بدأت على ظهور الخيل ، وانتهت بالدبابات .. الحرب العالمية الأولى كيف بدأت ؟ وكيف انتهت ؟

 

بدأت على ظهور الخيل ، وانتهت بالدبابات .. الحرب العالمية الأولى كيف بدأت ؟ وكيف انتهت ؟

أنهت حياة 8,5 مليون جندي 

و 13 مليون مدني وخساير مادية  قُدرت بـ 200 مليار دولار 

الحرب العالمية الأولى 

امبراطوريات ، وشبكة معقدة من التحالفات 

وظهور دول جديدة ، كلهم مستنيين شرارة 

تحرك نيران الحرب .. 

والشرارة كانت اغتيال ولي عهد النمسا ، الأرشيدوق (فرانتس فرديناند)

في 28 يونيو 1914 

واللي كان في زيارة هو وزوجته لمدينة (سراييفو) في جنوب النمسا 

عاصمة البوسنة على يد 6 أفراد من حركة البوسنة الشابة 

واللي كانوا من أصول صربية وشايفين إن البوسنة 

أرض الشعوب السلافية والمفروض يحكمها أهلها 

مش حاكم أجنبي جاي من النمسا ، وكانوا معترضين على النظام الحاكم كاملًا

فتآمروا الصرب على اغتيال ولي العهد النمساوي 

علشان يبعتوا رسالة للحكومة برفضهم لها 

وبالفعل نجحوا في اغتيال ولي العهد وزوجته 

وهو خارج بعربية مكشوفة علشان يحضر استعراض عسكري

الحدث ده قلب الدنيا وكان بداية لحرب من أضخم حروب التاريخ

لأن حكومة النمسا والمجر ما سكتتش 

وفي شهر 7 من نفس السنة 1914

أرسلوا تهديدات لصربيا وطالبوا بإنهم 

يحققوا بنفسهم مع أي جماعة مشتبه فيها في قتل الأرشيدوق

ولكن صربيا رفضت ده ، فأعلنت النمسا الحرب على صربيا فورًا 

وده اللي ما عجبش روسيا ، واللي بتربطها مع صربيا 

روابط سياسية وعرقية ودينية كمان

وبدأوا يدافعوا عن صربيا وبالفعل حركوا جيشهم ناحية الغرب للهجوم على النمسا

وبما إن فرنسا علاقتها قوية بروسيا في الوقت ده 

فقررت تنضملها في الحرب ضد النمسا 

وقبل ما فرنسا وروسيا يجهزوا جيوشهم 

كانت ألمانيا إنضمت لصف النمسا ، وأعلنت الحرب على فرنسا

فبدل ما يدخلوا الحرب مع روسيا في الشرق وفرنسا في الغرب 

لأ هما هيستغلوا الوقت الكبير اللي هياخده جيش ضخم زي جيش روسيا لحد ما يجهز 

وهيتجهوا ناحية فرنسا في الغرب فورًا 

في خطة إتعرفت بإسم (خطة شليفن) ، على إسم (ألفريد شليفن) القائد العسكري

لكن كان عندهم مشكلة صغيرة في الحرب على فرنسا 

إن الحدود بين فرنسا وألمانيا مُحصنة وصعب يمر منها الجيش الألماني بدون خساير جسيمة 

لكن لو عبروا من خلال بلجيكا ، شمال شرق فرنسا 

يقدروا يتفادوا النقاط المحصنة دي ، وأيام قليلة ويكونوا في قلب باريس

لكن هل بلجيكا هتسمح بمرور جيش ألمانيا في أراضيهم عادي كده ؟

كان رأي قيصر ألمانيا إن بلجيكا مش هترفضلهم طلب 

وخصوصًا إن الجيش الألماني قوي جدًا 

ولكن اللي حصل العكس تمامًا ، وبلجيكا رفضت مرور الجيش الألماني في اراضيها 

بل بدأوا في المقاومة والإشتباك مع الجيش الألماني 

ومش كده وبس .. ده إتضح إن بلجيكا موقعة على معاهدة دفاع 

مع مين بقى ؟ مع بريطانيا .. وبالتالي بريطانيا أعلنت الحرب على ألمانيا 

خلينا نقف هنا ونراجع بسرعة اللي فات ده كله 

رجال من حركة البوسنة الشابة قتلت ولي العهد النمساوي 

النمسا أعلنت الحرب على صربيا 

روسيا اتدخلت ووقفت في صف صربيا 

وأعلنت الحرب على النمسا 

وانضم ليها فرنسا ، فأعلنت ألمانيا الحرب على فرنسا 

وعلشان تهاجم فرنسا قررت تعدي من الأراضي البلجيكية 

فبريطانيا وقفت مع بلجيكا ، وأعلنت الحرب على ألمانيا 

 فبالشكل ده فيه فريقين .. فريق فيه روسيا وصربيا وفرنسا 

وعلى الجانب الآخر ألمانيا والنمسا وبريطانيا 

وفي النص بلجيكا اللي مُصرة ألمانيا تعدي بقواتها منها 

7 دول ، (الحلفاء) : فرنسا - إنجلترا - بلجيكا - صربيا - روسيا

ودولتين على الخريطة في المنتصف (دول المركز) : النمسا وألمانيا 

بالشكل ده بدأت الحرب العالمية الأولى 

الوضع دلوقت .. ألمانيا بتحاول تدخل بلجيكا وتمر لفرنسا 

قبل ما روسيا تحضر نفسها وجيشها 

لكن لاقت ألمانيا مقاومة قوية من البلجيك 

وروسيا على عكس المتوقع جهزت بسرعة ودخلوا بجيشهم شرق ألمانيا

وهناك في شرق ألمانيا الجيش الروسي دخل معركة إسمها 

(تاننبرج) ، وعلى عكس المتوقع برضه 

إن الألمان في المعركة دي سحقوا الروس 

بمعدل خساير 13 ألف جندي للجيش الألماني 

مقابل 170 ألف جندي من الجيش الروسي 

ومع إن الجيش الروسي في الوقت ده كان متطور جدًا 

إلا إن مشكلة واحدة اتكررت على مدار الحرب 

وكانت سبب في الهزيمة مرات كتير وهي (صعوبة وصول الامدادات)

واللي عانى منها الجيش الروسي في أول معركة له 

بعد المعركة دي كانت اخر معركة للجيش الألماني ضد روسيا

معركة بحيرات ماسوريان اللي قدر يطرد فيها الألمان الروس تماما من أراضيهم

ولكن في الجنوب شوية وضع الجيش الروسي ضد النمسا كان مختلف تماما

فقدر الروس يدخلوا اراضي النمسا في معركة (جاليسيا) بسهولة 

وخلوهم يتراجعوا والنمسا حاولت تدخل صربيا لكنهم انهزموا وتراجعوا عن الحرب

والمفروض بالقرار ده تكون الحرب انتهت 

الحرب اللي قامت في الأساس علشان النمسا تحارب صربيا 

هي نفسها تراجعت عنها .. ولكن برضه ده محصلش 

لأن في الجهة التانية من العالم ، فجأة بتقرر اليابان

انها تدخل الحرب ، وتنضم للحلفاء كنوع من التضامن مع بريطانيا 

طب هتساهموا في الحرب ازاي ؟ 

ببساطة كل اللي عملته اليابان انها احتلت مجموعة من الجزر 

بجوار اليابان كانوا تحت السيطرة الألمانية 

ودخلوا مع الألمان حرب واحدة وفازوا فيها 

نرجع لأوروبا بقى هنلاقي ألمانيا قدرت تحتل بلجيكا 

وكملت طريقها بالفعل لفرنسا 

ولكن وقعوا في الجيش البريطاني وقبل ما يدخلوا باريس 

دارت بينهم وبين الجيش البريطاني معركة مونس 

وخسروا فيها الألمان وتراجعوا 

وبعدها جهز الجيش البريطاني جيش ضخم جداً 

مكون من مليون جندي ودخلوا معركة مع الجيش الألماني 

اللي عدده ٩٠٠ ألف .. تخيل احنا هنا بنتكلم عن ٢ مليون عسكري 

في معركة من أكبر معارك العالم .. معركة (المارن الأول)

واللي استمرت ٦ ايام وانتهت برضه بسبب صعوبة وصول الدعم 

للجيش الألماني اللي انسحب بعد ما نتج عنها نص مليون جندي مصاب 

ولكن في طريق ألمانيا للإنسحاب قرروا يحفروا خنادق 

بجوار نهر آن وعلى الجانب الاخر الفرنسيين عملوا نفس الشيء 

والحرب هنا علقت لفترة طويلة 

مفيش حد بيتصاب من الناحيتين .. ومفيش حد بيستسلم ولا حد بيتقدم 

وعرفت المرحلة دي بـ (حرب الخنادق)

طبعاً في وسط كل ده .. كان للأساطيل البحرية كلمة 

ففي الوقت نفسه الحرب اتنقلت للبحر بين الأسطول البحري الانجليزي والألماني

في معركة (خليج هيليجولاند) وهنا ظهرت الغواصات كسلاح جديد 

لأول مرة يستخدم بدافع الحرب وانتصر في المعركة دي الجيش الألماني 

وقدروا بأسطولهم البحري وغواصاتهم 

انهم يحاصروا انجلترا لوقت طويل ويمنعوا عنهم السفن التجارية 

والدولتين ملوا البحر بينهم بالألغام .. 

في التوقيت ده كانت الدولة العثمانية بتتابع الحرب من بعيد 

هي وحاكمها الخديوي عباس حلمي الثاني 

بس ده ما فضلش وقت كبير 

لأن الألمان عرضوا على الدولة العثمانية الدخول في الحرب

مقابل انهم يساعدوهم في خروج الانجليز من مصر 

وبالفعل اشترت الدولة العثمانية من ألمانيا سفن حربية 

وهاجموا روسيا في معركة مهمة جدًا اسمها (غارة البحر الأسود)

وبكده دخلت الدولة العثمانية الحرب العالمية الأولى مع دول المركز

وكان ليها دور كبير مع الالمان في قفل المعابر المائية 

وقطع القمح الروسي عن بريطانيا 

واللي طبعاً ما سكتتش وبعتت لهم جنود من الهند واستراليا ونيوزيلندا

في حملة اسمها جاليبولي .. ولكنهم هزموا القوات المشتركة دي 

برضه ما سكتتش بريطانيا وبعتت قوات احتلت البصرة 

واتحركوا بالسفن بتاعتهم في نهر دجلة 

بهدف الوصول لبغداد ولكن قبل وصولهم لبغداد 

هجم عليهم الجيش العثماني ، واضطروا يتراجعوا لمدينة الكوت 

في معركة اتسمت (كوت العمارة) 

وهناك الحيش العثماني حاصرهم واجبرهم على الاستسلام 

وأسر منهم ١٠ آلاف جندي 

في الناحية التانية من العالم دخلت المانيا وانجلترا في حرب بحرية 

حول امريكا الجنوبية اسمها معركة (كورونل) بجوار دولة تشيلي 

كسب فيها الألمان .. ومرة تانية جنب جزر نوكولاند وكسب فيها الانجليز

وفي وسط كل ده .. كانت ايطاليا زيها زي دول كتير بتتابع من بعيد

ونفسها تشارك يمكن تكسب حتة أرض أو موارد

وبالتالي توجهت للنمسا وعرضوا عليهم ياخدوا جزء من أراضيهم 

مقابل انهم يساعدوهم في الحرب .. 

ولكن النمسا رفضت وعلشان ايطاليا ترد عليها 

انضمت لدول الحلفاء ، وهجموا على النمسا 

ولكنهم اتهزموا في معركة اسمها (كابوريتو) 

كل ده بيحصل في كل ركن في العالم 

ولسه المانيا وفرنسا عالقين في معركة الخنادق

فجمع الألمان كل قواتهم وقرروا يهجموا على فرنسا 

في هجوم قوي واحد .. واستهدفوا مدينة فرادان 

في معركة من أطول وأسوأ معارك الحرب العالمية الأولى

معركة استمرت ل ٩ شهور وبرضه بسبب الخنادق 

محدش منهم حقق حاجة 

في الغرب بقى رومانيا قررت تنضم للحلفاء 

وجارتها بلغاريا قرر تنضم لدول المركز وبدأوا يحاربوا بعض 

كمان اليونان عملوا انقلاب عسكري على الملك بتاعهم 

وانضموا للحلفاء .

وحرفيا العالم مقلوب وعدد دول كبير 

داخلين معارك في كل حتة في العالم تقريبًا 

لكن من وسط كل ده كان فيه وحش قاعد في مكانه 

بيتفرج من بعيد ومراقب كل الأوضاع وما بيشاركش 

الولايات المتحدة الأمريكية ، اللي من بداية الحرب أعلنت حيادها 

ولكنها كانت بتسلف الحلفاء كم هائل من المال 

وكانت الحرب العالمية الأولى سبب في انتعاش اقتصاد أمريكا 

فكان العالم كله بيحارب وهما بيتاجروا وبيعملوا فلوس 

سلاح ماشي ، أكل وشرب مفيش مشكلة ، مواد خام ياريت

المهم إنها ما تشاركش ، لكن بتسلف الحلفاء بفوايد ضخمة 

لكن من كتر ما المبالغ دي كانت كبيرة ، أمريكا خافت 

لأنه من الضروري من فوز الحلفاء علشان الفلوس دي ترجع 

وبما إن ألمانيا كانت مش عاجبها مساعدات أمريكا للحلفاء

فقررت تغرق السفن اللي خارجة من أمريكا 

ورايحة لبريطانيا بالمساعدات ، ومن ضمن السفن دي 

(سفينة لوسيتانيا) اللي غرقها قلب الدنيا 

وأحرج أمريكا وخلاها في موقف المجبرة على دخول الحرب 

كمان بعتت ألمانيا برقية سرية للمكسيك جارة أمريكا 

برقية كانت السبب في دخول أمريكا الحرب 

برقية (زيمرمان) ، اللي حرضوا فيها المكسيك على الحرب ضد أمريكا

مقابل إنهم يساعدوهم على استعادة أراضيهم من أمريكا 

زي (تكساس ، أريزونا ، و نيوميكسيكو) 

لكن اللي ماكانوش واخدين بالهم منه 

إن بريطانيا كانت بتتجسس على ألمانيا 

وعرفوا محتوى برقية زيمرمان ، وجريوا قالوا للأمريكان 

فأعلنت أمريكا الحرب على ألمانيا سنة 1917 

في الوقت ده وبسبب الهزائم الكتير 

والأزمات الاقتصادية قامت ثورة في روسيا بمساعدة ألمانيا 

أجبرت القيصر نيقولا الثاني على التنازل عن الحكم 

 وتركه لسلطة انتقالية ، وقيادة جديدة أعلنت الإنسحاب من الحرب 

وتراجعوا للخلف وخسروا جزء كبير من أراضيهم 

وأعلنوا السلام مع دول المركز في معاهدة إسمها 

(برست ليتوفيسك) في مارس 1918

وبالشكل ده ألمانيا ما بقتش مضطرة تقسم قواتها بين الشرق والغرب

وإتفرغت لإنجلترا وفرنسا ، اللي كانوا مستنيين أمريكا تنضم للحرب 

فكان أهم شيء لألمانيا دخول باريس قبل ما تجهز أمريكا 

فجمعت ألمانيا كل ما تمتلكه من قوات في هجوم إنتحاري 

واتقدمت ناحية باريس في ما يعرف بهجوم الربيع 

ولكن زي كل معارك ألمانيا وفرنسا .. إنتهت بالولا حاجة 

بسبب إيه يا ترى ؟ .. الخنادق 

وبعد أكتر من سنة من إعلانها الحرب 

وصلت أخيرا أمريكا لمنطقة الحرب 

وإدت شوية جنود للحلفاء .. أما رومانيا وقعت معاهدة سلام وانسحبت 

وألمانيا والنمسا قسموا الأراضي اللي خسرتها روسيا 

ولكن علشان من حفر لأخيه حفرة وقع فيها 

بدأت تحصل في ألمانيا ثورات بسبب الحرب 

والشعب الألماني إتأثر جدًا باللي حصل في الثورة الروسية 

وافكار الثورة الروسية الإشتراكية ، اللي ساعدت ألمانيا في إشعالها 

حاليًا بتحصل جواها .. 

حروب ومعارك وإستسلام ولسه أمريكا منضمة للحرب جديد وهتولع 

هوب .. يحصل اللي لا كان على بال ولا على خاطر حد

(الإنفلونزا الإسبانية) .. الجندي المجهول في إنهاء الحرب العالمية الأولى 

واللي أنهت حياة أكتر من 50 مليون بني آدم حول العالم 

وأعداد كبيرة جداً من جنود الدول اللي لسه بتشارك في الحرب العالمية الأولى

اللي كانت كل جيوشها منهكة تمامًا بسبب طول الحرب 

وأنهت حياة ناس كتير ، وكانت دافع كبير قدام الدول يخليها تتنازل عن الحرب نفسها

في التوقيت نفسه حصلت ثورات في جزيرة العرب ضد الدولة العثمانية 

وقدرت بريطانيا تسيطر على العراق ، وفلسطين 

وفي النهاية انسحبت الدولة العثمانية وقبلت السلام 

وبناءًا عليه كان عند انجلترا وفرنسا من القوة والجرأة 

إنهم يوقعوا إتفاقية سايكس بيكو 

واللي بتنص على تقسم أراضي الدولة العثمانية بينهم 

وأعلنت بريطانيا عن وعد بلفور ، اللي بينص على إقامة وطن لليهود في فلسطين 

ده غير كم الثورات اللي بقى في كل حتة 

النمسا وألمانيا ، لانهاء الحرب .. فطلبوا السلام 

إلا أمريكا اللي رفضت فكرة إنهاء الحرب 

إلا لما دول المركز يخرجوا قواتهم من بلجيكا وفرنسا وصربيا 

وبعد مفاوضات كبيرة أعلنوا وقف الحرب 

ووقعوا معاهدة السلام بين قوات التحالف وألمانيا 

في مؤتمر باريس للسلام سنة 1919 

أو ما تسمى بمعاهدة فرساي ، واللي حملت ألمانيا كل خساير الحرب 

بشكل ظالم ، ومثير للجدل 

ولقت نفسها مجبرة على دفع تعويضات ضخمة للمتضررين من الحرب 

نتج عن الحرب العالمية الأولى حاجات كتير 

من ضمنهم عصبة الأمم ، النسخة الأقدم 

من الأمم المتحدة .. ونتج عن معاهدة فرساي إنتهاء الحرب صحيح 

ولكن .. نتج عنها كمان ، شخص هيقدر يدخل باريس بعد كام سنة

ويتصور قدام برج إيفل .. شخص هيسيطر على دول كتير جداً 

أدولف هتلر ، في الحرب العالمية التانية .. لكن ده في مقال تاني