الشغلانة كتير

لأن ده لا هو زمن الناس الدوغري ولا زمن حد بيصدق حد فيه

ونصيحتي ليك لو انت بياع دوغري كمل 

وربنا هيكرمك لو مش في الشغلانة دي .. هيعوضك غيرها 

النوع الثاني : صاحب الكرامات 

البياع اللي بيشم على ضهر إيده .. الراجل اللي عارف

انت عايز ايه .. وبكام .. وهيطلع عليك حلو ولا لأ

 والبياع صاحب الكرامات تلاقيه واقف قدام محله 

وانت معدي لا بيك ولا عليك .. يوقفك ويقولك 

عينيك بتقول إنك عايز بنطلون ، الله وانت عرفت منين ؟

أنا فعلاً عايز بنطلون .. بس مش نازل أشتري

هو أنا قهوجي .. ما أنا بياع وأعرف زبوني من وسط ألف 

ولو مش نازل تشتري ومش عامل حسابك 

أخوك رقبته سدادة .. خد قيس ده هينور عليك 

وإنت عرفت مقاسي منين يا عمو البياع ؟ 

عيب عليك أنا أبص بصة واحدة بس

 أعرف القصير من الطويل و الواسع من الضيق 

تدخل تقيس تلاقي الحاجة مظبوطة فعلاً .. 

لا ده انت مخاوي بقى ؟ طب ده حسابه كام 

واعمل حسابك اني مش عامل حسابي 

 تلاقيه دخلك في دوامة بقى .. من غير حاجة .. 

الله يكرمك يا سيدي .. قولي بس كام .. 

مش مستاهلة .. من غير فلوس خالص 

إمال بإيه ؟ يعني ايه العملة اللي بتتعامل بيها هنا ؟

البيتكوين ؟ ولا انت بتتعامل بالبلح ولا ايه ؟

يا سيدي قولي بس بكام .. 

ده أنا أوصله لعند البيت ..يا سيدي لأ 

أنا هوصله أنا .. مش تلاجة هي .. قولي بس بكام ؟ 

دقيقة صمت .. هنا إعرف عزيزي الزبون 

إن كل المقدمات الخايبة اللي قبل كده 

كانت مجرد تمهيد لخازوق كبير 

وإنك هتسمع رقم فلكي ، غالي على كريستيانو رونالدو نفسه

الله .. إمال أخوك رقبته سدادة ايه بقى ؟

ومن غير حاجة .. ومن غير فلوس .. 

كان لازمتها ايه يا كابتن تعشمني وتخلى بيا 

والحقيقة لما تيجي تفكر تلاقي

 إن السعر اللي طلبه مش رقم مبالغ فيه ولا حاجة 

هو بس بيزود سعر الخدمة لسعر البنطلون مش اكتر

هتقولي خدمة ايه يا عم هو احنا في مطعم ؟

هقولك .. الله مش الراجل توقع اللي انت عايزه من غير ما تتكلم 

وادالك المقاس المناسب ليك من غير ما تقيس

وتتفرهد .. دي كلها خدمات يا أستاذ بتضاف للبضاعة 

ده غير بقى المقابلة الحلوة .. والأخوة والكلام الجميل ده 

والحل مع البياع صاحب الكرامات .. 

إنك تدخله دخلة غشيمة ، يعني تلاقيه بيقولك 

ده محلك وحاجتك وبضاعتك وأي نوع من الكلام ده 

تقوله لخص .. انت كده كده هتاخد فلوس 

كشمله ، هيجيب م الآخر ويديك السعر 

من غير مناهدة .. اشتريت تمام 

ما اتشريتش .. هو كده كده هيدعي عليك 

النوع الثالث : البياع المجامل 

طبعاً فيه فرق كبير بين المنافق والمجامل 

المجامل ده بيكون مش عايز يحرجك 

فيقولك إن الحاجة دي عليك تجنن ، وهي تقرف الكلب الحزين

ده علشان ما يكسرش بخاطرك بس .. بيجاملك 

إنما في حالة البياع فهو بيقولك بس

إن اللبس عليك حلو لأنه عايز يبيع مش أكتر 

بس ما علينا احنا هنمشيها مجامل علشان محدش يزعل مننا 

وقبل ما نشرح مزايا البياع المجامل 

خليني أسألك سؤال مهم حير العلماء

تفتكر إيه السبب ورا إنك لما تجرب بنطلون ولا تي شيرت

في المحل بتلاقيه شيك جدًا ومناسب 

تحس إنك في مراية المحل توم كروز 

وبمجرد ما تروح البيت وتلبس اللبس ده نفسه قدام مراية بيتكوا 

تلاقي نفسك قلبت عبد الباسط حمودة ؟

مش لاقي إجابة .. أحب أقولك إن السر ورا الموضوع ده كله 

هو التأثير اللي بيسيبه البياع المجامل عليك 

البياع اللي بيوهمك إن الطقم اللي انت لابسه ده اتصنع عشانك انت مخصوص

ويقنعك إنه مظبوط وما فيهوش غلطة .. 

ويخليك ما تصدقش اللي شايفاه عينيك 

وتصدق ودانك من كتر ما هو قاعد يمدح فيك

وأكنه عاملك تنويم مغناطيسي .. 

والبياع المجامل حاله ماشي أكتر من غيره 

وكل الزباين بتحبه ، علشان بيسمعهم اللي نفسهم يسمعوه 

التخين والرفيع والطويل والقصير .. 

كلهم بيتعاملوا معاه لأنه بيخليهم يشوفوا نفسهم مفيهومش غلطة 

وكلهم بيمشوا ظن عنده راضيين ومرضيين 

حتى لو هيخرجوا من عنده على الترزي عدل 

علشان يظبطوا اللي مش مظبوط .. ويضيقوا الواسع 

ويوسعوا الضيق وهكذا .. أو لو حتى هيرموا اللبس في الزبالة

بس الأهم عندهم إنهم خدوا جرعة أمل زائف من البياع 

تخليهم واثقين في نفسهم ، وبالشكل ده بيقرروا ما يدخلوش لبياع تاني غيره 

حتى لو كان بيغشهم .. والبياع من النوع ده علشان تتخلص من سحره 

لازم تطبق المثل اللي بيقول  .. 

يا بخت من بكاني وبكا عليا ولا ضحكني وضحك الناس عليا 

النوع الرابع : ضد الفصال (أبو كلمة واحدة)

والبياع ده بمجرد ما تدخل المحل 

تلاقيه حاطط يافطة مكتوب عليها شوية تعليمات بسيطة خالص

 بشوية جمل مانع تداولهم في المحل تمامًا 

زي احنا زباينك من زمان .. طب اكرمنا شوية ده احنا ضيوف 

اعتبر نفسك عازمنا على حاجة ساقعة 

ده احنا أول مرة نجيلك ..طب هات تمن المواصلات حتى

ده احنا مش بنشتري غير من عندك 

لازم تعمل معانا واجب علشان نجيبلك صحابنا 

وتلاقيه معلق الورقة دي على الباب 

وكل يوم الصبح يقف قدامها يحييها ويفكر نفسه

لأن البياع ده على الأغلب كان بياع دوغري 

بس قرر انه ما يكملش ، أو قرر إنه ما يتخربش بيته 

فخد عهد على نفسه ، وعمل دستور مكون من النقاط دي 

وقرر يمشي عليهم ، ويفكر نفسه بيهم يوم بيوم 

والبياع أبو كلمة واحدة نوع من البياعين 

ما بيشغلش نفسه انه يربي زبون خالص 

هو كفاية عليه الزبون الطياري اللي معدي بالصدفة 

تبقى الحاجة ب ١٠٠ يقولك ٥٠٠ وافقت كان بها 

ما وافقتش يستنى للي بعدك ، ما جراش حاجة 

متبع في حياته مبدأ يا جات يا راحت 

وهو إلى حد ما عنده حق .. يعني اللي يخليه يناهد 

ويصدع من كتر الفصال مع ١٠ زباين في اليوم 

علشان مكسب ٢٠ ولا ٥٠ جنيه من الزبون 

هو بياخدهم من زبون واحد بس 

وأهي ضربة بالمرزبة ولا عشرة بالشاكوش 

وتقدر تعرف البياع أبو كلمة واحدة من بعيد 

من شكل محله من بره ، تلاقيه فاضي من الزباين

لأنه ممكن من نظرة واحدة يعرف إنت جاي على ايه 

شرا ولا مناهدة يعني .. وكمان محله فاضي من البضاعة 

من كل نوع قطعة واحدة ، وهي القطعة دي 

اللي مستنيها تعوضه مكسب اليوم كله 

والبياعين من النوع ده تلاقيهم موجودين بكثرة في المولات 

وبيتربصوا بنوعين اتنين من الزباين 

الزبون اللي معاه خطيبته أو البت بتاعته 

فبيديله الرقم اللي هو عاوزه في وشه 

ويحرجه قدامها فما يقدرش يفلفص منه ويضطر يدفع 

يا إما الزبون اللي نازل يتمشى في المول 

وده بينزل مرة في السنة .. فمش هيشوف وشه تاني

والبياع من النوع ده الحل الوحيد معاه 

إنك تفاصله وتطلع عينه ، وما تشتريش 

لعند ما يغير مبدأه ، ويقطع الورقة اللي معلقها 

النوع الخامس : البياع المناضل 

والبياع ده نوع موجود في أماكن كتير جدًا حوالينا

من الوهلة الأولى هتعرفه ، من بعيد .. من بعيد قوي

وده لسبب بسيط جدًا ، لأنك بتحس البياع ده في مظاهرة 

مش مجرد بياع واقف في محل .. البياع ده من نوعية لم علينا عبيدك يارب

فتلاقيه واقف على الناصية ماسك قميص مثلاً

وبيشلل بيه وبيهتف حرفيًا مش بيبيع 

وأول ما يشوفك بتقرب من بعيد بس 

يلف ويدور حواليك وينادي ، وجو قرب قرب قرب 

قرب وجرب .. والبياع ده بيعمل مجهود خرافي 

وبيحرق كمية كلام ما حصلش .. وده واحد فاهم 

موضوع التجارة غلط ، إنها مجهود بدني مش ذهني خالص 

والأهم عنده إنه ما يسيباكش تقول كلمة واحدة 

وما يديكش فرصة للتفكير وانك تاخد قرار

لا عاجبني ولا مش عاجبني .. ولا ده ضيق ولا واسع 

ولا دع غالي ولا رخيص .. إنت هتشتري ، يعني هتشتري 

هتشتري بقى ببركة دعاه ، بشبكة العشرة دول 

وتصدق بالله وتؤمن بالله ، إنه ما كداب 

مش علشان البضاعة خالص ، إنت هتشتري بالزن 

وتحسه واقف بيلعب تلات ورقات 

وبيقولك طلعلي السنيورة ، والبياع ده هتلاقيه دايمًا 

موجود في الأسواق وفي المواقف ، واقف في الشارع كده 

لا هو بتاع تكييف ولا محلات نضيفة 

ولا بتاع ضل ، هو واقفلك في الشمس 

وموقفك جنبه يا إما يقنعك يا يزهقك .. يا يجيبلك ضربة شمس 

والحل الوحيد مع البياع من النوع ده ، 

إنك ما تروحش معاه في الكلام وتنسى نفسك 

ولا تنجرف مع الموجة ، لأنه هيطلع عينك 

وهيخليك عايز جلوكوز بعد الوقفة معاه من الفرهدة 

وهتطلع من عنده مسقط من غير ما تشتري 

فالحل معاه ، وأقصى مجهود تبذله إنك يدوب 

تهز راسك ، سواء مقتنع بكلامه أو لأ 

سواء مصدقه أو عارف إنه كداب وضلالي 

وتستناه لما يخلص الفقرة بتاعته وتتوكل على الله 

تمشي تشوف حد عنده حبة عقل .. ومجهوده على قده 

وطاقته على قدك تتعامل معاه 

النوع السادس : صاحب العروض 

والبياع ده بقى بياع موسمي ، زي الفاكهة كده 

 يعني تعدي عليه في أي يوم من أيام السنة

تلاقيه قاعد مكتئب ، محله مترب ، بينش 

و دقنه طويلة وحالته كرب ..  يبقى هاين عليك تحط في ايده أي حسنة 

ليلة وقفة عيد .. عيد أم .. دخلة مدارس 

تعدي عليه تلاقيه بيبرق هو والمحل 

والراجل ده بيعاني من إنفصام حاد 

وعنده كمية تناقض رهيبة ، بين أسعاره 

وحالته النفسية وقت الموسم ، وبين أسعاره 

وحالته النفسية والمادية طول السنة 

يعني في الأيام العادية تلاقيه بيبيع بالغلى

والحاجة اللي ب ١٠٠ تلاقيها عنده بألف 

تحس انه مش عايز يبيع ، ولا طايق نفسه 

ولا طايق الزباين ولا عايز يشوف حد 

ناقص بس يقفل على نفسه المحل 

ويولع اللمبة الحمرا ويحط على الباب يافطة 

مكتوب عليها لست بخير الآن .. تعالوا في العيد 

أما بقى في وقت المواسم تلاقيه منتعش ومفرفش 

مشغل مزيكا ، وأسعاره في النازل وفي متناول الفقراء والمساكين

ورافع شعار الحاجتين بسعر حاجة واحدة 

وتلاقي الزباين عليه بالطوابير وبالحجز كمان 

والبياع صاحب العروض تحسه عنده لغة خاصة بيه

يعني تبقى انت داخل تشتري ساعة مثلاً

استحالة يخرجك بيها لوحدها كده .. 

لازم يكون معاها حاجة تانية إضافية 

وإلا ما يبقاش عرض ، يعني هتاخد معاه محفظة 

كارت شحن ، قزازة برفان ، كوباية عصير 

أي حاجة المهم ، إنه ما يخرجش حاجة من المحل 

إلا لازم تخرج معاها كمان حاجة ، وإلا تبقى عيبة في حقه 

والناس تاكل وشه وما يعرفش ينام بليل 

والبياع من النوع ده التعامل معاه سهل وبسيط

إنت تتجنبه طول شهور السنة ، وتروحله بس 

في الأعياد والمناسبات ، بس بشرط

تحجز من قبلها بأسبوع ويا تلحق يا ما تلحقش 

والبياعين أشكال وألوان فيه منهم أبو القسم اللي ما بيبطلش حلفان 

ومنهم الحلانجي اللي بيموت في اللف والدوران 

ومنهم أبو ڤاترينة اللي كل حاجة عنده بره 

استحالة تلاقيها جوه .. وغيرهم أنواع كتير 

بس ما نقدرش ننكر إن منهم إبن الأصول 

اللي يصبر عليك ، واللي يدلك على المغشوش من الأصلي 

وكلهم على باب الله ناس عايزة تعيش بالحلال 

ياريت لو تعرف حد فيه صفة من الصفات

اللي اتكلمنا عليها في مقالنا النهارده

تعمله مينشن في الكومنتات.. وياريت لو مريت بتجربة مشابهة

للي اتكلمنا عليها في المقال النهارده تقولنا في الكومنتات

وما تنساش تشترك في المدونة

علشان يوصلك كل جديد.. وبكده تكون انتهت مقالتنا النهارده

عن أنواع البياعين .. استنونا في مقال جديد

وأشوفكم على خير ..