" جائزة نوبل للحماقة العلمية - I G NOBEL "

 

" جائزة نوبل للحماقة العلمية - I G NOBEL  "

طول عمرك حاسس بقلة تقدير من اللي حواليك ؟

وبتحسد الناس اللي ليل نهار بتتكرم في مجالات كتير 

وانت محدش عبرك بميدالية صفيح حتى ولا شهادة تقدير ؟

طب ما فكرتش مرة تنافس على جايزة نوبل ؟

طبعًا هتقولي إزاي .. وانت يا حسرة لا عالم 

ولا أديب ولا حتى مفكر 

لا .. أنا ما اقصدش جايزة نوبل اللي أخدها زويل ولا نجيب محفوظ

ولا حتى الرئيس أنور السادات 

أنا اللي أقصده هنا جايزة نوبل للحماقة العلمية

وجايزة نوبل للحماقة العلمية هي جايزة 

بتُمنح لأعمال الهدف منها إن الناس تضحك 

بس بعد ما تضحك تبدأ تفكر في قيمة البحث 

أو العمل اللي اتكرم بالجايزة دي .. 

وهل ممكن بحث زي ده يكون سبب في تطوير العلم ولا لأ ؟

وجايزة نوبل للحماقة العلمية اتمنحت لأول مرة سنة ٩١ 

وهي في الأغلب بتروح لأبحاث عديمة الجدوى

ملهاش لازمة يعني ، وبتقام مراسم تسليم الجوايز 

بنفس طقوس حفل جايزة نوبل الحقيقية بالظبط 

مع بعض الاختلافات البسيطة والطقوس المرتبطة بالحفل ده 

زي رمي الطيارات الورقية على الجمهور 

والفلوس المزورة ولكن بيحضرها ١٢٠٠ شخص 

وبتحظى بتغطية إعلامية كبيرة 

وبيتم بثها مباشرةً على كل المنصات سواء راديو أو تلفزيون ولا انترنت 

وبيتم ترتيب البحوث الفايزة بجوايز فيها من الأسوأ للأكثر سوءًا

ومن أغرب الجوايز نوبل للحماقة العلمية في السلام 

راحت لعلماء من الولايات المتحدة الأمريكية

لما اكتشفوا بعد عدة تجارب إن الدقن عند الرجالة 

بتقلل من قوة ضربهم على وشهم .. يعني ما طلعتش استايل بس 

وبرضه في مجال السلام ومن أغرب جوايز نوبل للحماقة العلمية

لما لجنة المسابقة كرمت حكومتي الهند وباكستان

لما اكتشفوا إن الدبلوماسيين في كل سفارة منهم 

بيقوموا في نص الليل يضربوا جرس السفارة التانية

ويجروا قبل ما حد يفتح الباب 

ومن مجال السلام لمجال الإقتصاد

لما فاز باحثين أوروبيين بالجايزة 

لما أثبتوا بأن درجة السمنة عند السياسيين 

مرتبطة بمستوى الفساد في الدولة 

وإن كل ما كان السياسي تخين .. كل ما كان فاسد أكتر 

ومن أغرب جوايز نوبل للحماقة العلمية

فوز بريطاني على بحث قدمه في كتاب 

بإسم (الرجل الماعز) لما عزل نفسه عن البشر 

لمدة ٣ ايام وقرر يعيش في مزرعة مفتوحة 

في جبال الألب مع الحيوانات لدراسة حياتهم 

وصمم لتجربته دي أطراف صناعية وزي خاص 

تخليه بيتحرك على ايديه ورجليه علشان الحيوانات 

ما تاخدش بالها إنه إنسان .. مش حيوان زيهم 

وغيرها وغيرها من أبحاث كتير اتكرمت 

على منصة نوبل للحماقة العلمية

يلا مستني إيه ؟ دلوقت جاتلك الفرصة 

إنك تاخد جايزة نوبل .. كل اللي عليك 

انك تدور على حاجة ملهاش اي لازمة 

بس ممكن تخلي الناس تفكر .. زي مثلاً

العلاقة الطردية بين عدد كومنتاتك على فيديوهاتنا 

وتحسين نفسيتك للأحسن 

لأنك لو خدتلك لفة في المقالات اللي فاتت 

هتنبسط .. صدقتي هتنبسط