أغرب ما سقط من السماء

 أغرب ما سقط من السماء 

السنين اللي فاتت الجو كان متغير حبتين 

ومتقلب بشكل غريب ، فتلاقي أحيانًا الجو حر والدنيا بتمطر

وأحيانًا تانية تلاقي السما مغيمة ، وفجأة الشمس تملى الدنيا 

وفجأة السوشيال ميديا تتملي ببوستات من نوعية 

ألبس تقيل الجو يبقى حر ، أخفف تبرد ومحدش عارف راسه من رجليه 

لكن لو شايف إن ده غريب ومزعج 

فأحب أقولك إنت بتدلع ، لأن التقلبات المناخية دي 

واللي في بعض الأوقات من السنة بنمر بيها ولا حاجة

قصاد اللي هتسمعه دلوقت ، واللي هيثبتلك 

إن شوية المطر في الصيف اللي مستغرب منهم دول أمر عادي جدًا 

مقارنة بناس تانية ، الدنيا عندهم بتمطر سمك ، ودم وعناكب 

وأحيانًا فلوس كمان ، زي ما حصل في أماكن كتير 

زي سريلانكا ، واستراليا والمكسيك 

لما السما مطرت سمك فريش وصالح للأكل 

واللي بعد شوية بحث منهم ، العلماء قالوا رأيهم 

وقدروا يفسروا اللي حصل ده تفسير علمي ومنطقي تمامًا 

وقالوا إن دي ظاهرة تشبه الإعصار 

بتحصل في المناطق الساحلية بشكل كبير 

فبسبب العواصف بتتخلق ماسورة مائية ضخمة 

بتسحب من البحر كميات من المياه 

محملة بالأسماك وبعدها بترميها على مسافة بعيدة فوق اليابسة 

أهو منه مطر ومنه عشا ، كده كل واحد هياخد طبق رز وشوية سلطة 

ويطلع يقعد في الشارع ، عشانا عليك يارب 

كمان من أغرب الحاجات اللي وقعت من السما 

في حادثتين مختلفتين العناكب ، أيوه العناكب 

اللي وقعت بكميات مهولة مرة في استراليا سنة 2015 

ومرة في البرازيل سنة 2019 ، لما صحيوا السكان في يوم 

وبعد ليلة عاصفة وممطرة علشان يلاقوا الشوارع مليانة بالعناكب 

اللي إكتشفوا بعدها إنها نزلت من السما مع المطر 

والعلماء فسروا الظاهرة دي تفسير علمي ومنطقي وسموها (الإنتفاخ)

ودي بتحصل في بعض الأحيان لما بتحب العناكب تغير مكانها 

وتتنقل لموقع جديد ، فبتستغل العواصف 

وتنتج كميات من الخيوط تستخدمها لرفع نفسها في الهوا

علشان الرياح تنقلها من مكان لمكان تاني أبعد كنوع من الهجرة 

كمان من أغرب الحاجات اللي وقعت من السما وأجملها 

في سنة 1969 لما السما في قرية تشيستر في أمريكا 

مطرت قهوة ، وده بسبب مصنع قهوة وكريمة قهوة 

في ولاية كارولينا الجنوبية ، واللي بسبب 

مشكلة في فتحات التهوية في المصنع

اتسربت كميات كبيرة من مسحوق القهوة للهوا 

واختلطت مع السحب المحملة بالمطر ، واتحركت السحب دي 

لسماء قرية تشيستر علشان السما تمطر قهوة 

وتعمل أحلى ميكس ممكن تتخيله ، مطر وقهوة مع بعض 

كان ناقصهم فيروز بس .. يا بخت اللي وقف بفنجانه 

وزي ما كل حاجة في الدنيا دي أرزاق 

  فالمطر كمان أرزاق ، ففي واحدة من أغرب الحالات 

اللي مطرت فيها السما ، لما تفاجئ العمال 

في مطار (ماجان) الروسي بهبوط طيارة بشكل إضطراري 

بعد ما كانت في رحلة متجهة من مدينة (ياكوتسك) 

المنطقة المشهورة بإنتاج الألماس ، وفي طريقها لمدينة (كراسنويارسك) 

واللي كانت شايلة حمولة من الذهب والألماس والأحجار الكريمة 

بقيمة 370 مليون دولار ، ولسبب ما مش معروف 

إكتشف طاقم الطيارة إن حمولتها القيمة دي بتقع 

فنزلوا بسرعة في مطار (ماجان) علشان يلحقوا المصيبة دي 

الحكومة ساعتها قاضت مهندسين وطاقم الطيارة 

وقدرت تجمع من كل الكمية اللي وقعت 170 قطعة 

ربنا يعوض عليهم .. 

بعد ما سمعت عن أغرب الحاجات اللي وقعت من السما 

لسه مستغرب من موضوع المطر في عز الحر ؟