طائفة الموريش ، أصحاب قرآن الدائرة 7 (آيات سرية من القرآن ، الملاك الحقيقيين للولايات المتحدة الأمريكية)

 طائفة الموريش ، أصحاب قرآن الدائرة 7

(آيات سرية من القرآن ، الملاك الحقيقيين للولايات المتحدة الأمريكية)

تخيل إن فيه طائفة أكتر من 40 ألف بني آدم 

بيدعوا انهم عندهم آيات سرية من القرآن ؟

وبيسموه أصحاب قرآن الدائرة 7 ..

 يا ترى مين دول ؟ 

وإيه قصة نبيهم المغربي اللي إدعى إمتلاكه للولايات المتحدة الأمريكية ؟

أعجب طائفة دينية في العالم ، أصحاب الطرابيش الحمر 

مسلمين من نوع خاص ، وعندهم قرآن مختلف وخاص بيهم لوحدهم 

وبيسموه .. قرآن الدائرة 7 

قبل الحرب العالمية الأولى ، وتحديدًا في سنة 1913

صحي شخص أمريكي من أصول مغربية من النوم 

وقال إنه شاف حلم ظهر له فيه راجل صوفي 

كان قابله من سنين وقاله إنه فيه من المواصفات اللي تخليه نبي

ده لما كان وقتها عنده 16 سنة .. 

لما كان بيشتغل ساحر في سيرك 

وبعد 16 سنة زيهم .. حلم بنفس الراجل بيقوله  

 (يجب عليك تأسيس دين جديد لرفع البشرية من الهلاك) 

إحنا بنتكلم عن (نوبل درو علي) ، الأمريكي من أب مغربي 

وأم من الهنود الحمر ، المواطنين الأصليين لأمريكا 

بعد ما قام من النوم ، ما صدق و بدأ دعوته بين الأمريكان السود من سنة 1913

لحد ما نجح في تأسيس طائفة دينية ومعتقد سنة 1928 

حاجة كده مزيج بين الإسلام والمسيحية والبوذية 

وقدر خلال السنين دي يقنع 30 ألف أمريكي أسود 

أنهم مش زنوج ، بل هم أحفاد المغاربة ، واللي في إعتقادهم 

إنهم كانوا في يوم بيمتلكوا أمريكا نفسها 

ولموا بعض وأسسوا معبد في ولاية شيكاغو 

وسموا نفسهم طائفة الموريش

وبدأوا ينشروا روايات أنهم من أصل مغربي 

وأنهم أصحاب الأرض الأصليين ، وإنهم وصلوا أمريكا واكتشفوها 

قبل كولومبوس ما اكتشفها سنة 1492 

وجم الأرض دي .. أرض أمريكا من خلال جدهم الكبير 

 (مصطفى الزموري) ، ومش كده وبس 

لا ده حتى كمان إسم أمريكا قريب من إسم موروكو في النطق 

خد بالك .. إحنا بنتكلم في وقت كانت فيه أمريكا أصلًا

بؤرة من العنصرية ، وبيعاملوا الملونين معاملة العبيد 

وأنهم ملهومش أي حقوق ، والدافع ده كان هو السبب الرئيسي في اعتناقهم للطائفة دي 

وهو اللي قدر يلعب بيه (نوبل درو علي) 

وأقنع أفراد طائفة الموريش ، إنهم هياخدوا حقهم خلاص من الناس اللي مستعبداهم 

لما الطائفة تكبر ، لأنهم أصحاب الأرض الأصليين 

هما ملاك أمريكا ، وإن أمريكا بلد مغربي 

وصل لها المغاربة قبل سنين من الأوروبيين 

ولما وصلوا الأوروبيين أقنعوا ملك المغرب

إنهم يأجروا أمريكا لمدة 50 سنة 

إلا إن الأوروبيين بطبعهم المحتل ، نقضوا العقد مع الملك 

وإحتلوا الأرض بالكامل بقوة السلاح 

فبعد ما كانوا عبيد بقى له الحرية الكاملة 

في تملك وإستخدام أي قطعة أرض في أمريكا 

وإن ده حقهم الشرعي 

والغريب في الأمر قوة إيمان الناس دي باللي بيعملوه 

فبرغم إن العالم كله بيقول عكس اللي بيقولوه 

وبرغم إنهم مولودين في امريكا ، بس من أصول أفريقية 

إلا إنهم طول الوقت شايلين العلم المغربي 

وبيعتبروه رمز هويتهم ، وبيظهر معاهم في كل الأحداث العامة 

ودايمًا لابسين الطربوش الأحمر (الفاسي) 

نسبة لمدينة فاس في المغرب 

وبرغم كل الولاء والانتماء ده ، إلا إنهم ما بيحملوش الجنسية المغربية 

بشكل رسمي من حكومة المغرب 

ولكن عندهم بطاقات شخصية وجوازات سفر رمزية 

شايلة أعلام أمريكا ، والمغرب 

و بيصل عددهم النهارده 40 ألف شخص 

كلهم مقتنعين إن أمريكا بتاعتهم 

لدرجة إن في سنة 2013 استولى مواطن أمريكي إسمه (باتلر لا مونت)

من طائفة الموريش على قصر غير مسكون في مدينة واشنطن 

سعره 7 مليون دولار ، وبرر تصرفه ده 

لما اتعرض ع المحكمة ، إنه أخد حقه المشروع 

كونه أمريكي تابع لإمبراطورية المغرب 

فحقه الطبيعي يحط إيده على أي ملكية تعجبه 

وطبعًا حولوه لدكتور الأمراض النفسية واتحبس 

طائفة الموريش عندها كتاب عقائدي بيسموه (قرآن الدائرة 7)

وهو عبارة عن كتاب بيبدأ بالفاتحة ، ومكون من 28 فصل 

فيه آيات من القرآن ومواعظ من الإنجيل 

وبتقوم العقيدة على خمس مبادئ أساسية 

(الحب ، السلام ، الحقيقة ، الحرية ، والعدالة) 

بعد ما سمعت عن طائفة الموريش ، ونبيهم المزعوم 

تفتكر هما فعلًا المغاربة أصحاب أمريكا الأصليين 

ولا دي كانت مجرد حجة للهروب من العبودية ؟