" اخطر العاب الملاهي في العالم ! "

 " اخطر العاب الملاهي في العالم ! "

كلنا في العيد بنحاول نجدد على قد ما نقدر

 ونخرج خروجات عمرنا ما خرجناها قبل كده 

ونعمل حاجات مختلفة عن اللي اتعودنا عليه 

في الأيام العادية .. فتلاقي مننا اللي بيأجر موتسيكلات

ومننا اللي بيستنى صلاة العيد تخلص علشان يفرقع بومب وصواريخ

وأهو أي حاجة تعلي الأدرينالين وتحسسنا بالأجواء 

وعلى ذكر الأدرينالين ، فأكتر حاجة ممكن تعملها 

تخلي مؤشر الأردرينالين عندك يضرب في السما 

إنك تروح ملاهي .. يعني تركب الصاروخ

ولا تدخل بيت الرعب .. 

لكن لو متخيل إن الملاهي اللي انت بتروحها دي

تتسمى ملاهي ، تبقى غلطان 

غلطان وطيب وما تعرفش حاجة 

لأننا في الفيديو ده جبنالك أخطر ألعاب ملاهي في العالم

ودي بقى ما تخليش الأدرينالين يضرب في السما 

لأ دي كفيلة تخليك انت شخصياً في السما .. يلا شد الحزام 

والبس الخوزة واتشاهد وتابع معايا للآخر 

أول لعبة ومن أخطر ألعاب الملاهي هنلاقيها في الصين 

اسمها سلاينج شوت .. ودي عبارة 

عن كرة حديد مربوطة بأسلاك مطاطية

و فيها كرسي حضرتك بتقعد فيه والمفروض انه متأمن 

ومجرد ما حضرتك تقعد وتشد الحزام وتشاور للراجل وتقول تمام

تلاقي نفسك في أجزاء من الثانية

على ارتفاع ١٠٠ متر ، في رحلة سرعتها ١٦٠ كيلو متر في الساعة 

وتفضل توديك وتجيبك كده لعند ما تقول إن الله حق 

وتنزل وتحلف مش هترجع هنا تاني 

تاني لعبة بقى من الأخطر في العالم 

المرة دي من ولاية فلوريدا الأمريكية

لعبة ساميت بلاميت (summit plummet)

ودي عبارة عن جبل جليدي ارتفاعه ١٢ دور 

يعني تقريبًا ٤٠ متر .. وحضرتك بتقعد على قمته

فوق زلاجة وبيزقك حد برضه علشان تنزل من فوق الجبل

بسرعة ١٠٠ كيلو متر في الثانية .. وإنت ونصيبك

وطبعاً لأن الإنسان بطبعه طماع 

فما اكتفوش بالتزلج من فوق جبل 

لأ دول عملوا لعبة تزلج مائية بتمر في وسط القروش كمان 

ودي اللعبة التالتة الأخطر عالميًا 

لعبة leap of faith water slide shark

واللي بيقولوا عليها قفزة الثقة

ودي مكانها في جزيرة أطلانتس أحد جزر البهاما

وهي عبارة عن أنبوب حضرتك بتقعد فيه 

وتنزل من فوق منحدر عمودي فتلاقي نفسك

بسرعة البرق بين أسماك القرش طاير وسطهم 

أكنك واحد منهم .. 

وعلشان المجانين كتير في العالم 

فقرروا بعض المغامرين اختراع ألعاب خطيرة 

بأقل إمكانيات الأمان الممكنة .. علشان يحس اللاعب بخطر حقيقي 

زي لعبة كرسي الوفاة في نيوزيلندا

عاشت الأسامي والله .. ودي عبارة عن كرسي بلاستيك

عادي خالص .. حاجة كده شبه كراسي المصايف الرخيصة 

حضرتك بتقعد عليها فوق قمة جبل ارتفاعه ١٠٠ متر بس 

وضهرك للوادي ويربطوك للكرسي بشكل آمن 

وبحبل طويل .. ولسه هتقول أشهد أن لا إله إلا الله 

يزقوك من فوق في الهواء الطلق

ويسيبوك لعند ما تهدا حركة الحبل تمامًا 

ويسحبوك فاقد الوعي ولو واعي فتأكد إنك هتلبس قضية سب وقذف

طبعاً الناس في الدنمارك معجبهاش الحوار ده 

وقالك لا .. ده لعب عيال احنا هنعلي عليهم 

فعملوا لعبة برج السماء واللي ارتفاعه ٣٥ متر تقريبًا 

وفكرتها ببساطة إن حضرتك بتطلع فوق البرج 

بكامل ارادتك وبيربطوك بحل جامد ويأمنوك كويس 

ويخلوا ضهرك للأرض .. وبعد ما تحس بالأمان 

يروحوا فاكين الحبل وسايبينك تقع لوحدك كده 

بدون أي معايير .. إلا من شبكة قريبة من الأرض 

بتستقبلك علشان تقلل من اصطدامك .. 

ودي بتعلمك ما تثقش في أي حد 

حتى لو كان هو اللي رابطلك الحبل بنفسه 

فلو عايز تعيد بشكل جديد 

وبتدور على مصدر الأدرينالين بصحيح 

توكل على الله وزور أي مكان من الأماكن دي

وكل سنة وانت طيب .. بس ابقى طمننا عليك