الطفلة التي كبرت 20 سنة في يوم واحد

سنة 2009 صدر فيلم من أقوى أفلام الرعب النفسي 

فيلم Orphan ، واللي بيحكي قصة طفلة 

إسمها (إيستر) ، يتيمة عايشة في إحدى دور الرعايا 

وبتيجي أسرة تتبناها علشان تعيش معاهم ، ومع أطفالهم 

ومع الوقت بيلاقوها ما بتلعبش مع الأطفال 

وإن أولادهم بيتعرضوا للأذى كل ما تكون إيستر موجودة معاهم 

لحد ما يكتشفوا إن الطفلة دي اللي عندها 9 سنين 

واحدة ست بالغة عندها 33 سنة 

واحدة ست عندها مرض نادر هو السبب في شكلها ده (شكل وجسم طفلة)

غريبة ..  مش كده ؟ ، لكن الأغرب بقى هتكتشفه 

لما تعرف إن دي قصة حقيقية ، أكبر وأغرب من اللي حصل في الفيلم 

تخيل لما تيجي تعمل خير وترميه في البحر 

فيرد في وشك ويدخلك في حالة ذهول لبقية حياتك 

ومش لوحدك ده العالم كله إتذهل من قصة (باربورا سكارلوفا)

واللي إتبنتها عيلة نرويجية على أساس إنها طفلة عندها 13 سنة 

وبيكتشفوا بعد فترة إنها ست بالغة عندها 33 سنة 

مش كده وبس .. لا دي عندها سجل إجرامي كمان 

(باربورا سكارلوفا) ست تشيكية كانت مصابة بمرض نادر

إسمه (قصور الغدة الدماغية) وده كان مسببلها 

حالة من التقزم ، ومظهرها وشكل جسمها يبين إنها مجرد طفلة 

إرتكبت باربورا أول جرايمها في بلدها التشيك 

لما كانت عايشة مع أخواتها (كلارا) و (كاترينا) 

وأولاد أختها كاترينا الاتنين .. ولد وبنت 

واللي للأسف كانوا التلات أخوات ، كاترينا وكلارا عندهم برضه مشاكل عقلية 

وده خلى باربورا تستغل مرضهم وتقنعهم بضرورة 

معاقبة أولاد كاترينا بشكل قاسي ، وتعذيبهم 

وبالفعل بقت دي عادة بتعملها كاترينا وكلارا بشكل يومي ، بيعذبوا الولاد

لحد ما في يوم الجيران شافوا كاترينا وكلارا هما بيعذبوا الأطفال 

فاتصلوا الجيران بالشرطة ، اللي جات وقبضت عليهم 

ولقوا جنبهم طفلة صغيرة بتعيط ومفزوعة ، وجنبها طفلين سايحين في دمهم 

حكمت المحكمة على كاترينا بـ 9 سنين 

مراعاة لمرضها العقلي ، وحكمت على كلارا بـ 10 سنين سجن 

طب إمال باربورا راحت فين ؟ 

ما هي دي الطفلة اللي الشرطة لقيتها جنب أطفال كاترينا مفزوعة وبتعيط 

وبناءًا عليه دخلوها ملجأ حكومي ، ومن الملجأ قدرت العيلة النرويجية 

اللي إتكلمنا عليها في أول الحلقة تتبناها 

وبعد ما اكتشفت العيلة النرويجية حقيقتها ، قدرت باربورا تهرب منهم 

وزورت هويتها الشخصية ، وغيرت جنسها من أنثى لذكر ، ولد إسمه (جون) 

عنده 14 سنة ، وبالتالي قدرت تدخل المدرسة الثانوية 

من غير ما حد يكتشفها وتقضي فيها سنة 

لحد ما بالصدفة تلاحظ مدرسة الرسم إن جون اللي هو في الأصل باربورا 

بترسم لوحات لأطفال بيتعذبوا وبيتعرضوا للشنق 

خافت المدرسة ، وإستدعت مختصين 

اللي كشفوا على باربورا ، فيكتشفوا إنه مفيش جون 

وإن جون ده في الأساس بنت 

فبيقوموا بإستدعاء الشرطة ، اللي بيتصدموا لما بيحللوا بصمة باربورا

علشان يكتشفوا إنها نفس البنت اللي أخدوها بتعيط 

جنب أطفال كاترينا وودوها الملجأ 

المجرمة الحقيقية

وبعد شوية تحقيقات ، بيكتشفوا الصدمة الأكبر 

باربورا سكارلوفا واحدة ست عندها 33 سنة 

مصابة بمرض نادر قدرت تستغله للنصب مش أكتر 

إتحكم على باربورا ب 10 سنين في سجن خاص 

وإختفى أمرها تمامًا من بعد الحكم عليها 

بعد ما سمعت قصة سكارلوفا ، تفتكر إنها كانت مجرد 

مريضة ، وعندها إضطرابات نفسية خلتها تتعامل بالعنف ده 

ولا هي كانت مجرد واحدة بتحاول تعيش طفولتها ومراهقتها 

اللي ما عرفتش تعيشهم قبل كده ؟