عباس ابن فرناس أول من عرف الطيران

عباس ابن فرناس أول من عرف الطيران

أول حد حاول يخترع وسيلة للطيران في العالم 

واتهموه بالجنون وعاش بوصمة عار وتزييف للحقايق لسنين طويلة 

زيه زي علماء كتير مسلمين فرقوا في حياة البشر وأثروا في التاريخ 

ولكن كانوا دايمًا بيتعرضوا للتهميش

وخصوصاً لو ارتبطوا بحضارة كبيرة سيطرت على جزء من أوروبا 

لمدة ٨٠٠ سنة .. وهي حضارة الأندلس 

واللي خَّرَّجت للعالم علماء كتير جدًا اتبنى عليهم نظريات 

طورت البشرية بشكل كبير ووصلتها للشكل اللي احنا شايفينه النهارده  

العالم عباس بن فرناس اللي ‏البشر افتكروله الوحش وبس 

اتولد عباس بن فرناس  في مدينة روندا 

 في ملقا جنوب الأندلس -إسبانيا اليوم- سنة ٨١٠ 

اشتهر بمحاولته للطيران ، درس عباس بن فرناس الفلك والنجوم ،

 وعلوم الهندسة ، والموسيقى، وكمان علم الفيزيا . 

بدار الحكمة في بغداد  

و بدأ اهتمامه بالاختراعات من صغره 

 فكان بيحب يفكك الآلات ، و يركبها مرة تانية ،

والحقيقة إن حدود علمه ما وقفتش عند محاولة الطيران وبس 

   لأ ده  كتب كُتب كتير في علم الفلك ، والفيزياء ، والهندسة،

 و كانت أعماله ملهمة لـ ليوناردو دا فينشي نفسه 

كمان هو أول من إخترع صناعة الزجاج الشفاف من الرمل،

 وصمم ساعة مائية وسماها (الميقاتة) ، وصنع النظارات الطبية ، 

وقدم أول قلم حبر للبشرية ، و كان مخترع وطبيب ومهندس وشاعر،

 لكن للأسف الناس مش فاكرينله إلا محاولته للطيران

 وإصطدامه بالأرض وبيصفوه بالفشل 

 مع انه بالاختراع البسيط ده سبق العالم كله 

 وموضوع الطيران ده ماجاش معاه بين يوم وليلة 

لأ ده فضل يدرس فيه بإهتمام لمدة 23 سنة

 لحد ما صنع أول آلة للطيران سنة ٨٧٥ م

 من أجنحة من الريش المكسي بالحرير

وحضر لأول رحلة طيران مبنية على أسس علمية 

وكان عمره في الوقت ده ٧٠ سنة ،

 و انطلق في أول محاولة طيران ناجحة أمام الناس ،

محاولة طيران ناجحة .. مش فاشلة زي ما قالوا 

 غير أنه واجه صعوبة في الهبوط وده اللي خلاه يقع 

 ويصاب ببعض الكسور، والجروح لكن ما ماتش زي ما الناس قالت  

عباس بن فرناس مش بس كان عالم فذ ومخترع فاد البشرية  .. 

لأ ده كان كمان شاعر وواحد من أهم شعراء العصر الأموي

 ولكن ما وصلناش كتير من شعره 

بسبب عدم حفظه في دواوين والحفاظ عليه .  

 قدر عباس بن فرناس  يفيد البشرية ويساهم في تطورها 

وله الفضل في اختراعات كتير جدًا فرقت وبتفرق كل يوم في حياتنا 

لعند ما توفى سنة ٨٨٧ ميلاديّة في قرطبة وهو عنده 82 سنة 

يعني ما ماتش وهو بيحاول يطير وإن دي إشاعة زيها زي غيرها من كتير 

من الإشاعات اللي انتشرت لتشويه علماء المسلمين 

في الفترة دي من حكم المسلمين للأندلس ..

 

والأهم هنا إننا نعرف إن عباس بن فرناس كان من أحد أسباب 

وصول البشرية لعلم مهم زي علم الطيران 

 وإنه عاش بعد محاولة طيرانه ١٢ سنة كاملين 

عباس بن فرناس زيه زي علماء كتير 

وأبطال كتير ظلمهم التاريخ .. وكان ليهم بالغ الأثر في حياتنا

بعد ما سمعت حكاية عباس بن فرناس الحقيقية 

تفتكر كام عالم عربي ظلمهم التاريخ واختفى ذكرهم ؟