" أكبر أم في التاريخ " صاحبة لقب أكبر أم في التاريخ ، خلفت 69 طفل ده غير اللي ما اتسجلش فالنتينا وعيالها ال٦٩ أكبر ام إنجابًا في التاريخ

   

" أكبر أم في التاريخ "

صاحبة لقب أكبر أم في التاريخ ، خلفت 69 طفل ده غير اللي ما اتسجلش

فالنتينا وعيالها ال٦٩ أكبر ام إنجابًا في التاريخ 

الدنيا اتقل خيرها ، ولا بقى فيه شباب قادرة تفتح بيوت 

ولا بنات عارفة تربي ، وبعد الطفل التاني 

تقولك كفاية كده وانا مش ملزمة 

ويوم ما يتقالها بس انك حامل ، تقضي أول 9 شهور من الحمل في السرير 

وفي عز ما الحكومات قاعدة تعمل حملات 

لتحديد وتنظيم النسل بقالها سنين 

الوضع في القرن ال 18 كان كارثي 

واللي كان بيخلف 10 أطفال ده 

يا عيني عليه ، وحداني وملوش عزوة 

ومقطوع من شجرة .. 

لدرجة إن فيه واحدة ست مواليد 1707 

ولحد النهارده وهي محتفظة بلقب موسوعة جينيس

كأكثر ست إنجابًا في التاريخ .. 

واللي خلفت مش 10 ، ولا 12 ، ولا 15 طفل 

لا دي خلفت 69 طفل وطفلة وربتهم 

وعاشت معاهم لحد ما بقى عمرها 76 سنة 

دي قنبلة سكانية في حد ذاتها .. 

فالنتينا فاسيليفيا ، ست روسية اتولدت 1707

وعاشت لحد 1782 وخلال العمر ده كله اتجوزت مرة واحدة بس 

بس المرة دي كانت كافية تعمر قرية كاملة 

فالنتينا اتجوزت من فلاح روسي من مقاطعة شويا 

اسمه (فيودور فاسيلييف) ، وفي الفترة ما بين ١٧٢٥ ل ١٧٦٥ 

يعني من عمر ١٨ سنة لحد ٥٨ سنة خلفت ٢٧ مرة 

١٦ مرة منهم كانت بتخلف توأم 

٧ مرات كانت بتخلف فيهم تلات توائم 

و ٤ مرات كانت بتخلف ٤ توائم .. 

يعني شغل انها تخلف عيل والعيل يجي برزقه ده ما بياكلش معاها 

دي عايزة ميزانية دولة تصرف على عيالها 

وبناءًا على حسابات هيئة الإذاعة البريطانية bbc

فإن فالنتينا قضت من حياتها ١٨ سنة كاملين في فترة حمل 

ولأن ده صعب جدًا على أي ست 

فناس كتير كدبت الخبر ده تمامًا 

إلا إن (دير نيكولسكي) التابع ليه مقاطعة شويا 

أثبت الحالة الغريبة دي عن طريق 

إنه أرسل قائمة لموسكو في ٢٧ فبراير ١٧٨٢ 

بتثبت إن فيودور فاسيلييف زوج فالنتينا 

عنده ٨٢ طفل كلهم على قيد الحياة من زوجتين مختلفتين 

من فالنتينا ٦٩ طفل ومن زوجة تانية ١٨ طفل 

طبعاً قايمة زي دي قلبت الدنيا وانتشرت بياناتها في جرايد كتير جدًا 

تحت إسم (خصوبة إستثنائية) ، ومن ضمن الجرايد دي 

جريدة بانوراما سانت بطرسبرج 

واللي نشرت مقال عن الحالة دي سنة ١٨٣٤ 

المقال ده اللي قلب الدنيا وخلى علماء وأطباء كتير 

يحطوا فيودور وزوجته فالنتينا تحت الإهتمام 

علشان يعرفوا ايه سر الخصوبة دي 

والحقيقة إن القايمة اللي نشرها الدير دي معناها 

إن فيودور نفسه كزوج هو السبب في كل اللي حاصل ده 

واللي عنده خصوبة مفرطة ، وحالة تعد نادرة واستثنائية 

فتوجهت أنظار العالم كله لدراسة حالة فيودور 

علشان يوصلوا للأسباب اللي ممكن تكون خلت فيودور بالخصوبة دي 

هل نوع اكل معين ؟ أو نشاط وروتين يومي معين ؟

ولكنهم توصلوا في النهاية إلى إن السبب في ده 

هي عوامل وراثية مش أكتر ، بحيث إن فيودور نفسه 

كان أخ بين ١٧ أخ وأخت منهم ٥ توائم 

طب هل ده معناه إن فالنتينا واحدة ست عادية زيها زي أي ست 

طبعًا لأ .. دي ست دخلت في حالة ولادة ٢٧ مرة 

ومرت بكل مصاعب الحمل مش ٩ شهور 

لأ دي مرت بشهور حمل على مدار عمرها لمدة ١٨ سنة 

وبعد دراسة فالنتينا والبيئة المحيطة بيها 

اكتشفوا انها برضه عندها تاريخ وراثي من عيلتها 

اللي كانت مشهورة بالخلفة الكتير .. 

يعني سبحان الله ما جمع إلا اما وفق .. 

الجدير بالذكر إن فالنتينا وسط كل العيال دي 

خلفت طفلين ولم يتم تسجيلهم في السجلات الرسمية 

لأنهم ولدوا متوفيين .. 

فيودور وزوجته فالنتينا أكدوا لينا حاجتين مهمين 

أولهم إن مش كتر الخلفة هو السبب في الجوع و الفقر

بدليل اهتمام الحكومة الروسية بيهم 

واعتبارهم رمز للخصوبة الروسية .. وقدرة فالنتينا على تربية 

هذا القدر الكبير من الأطفال .. 

والحاجة التانية اللي اتعلمناها من قصتهم 

إن شباب وبنات اليومين دول بيتدلعوا .. وإن الدنيا صحيح اتقل خيرها 

إنت بقى ايه رأيك بعد ما سمعت قصة فالنتينا وعيالها ال٦٩ ؟

تفتكر الحل في تحديد النسل .. ولا تربية النسل بشكل سليم ؟