" طقس مناسب لتقديم الاستقالات وإنهاء العلاقات وارتكاب الجنايات " تخيل تبقى موظف شاطر وبتحب شغلك  زوج مخلص وصديق وفي وإنسان مسالم لا بتهش ولا بتنش  ويجوا شوية حر يخلوك على استعداد إنك تقدم استقالتك  وتطلق المدام ، وتنهي كل علاقاتك وعندك استعداد تام لإرتكاب الجرايم  كل ده بسبب شوية الحر .. خيلنا متفقين إن معدل درجات الحرارة اللي بنشوفه  اليومين دول غريب ومختلف تمامًا عن اللي متعودين عليه  ففي تصريح خطير للأمين العام للأمم المتحدة (أنطونيو جوتيريس)  قال إننا تخطينا مرحلة الإحتباس الحراري ووصلنا دلوقت  لمرحلة الغليان العالمي ، وإن التوقعات بتشير لزيادة درجات حرارة الكوكب  لنسب لم تصلها من قبل من بداية ٢٠٣٠  يعني الحر والفرهدة اللي حضرتك عايش فيهم دول  دول مجرد البداية ، ولسه الحر اللي بجد ما جاش  والأخطر في التصريحات دي إن موضوع الحر ده  مش مجرد شوية فرهدة وصهد وتلزيق  لأ ده كمان هيأثر على كل المجالات  وأهمهم الإنتاج الزراعي اللي هيقل بشكل كبير  بسبب زيادة درجات الحرارة ..  والحقيقة إحنا لما دورنا ورا موضوع الحر ده اكتشفنا  إن درجات الحرارة مش بس بتأثر على الانتاج الزراعي  لأ دي كمان بتأثر بشكل كبير في معدل انتاجية الفرد نفسه  وإن الحر يعتبر سبب كافي جدًا لتقديم الاستقالات وانهاء العلاقات  وارتكاب الجرايم والجنايات ..  مديري العزيز ، نظرًا لما تمر به البلاد من حر وصهد  وبما اني كائن شتوي لا أحتمل كل هذه المرمطة في الحر  فأرجو أن تقبل استقالتي ..  الغريبة بقى إن درجات الحرارة العالية دي  مش بس بتأثر على الانتاجية ومعاها بترتفع  أعداد الاستقالات والمرفودين بسبب التارجت اللي ما بيتحققش  لا كمان اكتشفنا انها بتأثر على العلاقات  سواء صداقة أو حب أو جواز  فبما إن محدش طايق لحد كلمة فبترتفع بشكل كبير معدلات الطلاق  في شهور يونيو ويوليو وأغسطس بنسبة كبيرة عن باقي السنة  فعلى حسب مركز التعبئة والأحصاء المصري  فإن معدل حالات الطلاق في مصر بيصل سنويًا لـ ٣١٠ ألف حالة  نسبة ٦٥٪ منهم بيتموا في شهور الصيف  وبيقل المعدل ده بشكل كبير من بداية شهر أكتوبر لشهر مارس  وكل ده بسبب معدل العصبية المفرطة والتوتر الدائم  وارتفاع ضغط الدم ، وعدم التوازن النفسي اللي بيزيد في الصيف عن الشتا  الغريبة بقى إن فيه دراسة نُشرت في صحيفة   الألمانية بتقول Plose one إن بناءاً على دراسة على أكتر من ٦٠٠ مشارك  اكتشفوا إن الستات بتشتغل بشكل أفضل في الحر  أيًا كان تفضيلهم الشخصي للصيف عن الشتا أو العكس  وقال الدكتور (توم تشانج) الباحث في كلية مارشال للأعمال  في جامعة جنوب كاليفورنيا إن الدراسة أثبتت إن الستات  أكبر قدرة على التكيف مع الحر وإنهم بيزيد معدل نشاطهم العقلي واللغوي مع الحر والحقيقة إن المعدل العقلي ده مش مشكلة كبيرة  قد ما زيادة المعدل اللغوي هي اللي ممكن تكون سبب في الطلاق يعني لو جينا قارننا بين الراجل والست في عدد الكلمات اللي بيقولوها على مدار اليوم  هنلاقي إن الستات بيقدروا يتكلموا ٢٠ ألف كلمة في اليوم الواحد مقارنة ب ١٣ ألف كلمة للراجل بس  والمعدل ده بيزيد مع الحر .. ودي حاجة كفيلة تخلي أي راجل حران يطلق مراته فبعد ما سمعت عن كل المصايب اللي ممكن يسببها الحر تفتكر إيه الحل الأمثل علشان تعيش في سلام وتلزيق في نفس الوقت ؟