الصرصار ، اللي ما يعرفك يقتلك .. معلومات غريبة عن الصرصار ستجعلك تحترمه

 

  الصرصار ، اللي ما يعرفك يقتلك

شكل لينا كان عندها حق في كل اللي عملته 

لأن الصرصار ده طلع حدوتة كبيرة قوي يا اخوانا

في الحلقة دي هنعرف عن الصراصير كما لم نجري وراها بالشبشب من قبل 

وهنعرف انها تستحق كل احترام وتقدير 

الصراصير من أقدم الكائنات على وجه الأرض 

 يعني مر على الأرض أزمان كتير مختلفة

من عصر حجري لعصر جليدي لفيضانات لكوارث طبيعية 

ولكن دول متبتين في الأرض ما بيحصلهومش حاجة 

ولا أثرت فيهم مبيدات الشركة الألمانية ولا شباشب أي أم مصرية 

لدرجة إن العلماء بيقولوا إن عمر الصرصار على الأرض ٢٥٠ مليون سنة 

وده راجع لقدرته العالية على المقاومة للكوارث الطبيعية والأمراض 

وإنه جسمه بيقدر ينتج مضادات مناعية تحميه من أي أمراض 

فعمره ما هيصدع مثلا ويطلب بنادول 

لا هو عنده طبيعي ..

ده غير إنه بياكل أي حاجة تقريبًا.. خشب ماشي 

تراب ماشي .. لقمة عيش بحتة جبنة .. ما بيقولش حاجة .. ما بيتبترش 

وده اللي بيخليه نينجا في نفسه كده 

تجري وراه بشبشب يختفي في ثانية قبل ما تلسعه 

تفاجئه بمقشة تلاقيه هوب طاير في وشك ومفرج عليك أمة لا إله إلا الله .. وهكذا

والصرصار هو تقريبًا الكائن الوحيد اللي بيفضل عايش

بعد أي حرب نووية ، شفت البشر بتبني للحروب النووية 

ملاجئ وأنفاق تحت الأرض قد ايه .. ده مش محتاج ده كله

لأن عنده قدرة على تقليص حجمه للهروب بشكل غريب

يعني يقدر يمشي في ماسورة حجمها ٥ ملم ..

 وكمان يقدر يجري بسرعة  ٥ كيلو متر في الساعة 

ده غير انه بيقدر يطير لمسافات قصيرة .. ودي لوحدها ميزة 

بتديه هيبة قصاد أي رئيس مجلس إدارة بيتحكم في ١٠٠٠ عامل 

حتة صرصار بيطير يمرمط كرامته في الأرض  

الصرصار كمان عنده القدرة انه يحبس نفسه لمدة ٤٠ دقيقة 

ولا أجدعها غطاس مجاري .. ولا عمره طلب ميدالية ذهبية 

ولا طلع في الجرايد وطالب بحمل لقب في موسوعة جينيس 

والميزة دي بتخليه يقدر يهرب من أي غاز سام 

يعني تبقى انت صارف ومكلف وجايب شركة ترش الشقة من الحشرات 

وانت والمدام والعيال لابسين ماسكات وخايفين تتنفسوا 

وده يطلع يدخن مع العمال ويقعد في الليفنج مستني خربوش الشاي 

والصرصار مع إن له في الجبال علامات وكل البشر بيقرفوا منه 

إلا إنه لو جينا لكلام العلم هنلاقيه بيقرف من الإنسان جدًا

يعني بمجرد ما حد يلمسه يجري يستخبى ويبدأ ينضف في جسمه 

إبن ناس قوي الحقيقة .. 

ومع إن الصرصار كائن ملوش عينين .. إلا إنه بيعتمد في حركته 

على قرون الاستشعار واللي بتكون حساسة جدًا وبتخليه قادر انه يتفادى أي حوار 

قبل ما يترب فيه .. محتاجين نفعل ميزة زي دي عند البني آدمين 

علشان نفرز الشخص التوكسيك من النضيف 

 ده غير إن عنده القدرة على الصوم من أسبوعين لمدة شهر كامل 

ده لو ما لقاش تراب ياكله .. اللي هو موجود في كل حتة

وطوال مدة صومه ما بيحسش بأي تعب .. 

لأنه معندوش قلب زي ناس كتير نعرفها .. والدورة الدموية في جسمه 

بتتحرك من خلال بعض الأنابيب الضاغطة مش أكتر 

كمان من القدرات الغريبة اللي بيمتلكها الصرصار 

انه قادر على التأقلم مع المبيدات الحشرية بسرعة

يعني ترش عليه المبيد .. يدوخ شوية ويدخل يخلفلك ١٠٠ صرصار 

عندهم مناعة ضد نفس المبيد ده .. 

يعني updated بكل جديد .. 

ده غير إن أنثى الصرصار بتفضل تولد طول حياتها 

حتى لو قابلت الصرصار الذكر مرة واحدة في العمر .. 

طب ده لا بيموت من الجوع ولا الغاز ولا أي حاجة .. أنا هقطع راسه خالص

للأسف مش هينفع لأن الصرصار بيفضل عايش كذا أسبوع بعد ما تتقطع راسه 

وده لأنه معندوش أنف ولا رئتين والأكسجين بيدخل جسمه عن طريق الامتصاص

اخر حاجة هنقولها إن عدد الصراصير أكبر من كل الكائنات على وجه الأرض 

وموجودين في كل حتة خلقها ربنا صحرا ان كان أو بستان

من جانبنا إحنا بنعتبر الصرصار على رأس الهرم الغذائي 

مش الإنسان .. لأن ما يخوفش الراجل إلا واحدة ست 

وما ياخدش تار الراجل من الست إلا صرصار 

يخليها قاعدة ماسكة الشبشب في ايدها ومطبقة باليومين 

أظن بعد اللي عرفناه عن الصرصار وقد إيه هو كائن 

له هيبة وتاريخ طويل .. ياريت لما تشوف صرصار المرة الجاية 

تديله وضعه اللي يستاهله .. وتضربله تعظيم سلام