شجر الدر - الخادمة التي جلست على عرش مصر "

فيه مثل مصري بيقول ، اللي خدته الهانم تاخده مساحة السلالم

وده بيعبر عن اللي حصل لشجر الدر 

واللي حياتها اتحولت من جارية لملكة مصر

 لواحدة مصيرها كان القتل بطريقة بشعة 

هل ممكن الغيرة توقع واحدة ست من أعلى المناصب

 لدرجة أنها كانت بتحكم دولة في حجم مصر 

لأنها تقتل وتتقتل بالشكل البشع ده ؟

طب هل الستات كلهم عندهم نفس الدوافع ؟ ورد الفعل ده ؟

الحقيقة لو كل الستات زي شجر الدر كانت الدنيا خربت

قصة شجر الدر دليل كبير على صحة المثل اللي بيقول

من الحب ما قتل .. ومن الغيرة برضه ما قتل 

شجر الدر تولت حكم مصر لأيام قليلة ..

 وكانت واحدة من أذكى السيدات على وجه الأرض 

ليها قصة كبيرة جدًا ، بداية مختلفة ومصير أغرب 

فى سنة ١٩٦٢م أتصور مشهد غرق شجر الدر في فيلم وإسلاماه 

 لكن في الحقيقة ده محصلش

وقبل ما نحكيلكوا ايه اللي حصل تعالوا نحكي شوية عن شجر الدر 

وازاي وصلت لحكم مصر وازاي ماتت بشكل بشع ..

شجر الدرّ الملقبة بعصمة الدين أو المستعصمة أم خليل ، خوارزمية الأصل ،

 واتقال أنها أرمينية أو تركية ، مش معروف تحديدًا اتولدت إمتى ؟

لكن اللي معروف وثابت في التاريخ وقت وفاتها 

قصة من أغرب القصص اللي ممكن تسمعها في حياتك  

شجر الدرّ كانت جارية اشتراها السلطان الصالح نجم الدين أيوب، 

وحظيت عنده بمكانة عالية لحد ما أعتقها وتزوجها 

وأنجبت منه ابنها خليل واللي توفي في 2 من صفر 648 هـ (مايو 1250م). 

تولت عرش مصر لمدة 80 يوم فقط بمبايعة من المماليك وأعيان الدولة

 بعد وفاة السلطان الصالح أيوب، ثم تنازلت عن العرش لزوجها 

المعز أيبك التركماني سنة 648 هـ (1250م).

و لعبت دور تاريخي مهم أثناء الحملة الصليبية السابعة على مصر

 وخلال معركة المنصورة بتاعت لويس التاسع

لو سألت أي مصري عن موت شجرة الدر هيحكيلك القصة 

اللي تناولها فيلم وإسلاماه وموتها بالغرق في القلعة

لكن ده ما حصلش واللي حصل كان أبشع من كده بكتير

لأن شجر الدر ( وليست شجرة الدر ) بعد ما تخلصت من توران شاه

 ابن جوزها الصالح نجم الدين أيوب آخر سلاطين الدولة الأيوبية فى مصر

 تخلصت كمان من أقطاي زعيم المماليك البحرية وأحد أشرس القادة عالساحة وقتها

بغرض فرض سيطرتها التامة على حكم مصر وتصبح صاحبة القرار الوحيدة

 بعد كده اتجوزت عز الدين أيبك وشوية وبدأ الصراع بينهم ع السيطرة الراجل ولا الست

وجو ياسمين عز ورضوى الشربيني ده وجو أنا مش ملزمة ، 

والكلام الجديد ده اللي كان باديء في دماغ شجر الدر من زمن بعيد فات

ولأن شجر الدر كان عندها أنفة كبيرة 

ولا تقبل أبدًا إن حد ياخد حاجة منها ولا تقبل المساومة 

فبمجرد ما عرفت أن عز الدين أيبك رايح يخطب ابنة بدر الدين لؤلؤ

 صاحب الموصل ، هوب تعالى يا عنيا و اتفقت مع الخدم اللى فى القلعة

 واللى دخلوا علي عز الدين أيبك وهو بيستحمى وخلصوا عليه 

ومش عاوزين نفسر أكتر من كده الخدم عملوا فيه إيه المهم خلصوا عليه  

بعد ما خلصت على عز الدين أيبك ، وتانى يوم

 أعلنت شجر الدر خبر الوفاة ولا أكنها عملت حاجة

وعيطتلها شوية وأخدت عزاه وكل الناس يا عيني صدقوها إلا واحد بس 

سيف الدين قطز واللي كان في الوقت ده نائب السلطنة

واللي بمجرد سماعه للخبر قبض على كل خدم القصر وعذبهم

 لحد ما اعترفوا على نفسهم بنفس ذات نفسهم باللي عملوه في عز الدين أيبك ..

 قام قطز قائد المماليك حكم بالإعدام على الخدم 

وسلم السلطانة شجر الدر لزوجة أيبك الأولى وأم إبنه .. نور الدين 

واللي كانت معروفة بإسم أم علي .. واللي على فكرة 

جه من إسمها تسمية أم علي طبق الحلو المعروف

المهم إن أم علي أمرت الجواري بتوعها بقفل أبواب القلعة على شجر الدر 

ونزلوا فيها ضرب بالقباقيب لغاية ما ماتت ، وما اكتفوش بكده وبس 

لا دول رموها من فوق أسوار القلعة عريانة تمامًا  

فضلت جثة شجر الدر في الشارع كام يوم لعند ما ريحتها طلعت

تخيلوا احنا هنا بنتكلم على ملكة مصر .. صحيح دوام الحال من المحال

 وبعد كده حطوها في شوال ودفنوها في المقبرة بتاعتها 

فى شارع الخليفة بحي الخليفة بالقاهرة

 وبالشكل البشع ده إنتهت حياة واحدة 

من أغرب حكام مصر .. اللي جات مصر جارية ووصلت لكرسي عرش مصر 

وبعد 80 يوم ماتت بالضرب بالقباقيب 

 بطريقة مأساوية سنة ١٢٥٧م 

تفتكر بقى ، هل الشاعر الكبير المتنبي لما قال 

لا تشتري العبد إلا والعصا معه .. إن العبيد لأنجاس مناكيد 

كان عنده حق .. ؟ ولا لأ 

تفتكر كمان هل القوة المفرطة اللي فجأة حظت بيها 

شجر الدرّ وتحولها المفاجئ من جارية 

لملكة مصر .. كان السبب في كل الجبروت اللي اكتسبته ده ؟

والسؤال الأهم .. هل لو عرفتي إن جوزك رايح يتجوز عليكي 

هتعملي فيه زي ما عملت شجر الدر في جوزها ؟ 

ياريت تقولولنا في الكومنتات