" أغرب حالات السرقة في العالم "

 " أغرب حالات السرقة في العالم "

سارق واي فاي م الجيران وفاكر انك جايب الديب من ديله 

وعيل ما جابتوش ولّادة ، وإنت أقصى عقوبة ممكن تطبق عليك 

انهم يغيروا الباسورد ويرتاحوا منك 

أحب أقولك إنك غلبان ، في زمن فيه ناس تسرق الكحل م العين 

تابع معانا علشان تعرف أغرب حالات السرقة في العالم 

وانت تشوف الحرامية اللي بجد .. 

١) من أغرب حالات السرقة في العالم 

سرقة بنك بسلاح الكورونا ، واللي حصلت

 في مدينة تورينو في إيطاليا ، لما إقتحم البنك 

حرامي عنده ٦٢ سنة وهدد الموظفين في البنك 

إنه هيكح في وشهم وينقل لهم عدوى فيروس كورونا 

لو ما سمعوش كلامه وادوا له اللي هو عاوزه 

واللي كان مبلغ بسيط جداً ٤٢٠٠ يورو 

وكان تهديده المضحك ليهم (لا تتحركوا وإلا سأصيبكم بكورونا) 

ومحدش مستغني عن عمره .. 

٢) الحالة التانية من أغرب حالات السرقة في العالم 

كانت لـ (جيه إل هانتر) واللي لقبوه باللص العجوز 

وده راجل كان عايش لوحده مكتئب بسبب موت مراته وابنه 

وكمان مفلس بسبب قرض خده م البنك وما عرفش يسدده 

والسبب ده اللي خلاه حاقد على البنوك بشكل غريب 

لدرجة إنه قرر يسرق تلات بنوك .. 

وبعد كل جريمة سرقة كان بيتمسك بكل سهولة 

ويقضي فترة حكمه ويخرج يحاول تاني ويتمسك تاني وهكذا 

لعند آخر مرة اتقبض عليه فيها وهو عنده ٩١ سنة 

ومات في السجن سنة ٢٠٠٤ .. الراجل ده كان عنده كمية عزيمة وإصرار

كان ممكن يحضر بيهم دكتوراه .. بس تقول ايه بقى ؟

٣) من أغرب حالات السرقة في العالم .. سرقة الشعر 

في مدينة ريو دي جانيرو و في يوم عادي جدًا ركبت (ميرنا مارشيه) الأتوبيس 

واللي كانت مميزة بشعرها الأسود الطويل الناعم 

وواضح كده انها كانت مهتمة بيه .. ركبت ميرنا الأتوبيس من هنا 

ونزلت من غير شعرها ، بعد ما اقتحم بعض اللصوص الأتوبيس 

وقرروا يقصولها شعرها الحلو ده علشان يبيعوه في السوق السودا 

واللي بيوصل سعره لـ ٢٥٠ دولار للخصلة الواحدة .. 

ركبت بشعرها يا عيني ونزلت زلبطة .. 

٤) سرقة كوبري مشاه .. ودي حالة من حالات السرقة 

اللي كسرت كل قواعد السرقة في العالم .. واللي أول قاعدة بينهم 

سرقة ما خف وزنه وغلى ثمنه .. في روسيا 

صحيوا السكان المحليين لقوا عمال ومهندسين

بيفكوا كوبري مشاه واللي وزنه ٥٦ طن 

بعد ما قدروا يقنعوهم بأنهم عمال من البلدية وهيفكوا الكوبري يصلحوه 

ويرجعوا يركبوه تاني .. وده اللي حصل .. بس مش بالظبط 

لأنهم بالفعل فكوه بس ما رجعوش .. 

٥) من حالات السرقة الأغرب لدرجة إن الشرطة فكرت إنه صاحب البلاغ بيهزر معاهم 

لما مواطن ماليزي بلغ عن سرقة بيته .. 

واحنا هنا ما نقصدش إن بيته اتسرق منه بعض الحاجات 

لأ .. هو رجع من رحلة صيد ما لقاش البيت كله بجدرانه 

بعفشه .. بأساسه وأكنه الأرض انشقت وبلعته .. 

ما انت اللي غلطان برضه يا أستاذ .. بعد كده لما تسافر تبقى تاخد بيتك معاك

٦) سرقة كلب حراسة ، من المعروف إن الناس بتربي كلاب الحراسة 

علشان يحموا بيوتهم من السرقة .. ده المعروف والمنطقي 

لكن اللي حصل في الهند خارج عن المألوف تمامًا

لما قرر بعض اللصوص يدخلوا بيت يسرقوه 

ولكن ماعرفوش يدخلوه بسبب الكلب .. فقرروا يصاحبوه 

ويسرقوه هو شخصيًا .. ده انت خسارة فيك الدراي فود

٧) من أغرب وأكبر حالات السرقة في العالم 

لما قرر ضابط بوليس أمريكي إنه يستغل خبراته 

في عمليات السرقة اللي بتتعرض عليه كل يوم بحكم شغله 

وبدأ رحلة سرقته للبنوك .. (أندريه ستاندر) الضابط الأمريكي 

المتخصص في قضايا السرقة والقتل 

سرق خلال ٣ سنين بس .. ٣٠ بنك 

ما شاء الله بمعدل ١٠ بنوك في السنة 

لعند ما اتقبض عليه سنة ١٩٨٠ واتحكم عليه بـ ٧٥ سنة سجن 

ولما اتخفف عليه الحكم بسبب تغيير القوانين ل ١٧ سنة 

قرر يهرب ورجع لنشاطه تاني .. السرقة

لكن المرة دي راح شبابه هدر لما اتقتل وهما بيحاولوا يقبضوا عليه 

بعد ما سمعت عن أغرب حالات السرقة في العالم 

تفتكر لو السرقة حلال وقانونية .. إيه أول حاجة هتسرقها 

ياريت تقولنا في الكومنتات

وما تنساش تاخدلك لفة في المقالات اللي فاتت.. هتنبسط