" أغرب المتاحف في العالم "

لو فاكر إن المتاحف اتعملت علشان تحفظ الحاجات المميزة والجميلة بس 

تبقى غلطان .. لأن فيه متاحف اتعملت لأسباب مختلفة تمامًا 

منهم اللي اتعمل علشان تتعرض فيه أسوأ الأعمال الفنية 

ومنهم اللي اتعمل علشان يعرف الناس أهمية دخول الحمام 

تعالوا نتعرف على أغرب المتاحف في العالم 

1/ متحف الكانكون الغارق

وده متحف موجود في المكسيك 

ولكن تحت الماية ، وبيحتوي على 500 تمثال 

منحوتين من صنع النحات المشهور (جيسون ديكاريس تايلور) 

والمتحف مكون من ٣ قاعات رئيسية بين عمق ٣ لـ ٦ متر تحت البحر

وكان الهدف من تأسيس المتحف ده الحفاظ على الشعاب المرجانية

بس المحير في الموضوع ، هل الفنان نحت التماثيل فوق الأرض

ورصوهم تحت .. ولا نحتهم تحت الماية علشان تبقى التجربة كاملة ؟

2/ متحف العلاقات الفاشلة في زغرب عاصمة كرواتيا

 

لا احنا ما بنتكلمش عن أوضتك .. احنا بنتكلم عن متحف بجد 

 اتعمل للمجروحين أو بلغة الجيل الجديد (الكلاونز)

 والمتحف ده مخصص لقصص الحب الفاشلة 

وبيضم أكتر من 2000 قطعة ، اتبرع بيها 

العشاق المجروحين للمتحف .. من دباديب لخواتم ودبل 

لقلوب حمرا مكسرة .. ومع كل قطعة من دول 

شرح موجز عن العلاقة الفاشلة وإزاي وصلوا للحالة دي 

طبعًا لو جاتلك الفرصة هتكون أكبر المتبرعين للمتحف ده 

بما إنك يا إما مفركش ، يا إما في الفريند زون على طول

3/ متحف الجاسوس الدولي في واشنطن 

والمتحف ده بيضم كل شيء عن التجسس 

من وثائق تاريخية استخدمها الجواسيس 

وأدوات التجسس والأسلحة السرية 

والمتحف مش بس للفرجة .. لا انت تقدر تشارك كمان 

في برنامج التجسس المباشر وتلعب دور جاسوس 

لمدة ساعة .. وكان الغرض من المتحف ده 

اظهار دور التجسس في تشكيل الأحداث الكبرى في العالم

فلو عندك شغف بالموضوع وبيراودك حلم الجاسوسية من زمان 

ومثلك الأعلى جيمس بوند .. جاتلك الفرصة إنك تعرف أكتر 

عن المجال اللي بتحبه قبل ما تدبس فيه .. 

4/ متحف سلابه الدولي للمراحيض في الهند 

ومتحف سولابه للمراحيض .. مزار كبير لكل السياح في الهند 

لأنه بيضم تشكيلة كبيرة من المراحيض والحمامات 

اللي متقسمة لتلات أقسام للحمامات ، من العصور القديمة 

والوسطى والحديثة .. وكان الغرض من المتحف ده 

إنه الشعب الهندي ولمدة طويلة ما كانش عندهم حمامات في البيوت 

وكانوا بيعتمدوا على المراحيض العامة 

فالحكومة حبت تعمل متحف يفهم الناس ايه فايدة الحمام 

مع إنها مش محتاجة يعني .. بس أهو وجع قلب 

وبيضم المتحف اقدم وأغرب أنظمة المراحيض 

من فترات تاريخية مختلفة .. 

5/ متحف الفن السيء

ومتحف الفن السيء أنشأه 

فنان اسمه سكوت ويلسون في مدينة ماساتشوستس في أمريكا 

 علشان يعرض فيه أعمال فنية سيئة 

وكان غرضه من المتحف ده إنه الأعمال السيئة 

زيها زي الأعمال الفنية الجيدة بالظبط من حيث الوقت 

والمجهود اللي بذله الفنان في رسمها ، وبما انها مش هتتباع 

فمش هينفع برضه تترمي .. وبيضم المتحف 400 عمل فني 

وحش .. في 3 صالات عرض ، وكل شهر بيتم قبول 

20 عمل جديد ، طبعاً لو الفنان نزل ميادين مصر 

وشاف التماثيل اللي بتتحط فيها في الوقت الحالي 

مش هيلاحق على الشغل .. والمتحف ده دليل كبير 

على إن كل حاجة وليها تمن .. وكل فولة وليها كيال 

دي كانت أغرب خمس متاحف في العالم .. 

تفتكر بقى لو حولنا أوضتك لمتحف هيتعرض فيه ايه ؟ 

قولنا اجابتك في الكومنتات وما تنساش تاخدلك لفة في المقالات اللي فاتت .. هتنبسط