أغرب المعتقدات الدينية في العالم

 أغرب المعتقدات الدينية في العالم

الدين اتخلق علشان ينظم علاقات الناس بخالقهم وبينهم وما بين بعض 

انما بقى البشر قرروا إنهم يعتنقوا ديانات عمرها ما هتفيدهم 

ولا هتضرهم ، ولا هي فيها شيء من المنطقية أصلاً

ما بين بشر بتعبد فيران ، وغيرهم بيعبدوا أوراح الموتى 

إلا إن فيه ٥ معتقدات دينية هم الأغرب ما بين كل الديانات في العالم 

أولهم (الموت الرحيم) ، ومقرها كنيسة الموت الرحيم في بوسطن في امريكا

واللي اتأسست سنة ١٩٩٢ على يد

القس (كريس كوردا) والقس (كيم) 

وهي منظمة دينية غير ربحية هدفها 

استعادة التوازن بين البشر ، وبتلقي اللوم 

على النمو السريع للبشر في تدمير أشكال الحياة 

وهدف الكنيسة دي والمعتقد ده إنقاذ الأرض

من خلال الانتحار والاجهاض ، ودي الديانة الوحيدة في العالم 

المناهضة للإنسان ، وواقفة ضده وضد انتشاره 

لدرجة إن من أشهر عباراتهم (اقتل نفسك وانقذ الكوكب)

تاني أغرب معتقد ديني في العالم (الحركة الخلاقة) 

ودي منظمة مقرها الولايات المتحدة الأمريكية

بتؤمن بتفوق العرق الأبيض ، وبتدعو لدين خاص بالبيض لوحدهم 

ومعندهومش كلمة خالق أو إله .. 

وكلمة إله في نظرهم بتعبر عنهم هم أنفسهم (البيض الأوروبيين)

والديانة دي معادية لكل الديانات اياً كانت 

ومعادية لكل طوائف البشر إلا البيض 

أسسها (بن كلاسن) في ولاية فلوريدا سنة ١٩٧٣ 

ومقرها كنيسة الخالق ، وبيعلموهم في الكنيسة دي 

تجنب غير البيض تماماً وعدم التفاعل معاهم اجتماعياً وكرههم 

أما بقى لو متخيل إن ده غريب فلسه ما شوفتش حاجة 

لأن من أغرب الديانات في العالم ، الديانة المارادونية 

واللي مقرها كنيسة مارادونا في مدينة (روساريو) 

في الأرجنتين تحديدا في ٣٠ أكتوبر سنة ١٩٩٨ 

وهي كنيسة ذات طابع ديني أنشؤها في عيد ميلاد 

لاعب كرة القدم الأرجنتيني (دييجو مارادونا)

وبيحتفلوا بعيد ميلاده كل سنة في نفس التاريخ ده 

ونشأت الديانة دي بسبب هدف مارادونا التاريخي في منتخب انجلترا

لما قدر يراوغ ٦ لاعيبة وحارس المنتخب الانجليزي 

وهما شايفين بالشكل ده انه انتقم للأمة الأرجنتينية كلها 

ورد اعتبارها من هزيمة الجيش الأرجنتيني من الجيش البريطاني

في حرب جزر (الفوكلاند) سنة ١٩٨٢ 

وبسبب جملة قالها مذيع مباراة الارجنتين وانجلترا 

تعليقا على هدف مارادونا باليد (أن من أحرزت الهدف يد الرب) 

ومن يومها واعتبروا مارادونا اله 

من أغرب الديانات في العالم واللي في الوقت الحالي 

لاقية رواج كبير بسبب الترويج لفكرة الفضائيين 

الديانة الرائيلية ، وهي ديانة فكرتها إن الكائنات الفضائية

أو اللي بيسموها (الإلوهيم) جم الأرض في الماضي البعيد 

وخلقوا كل أشكال الحياة عليها وهما سبب الأديان كلها 

أسس الديانة دي صحفي سيارات فرنسي اسمه (كلود فلوريلون)

لما قدر يقنع أتباعه إنه تلقى اشارات من الكائنات الفضائية 

وانهم تواصلوا معاه وفهموه انهم جم للبشر زمان على شكل ملايكة 

وعلموهم وبنوا حضارتهم .. 

وعلى عكس حب وتقديس الديانة الرائيلية للفضائيين 

وتشجيعهم للتقنيات اللي هتوصل البشر ليهم 

ديانة (بانا ويف) كانت ضد كل التقنيات والأجهزة الحديثة والكهربا نفسها 

وديانة بانا ويف فرع من جماعة دينية اسمها (تشينو شوهو)

أسستها واحدة ست اسمها (يوكو تشينو) سنة ١٩٧٧ 

وبتجمع بين المسيحية والبوذية 

ولكن أهم معتقداتهم إن الطاقة الكهرومغناطيسية هتدمر البشرية 

لذلك كانوا دايما في رحلة بحث عن أقل الأماكن عرضة للأمواج الكهرومغناطيسية

ولابسين دايمًا أبيض في أبيض 

وبيعيشوا في خيام بيضة لاعتقادهم انها هتحميهم من الاشعاعات 

ومؤمنين جدًا إن لو زعيمتهم (يوكو تشينو) 

ماتت بسبب الاشعاعات هتتدمر البشرية 

ولسه ياما هنشوف .. والحقيقة إن السبب في تنوع 

وغرابة الأديان بين البشر هو الحرية 

اللي احنا مش ضدها ولا حاجة .. لكم دينكم ولي دين 

بس أحيانًا بتكون الحرية سجن 

خصوصا لو هتكون سبب في تربية ولادنا على كدبة كبيرة