قرية المليونيرات : ماذا لو إستيقظت يومًا وجدت نفسك مليونير ؟!

مصائب قوم عند قوم فوائد 

المثل ده بينطبق 100% على سكان قرية إسبانية

صحيوا من النوم لقوا نفسهم مليونيرات 

في شهر أغسطس لسنة 2016 ، مات الملياردير الإسباني (أنتونينو فيرنانديز)

عن عمر 99 سنة .. وبعد الدفنة والعزا 

قعد كل فرد في عيلته على نار مستني محامي أنتونينو

علشان يفتح وصيته ويقراها ، ويعرف كل واحد منهم 

هينوله قد إيه من ثروة أنتونينو الضخمة دي

ولكن الصدمة لما فتح المحامي وصية الملياردير المتوفي 

وفاجئ الجميع إن أنتونينو قبل وفاته 

وصى بتوزيع أكتر من نص ثروته على أفراد قريته 

(سيريثاليز ديل كونداو)

القرية اللي إتولد فيها أنتونينو 

فيرنانديز أنتونينو اللي هاجر من قريته الفقيرة للمكسيك 

وهو شاب فقير عنده 32 سنة 

وفرد من عائلة مكونة من أب وأم و13 أخ وأخت 

كلهم تحت خط الفقر ، وده كان الأمر الطبيعي بالنسبة للقرية كلها 

وعاش حياة صعبة جدًا ، عانى فيها كتير هو وعيلته 

من نقص الخدمات والموارد في القرية 

وقلة فرص العمل ، والفقر اللي خلاه يسيب دراسته 

وهو عمره 14 سنة ، الأمر اللي أثر فيه جداً 

وخلاه بعد ما بقى شاب أيقن إن وجوده في القرية دي بقية حياته 

هيكون أصعب عليه من اللي فات منها 

فقرر يهاجر للمكسيك ، ولما وصل المكسيك 

كانت قدامه وظيفة في شركة من شركات إنتاج المشروبات الكحولية 

بدأ فيها كعامل تعبئة عادي جدًا

ولكن مع شوية إجتهاد بدأ يترقى في وظيفته 

لحد ما وصل إنه يكون عضو من أعضاء مجلس إدارة الشركة 

ومن هنا قدر يطور الشركة ، وساهم في انتشار منتجاتها

في أمريكا والمكسيك بشكل ضخم 

وبسبب دوره الكبير ده ، بقى له أسهم في الشركة 

كأنه من ملاكها بالظبط .. ومع توسع الشركة 

كانت أسهمه فيها بتدر ربح ضخم عليه 

قدر من خلاله تكوين ثروة مهولة قربت للمليار دولار 

لحد ما توفى في 2016 ، ووصى بتوزيع 210 مليون دولار 

من ثروته على أفراد قريته اللي بيعانوا من الفقر 

واللي عددهم 80 فرد ، فطلع نصيب الفرد منهم 

2 ونص مليون دولار .. يعني لو عيلة فيها أربع أفراد 

فأصبحت بين يوم وليلة تمتلك 10 مليون دولار 

ومش بس كده ، ده كمان أوصى بتأسيس مركز ثقافي وتعليمي في القرية

بيقدم الخدمات التعليمية لأفراد القرية بشكل مجاني  

علشان يوفر لأبناء القرية الحاجة اللي إتحرم منها وهو صغير .. التعليم 

وكمان أوصى ببناء مؤسسة تنموية غير ربحية 

هدفها تطوير خدمات القرية الأساسية 

ووظف فيها كل شباب القرية بالكامل 

يعني وفرلهم التعليم المجاني ، والوظايف الثابتة اللي يقدروا يعيشوا منها بكرامة

وملك كل حد فيهم سواء طفل أو شاب أو عجوز 

2 ونص مليون دولار كاش 

طبعًا كان رد فعل أفراد القرية جنوني 

ويقال إن بعض منهم دخل المستشفى بسبب الصدمة 

وإتقامت الإحتفالات على ذكره ، وخلدوا إسمه على شوارع 

ومباني كتير في القرية تخليدّا له 

وللي عمله في قريته 

على الناحية التانية من الأحداث كانت أفراد عائلة أنتونينو 

في حالة من الصدمة ، فمنهم اللي إتهمه بالجنون في الوقت اللي كتب فيه وصيته 

ومنهم اللي إتهم محاميه بالتواطؤ 

وبناءًا عليه رفعوا قضايا للطعن في الوصية 

ولكن كلها إتحكم فيها بالرفض ، بعد ما أثبت المحامي 

إن وصية أنتونينو فيرنانديز صحيحة 100% 

دلوقت بقى بعد ما سمعت عن قرية المليونيرات 

والناس اللي صحيت من النوم لا بيهم ولا عليهم لقوا نفسهم يمتلكوا ملايين 

تفتكر لو ده حصل هنا ، هيكون رد فعل الناس إيه ؟

وهل ده كان فعل منطقي من فيرنانديز تجاه قريته ؟

ولا كان مبالغ فيه ؟