كيف بدأ الـ GPS ؟ الـ GPS نظام الملاحة الأقوى في العالم ، وسبب توهان شعوب كتير كيف بدأ التوهان ؟ أو الـ GPS ؟

كيف بدأ الـ GPS ؟

الـ GPS نظام الملاحة الأقوى في العالم ، وسبب توهان شعوب كتير 
كيف بدأ التوهان ؟ أو الـ GPS ؟

هو قالك فين ؟ … سؤال مشهور بيننا كمصريين 

وأول رد بنسمعه تقريبًا لما بنكون تايهين 

ولما يوصل بيك الحال إنك تنزل تدور بين الناس على حد يدلك 

إعرف على طول إن الـ GPS سوحك

وجابك ووداك ، ولففك حوالين نفسك 

طب هو إزاي بدأ التوهان ، أو الـ GPS ؟

Global Positioning System

أو نظام التموضع العالمي ، وهو نظام ملاحة عبر الأقمار الصناعية 

و بيقوم بتوفير معلومات عن الموقع والوقت 

في جميع الأحوال الجوية ، وفي أي مكان على الأرض 

طبعًا ما تستغربوش ، هو المفروض الـ GPS 

بيوفر الموقع في أي حتة وفي أي جو 

لأن فيه من 24 لـ 30 قمر صناعي متعلقين في الفضاء 

علشان يوفروا المعلومات دي بكل دقة ، إلا في مصر تقريبًا

بدأ الـ GPS في البداية معتمدًا على أنظمة ملاحة لاسلكية أرضية 

زي (لوران) ، وهو نظام إبحار طويل المدى 

ونظام إبحار ديكا ، واللي تم ابتكارها في الأربعينات في الحرب العالمية التانية 

وبعد ما انتهت الحرب العالمية 

بدأت الحكومة الأمريكية في إنشاء أول مشروع GPS 

في سنة 1973 بناءًا على دراسات هندسية سرية من وزارة الدفاع 

واللي طورت النظام في البداية بإستخدام 24 قمر صناعي 

وفضلوا شغالين عليه لمدة 22 سنة ، 

علشان يكون جاهز إنه يشتغل بكل طاقته للعامة والمدنيين 

في سنة 1995 ، وطبعًا واكب تأسيس النظام الأمريكي 

نظام تاني روسي إسمه (جلوناس) ، وتالت أوروبي إسمه (جاليليو)

ولكن أشهرهم ال GPS الأمريكي 

وبداية تطبيق أول نظام ملاحي كانت لأغراض عسكرية بحتة 

لمساعدة الجيش الأمريكي وحلفائه للتسهيل على 

الطائرات ، والسفن للوصول لأهدافها في أي طقس 

وفي أي أحوال جوية كانت .. وفضل إستخدام النظام 

لسنين بيساعد القوات خلال الحرب الباردة 

ولكنه كان أضخم بكتير من أن أي جندي مشاة يقدر يتحرك بيه 

وبعد نجاح المشروع في المجتمع العسكري 

وبعد ما انتهت الحرب الباردة ، انتشر تطبيق خاصية الملاحة 

في المجتمعات المدنية ، في العالم كله 

وبقى مفيش غنى عنه .. مش هو مسوحنا ؟ بس بنلجأله برضه 

وتوسعت إستخداماته بشكل كبير ، وبقى مهم جدًا 

مش بس للإرشاد على الطرق ، لا كمان في أنظمة بطاقات الإئتمان 

وأنظمة الصراف الآلي ، وكل شبكات الإتصالات 

والنهارده بضغطة زرار واحدة تقدر تشغله على موبايلك 

وده غير إستخداماته في مجال الجيولوجيا 

وعلم الجيوديسيا ، وهو علم تقسيم الأرض والمساحة 

ده غير إنه بيستخدم في قياسات التصدعات الأرضية وحركة القارات 

وطريقة شغل الـ GPS إن القمر الصناعي 

بيبعت إشارة بموقعه عليها توقيت دقيق جداً

للحظة إلتقاطه وبثه للصورة 

وبيعتمد على تحديد وقت التقاط الصور على ساعة ذرية 

ودي ساعة دقيقة جدًا بيصل مقدار الخطأ فيها 

لثانية واحدة كل 30 مليون سنة تقريبًا 

الله ؟ إمال لما هو دقيق أو كده .. إحنا بنتوه ليه ؟ 

الحقيقة لازم نعرف إن فيه فوارق في دقة نظام تحديد المواقع العالمي 

بين الإستخدام المدني والعسكري 

فالتطبيقات العسكرية أكثر دقة من الـ GPS اللي بيستخدموه المدنيين 

بفارق 4 أمتار تقريبًا .. وده ممكن يكون المبرر للأخطاء اللي بنمر بيها كل يوم 

بس معقول الـ 4 متر دول يعملوا كل ده ؟ 

يعني 24 قمر صناعي ، وشغالين بساعات ذرية 

والفرق بين النظام ده والنظام الملاحي العسكري بس 4 متر 

إمال إحنا بنتوه ليه ؟ 

الحقيقة ما أعرفش .. بس هو قالك فين ؟