هل ممكن تنهي الحيوانات حياتها بنفسها ؟

 هل ممكن تنهي الحيوانات حياتها بنفسها ؟

الحيوانات مش مجرد شركاؤنا في الحياة 

بيعيشوا معانا على نفس الأرض ، وبيعملوا عائلات 

وعندهم عادات وتقاليد ، لأ 

دول كمان بيشتركوا مع الإنسان في سلوكيات كتير بشرية 

زي الصوم مثلًا ، بس بطقوس مختلفة شوية عن البشر 

فمنهم اللي بيصوم بسبب الحزن 

ومنهم اللي بيصوم بسبب المرض 

أو بسبب صحته .. 

ومش بس الصوم ، لا ده فيه شوية سلوكيات 

كتيرة بيعملها الإنسان والحيوان بنفس الطريقة تقريبًا

بس السؤال بقى اللي شاغل كل الأوساط العلمية والإجتماعية 

هو ، هل ممكن الحيوانات تقرر إنهاء حياتها ؟ 

وإيه الدوافع من ورا سلوك زي ده ؟ 

طب هل عند الحيوانات مشاكل نفسية زيها زي البشر ؟ 

لازم تعرف إن فيه أعداد كبيرة جدًا 

تم رصدها على مدار العصور ، من ثقافات وبيئات مختلفة 

لحيوانات قررت تنهي حياتها 

وده مذكور في حالات كتير من بداية تدوين التاريخ نفسه 

لدرجة إن أرسطو نفسه إتكلم عن حيوانات أنهت حياتها 

في أكتر من حادث ، وأكتر من مناسبة 

وده إتذكر في كافة الثقافات ولسه لدلوقت 

بتعدي قدامنا حالات لكلاب أنهت حياتها بالجوع بعد وفاة صاحبها 

أو غرقوا نفسهم في المياه 

أو نطوا من فوق عمارة عالية 

يعني حالات مُثبتة في التاريخ ، ومتكررة ومتجددة 

لكن المحير في الأمر بقى 

هي الحيوانات بتعمل كده ليه ؟ 

الطبيب النفسي أنطونيو بريتي ، الطبيب في جامعة كالياري الإيطالية 

قام بمراجعة 1000 دراسة علمية 

بخصوص الموضوع ده .. إنهاء الحيوانات حياتها عن عمد 

وعلى مدار 40 سنة توصل لنتيجة غريبة 

وهي إن مفيش أي حيوان بيقوم بإنهاء حياته عن عمد 

بغرض إنهاء حياته فعلًا 

وإن كل القصص اللي بتتحكي دي عن حالات حصلت بالفعل 

مجرد صدف أو أساطير حطت الحيوان في الموقف ده 

واللي إتفهم إنه إنهاء حياتهم عن عمد 

وإن أي حيوان بيُقدم على إنهاء حياته 

بسبب موت صاحبه مثلاً ، بيرجع لخلل نفسي 

ناتج عن فقدان الرابط الإجتماعي بينه وبين صاحبه 

وإنه ما بيعتبرش ده إنتحار ، لأنه قرار غير واعي 

لأنه على سبيل المثال ، الكلب اللي بيموت نفسه 

عن طريق إنه يقطع الأكل بعد موت صاحبه 

لأنه بيكون من المستحيل أنه يقبل ياكل من إيد أي حد تاني غير صاحبه 

وفي دراسة نشرت في عام 2013 

قالت إن بعض الفيران ممكن تموت نفسها 

بأنها تعرض نفسها للموت بأنها تتاكل من القطط مثلًا

ولكن ده مش إنتحار تمامًا ، وإنما ده مجرد 

إصابة الفيران دي بطفيلي إسمه (التوكسوبلازما)

واللي بيفقدهم الخوف الفطري من القطط 

أو من المخاطر عموماً ، وإن ده بيحصل لحيوانات كتير 

كل اللي فات ده يفهمنا إن مفيش حيوان بيقدم على الإنتحار 

بوعي كامل أبدًا ، زيه زي البشر 

لأن الكائن الوحيد اللي عنده القدرة 

على فهم الفكرة المجرد للوفاة هو الإنسان بس 

وبالتالي فمن غير المنطقي أن تتسبب الحيوانات في موت نفسها 

وإنهاء حياتها لأنها مش فاهمة حياتها بشكل كامل أصلًا 

وإنت إيه رأيك ؟ تفتكر الحزن ممكن يخلي حيوان ينهي حياته بالفعل ؟ 

ولا لده دوافع تانية مختلفة ؟