جرائم لا يعاقب عليها القانون "الجزء ثاني"

  

جرائم لا يعاقب عليها القانون "الجزء ثاني" 

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

أهلاً بيكوا مرة تانية في مدونتكم ، وموضوع مقالنا النهارده

تكمله للحلقه اللي فاتت والجزء الثاني من جرائم لا يعاقب عليها القانون 

واللي اتكلمنا فيه عن اربع جرايم ما تعرفش تاخد من مرتكبهم

 لا حق ولا باطل ولا تشتكيه ولا تحبسه 

ولا حتى تعرف تقعده في قعدة عرب 

واتكلمنا عن أربع جرائم في الحلقة اللي فاتت

 المعايرة والشماته .. تكسير المقاديف.. النميمة .. نكران الجميل 

في الحلقة دي هنكمل وبرضه زي ما قلنا 

إن الجرايم دي ما نقدرش نحصيها بس بنقول

 كفاية عليها جزأين ، مع جرائم لا يعاقب عليها القانون

 ويلا بينا نبدا على طول

الجريمة الأولى : إثارة الفتنة 

واثارة الفتنة جريمة كبيرة لدرجة 

إن الرسول عليه الصلاة والسلام قال

 إن الفتنة أشد من القتل .. تخيل يا عديم الدين

 إنك لما توقع بين اتنين أشد من انك تقتلهم

 اتنين صحاب زي الاخوات .. الدنيا بينهم ماشيه كويسة جداً

 وبيحبوا بعض وبيقدروا بعض ، وفجأه .. ما عدوش طايقين بعض

 والاتصالات بينهم اتقطعت ، وما حدش فاهم ليه 

ولما تيجي تسأل كل واحد منهم يقولك ، قال عليا كلام 

تسأل التاني تلاقيه بيقولك قال عليا كلام تاني .. وهكذا

 وكل ده بسبب مجرم دخل في وسطهم فركشهم 

وجريمة اثارة الفتنة بتحتاج كذا عنصر 

علشان يتقال عليها إنها جريمة كاملة ..

 أولاً ، شويه إبداع .. يعني الحد اللي وقع بين الاثنين دول

 قعد لده سمع له ، وقعد مع ده سمعله ، وعنده الابداع 

انه ياخد كلام ده ويغير فيه .. وياخد كلام ده ويزود عليه

 وينقل كلام ده لده والعكس .. مع الزيادات 

وثانيهم لازم الموضوع ده يتم بشكل غير مباشر 

يعني ما ينفعش يروح يقول لواحد منهم 

إنه فلان كان بيغلط فيك .. لا هو يلف من بعيد كده ،

 زي ما بيقولوا من ورا التريلات 

فأول ما يقعد مع واحد منهم يرميله كعب كده 

ويقول له هو فلان كان قاعد قافل وشه ليه ؟ شكله زعلان منك في حاجة

 فيقوله عمري ما زعلته مثلاً .. يروح للتاني يقوله

 ما شاء الله ربنا يبارك لك في صاحبك علان

 بيقول عمره ما زعلك في حاجة وأي حاجة بتطلبها منه يعملهالك 

شوف زود جمله واحدة بس ، فالتاني يقوله

 كل حاجة زي ايه ؟ عمري ما طلبت منه حاجه ، يروح للأولاني 

يقوله ، ده بيقول عمره ما قصدك في حاجه اصلا ، ومش محتاج منك حاجه 

زود جملة برضه .. وهكذا .. لعند ما يخسرهم بعض 

ثالث عنصر بقى لازم يكون موجود ومتوفر

 وجود مصلحة هيستفيدها الشخص الدخيل ده من فراق الاتنين

 يعني بيستفيد أو بيستغل واحد منهم والتاني قاطع عليه 

أو حتى فايدة معنوية واللي ممكن تكون أنه مش مرتاح

 طول ما الاتنين دول مبسوطين مع بعض

 وأشهر حالات إثارة الفتن بتحصل بين البنات وبعضها

 تبقي باعته صاحبة عمرك لخطيبك تصالحكم على بعض

 وهوب الموبايلات تتقفل .. وتلاقيهم تاني يوم مش مخطوبين

 لأ دول متجوزين ، ومعاهم زياد خمس سنين ما شاء الله

 بيدوروا له على حضانه كويسه يدخلها 

وانتي لسه مستنيه صاحبتك ترجع تقول لك حصل ايه

الجريمة الثانية : الزر 

والزر جريمة من الجرايم البشعه .. اللي المفروض تتصنف 

من جرائم القانون الاداري ، لأن مكانها المكاتب والاشغال

 والزر له مسميات كتير منها الأسفنه ، والأمرزه .. وغيرها 

والمقصود بيها إن حد يوقع زميله في شغله 

علشان يعرضه للرفد او إنه تتحط عليه العين 

فيعيش متكدر ويكره الشغل مع الوقت 

والزر أحيانًا مش محتاج منك انك تقصر في شغلك 

كضحية قد ما هو محتاج إنك تتكلم بس

 مجرد تتنفس في المكتب مع حد من زمايلك 

وليكن مثلاً .. تقول الجو هنا حر قوي ، جملة زي دي 

كافية انها تطلع لفوق بنفس التسلسل الإداري

 لعند ما توصل لرئيس مجلس الإدارة

 انك مش طايق المكان ، وناوي تولع فيه 

وتلاقي عندك تاني يوم تحقيق في الشؤون القانونية

 والزر من الحاجات اللي بتعلم الإنسان

 وبتعلم عليه اكتر من الشغل نفسه 

بتعلمه مهارة مهمة جداً .. وهي ، إنه يعرف يقعد ساكت 

وما يتكلمش لا بخير ولا برضي ، لا بحلو ولا بوحش 

وده في حد ذاته بيعلي الإنتاجية بشكل كبير

 لأنه بيخلي كل واحد في حاله ، فبيشتغل بتركيز أعلى وأكبر

 وزي ما فيه مثل بيقول ما يقعش إلا الشاطر 

ده بينطبق برضه على الموظف المزرور 

لانه ما بيتزرش إلا الشاطر برضه 

يعني معنى انك انزريت و حد بيحاول يأذيك في شغلك

 انك حد شاطر ومميز ، بس طولة لسانك 

ممكن تخليك تخسر شغلك

 وتقعدك في البيت تشحت انت والمدام 

وابقى خلي شطارتك تنفعك

الجريمة الثالثة : سيف الحيا

 والجريمة دي متوفرة جداً في مجتمعاتنا العربية

 ومعناها ببساطة إنك تحلى في عينك حاجة

 عند حد من صحابك ، فتطلبها منه .. فيقولك 

طبعاً يا حبيبي ، ما تغلاش عليك .. بس لما تيجي تدور

 تلاقيه قالك كده ، علشان اتكسف يرفض أو يقولك لأ 

وأنت تبقى عارف إنه ممكن يكون اتكسف منك

وبرضه تاخدها .. هو ده اللي إسمه .. سيف الحيا

 وسيف الحيا من الجرائم البشعة لأنها قايمة على مبدأين 

الأول ، خجل الضحية وأدبه .. وتربيته الحلوة

 اللي منعته يحرجك ويقولك لأ 

وثانيهم بجاحة المجرم .. اللي شاف بعينه الراجل اللي قدامه

 مؤدب مش يعامله بقى بالمثل ويرتجع لأ 

ده زودها وقال مش هو محرج

يخبط دماغه في الحيط .. يشرب من البحر

وعلى رأي المثل ، يعيش البجح على قفا المكسوف 

الجريمة الرابعة : التناكة 

والتناكة جريمة غير مبررة تماماً 

 لأن إحنا كبشر اتولدنا عريانين ، وهنموت عريانين 

كل اللي ف النص ده فاصل ولا هيميزنا في حاجه 

ولا هيقل مننا في حاجه .. إلا بقى لو مننا مجرمين

 وناس بنت ناس ، وناس تانيه بنت كلب

 والتناكة ما بتتولدش مع البني آدم اللي اتولد عريان ده 

خالص .. ده هي حاجه في التربية ،

 تلاقي عيل لسه بيلبس بامبرز أهله بيقولوله 

إنت أحسن من فلان وعلان .. انت أحسن من الكل

 ليه ؟ ليه يا حاجه ؟ احسن من الكل في ايه ؟

 هو بيعمل في البامبرز ماس ولولي ؟

وبيفضلوا يملوا دماغ الولا بالكلام ده 

لعند ما يكبر وهو مقتنع انه اتخلق من نار

 والبشر مخلوقين من طين .. والمصيبه السودا

 لو كبر الواد ده واتحط جنب اسمه حرف د ولا م 

ولا بعد اسمه كلمة باشا ولا بيه .. يا لهوي على الافترا

 اللي هيمارسه على الناس .. هتلاقي مسلسل الوسية بيحصل بحق وحقيق 

والمصيبة الأكبر من كده ، انه لما يكبر 

وما يتحطش ورا اسمه ولا قبل اسمه حاجه خالص

 ويصطدم بالواقع ، ويلاقي نفسه تافه وما لوش أي لازمة

وما طلعش أحسن من الناس ؟ ولا حتى زي الناس

 ده  اقل منهم .. ممكن ينتحر فيها ولا يتجنن 

 بس ايًا كان ، كلنا عارفين ان التناكه لولاد .. وشكراً

وغير الجرايم اللي ذكرناها في المقالين .. فيه جرايم تانية كتير 

زي الكدب .. وقلة الذوق .. والبوز الطويل

والنكد اللي عمال على بطال 

وتقليب جيوب الازواج وغيرها كتير قوي 

لكن أكبرهم وافظعهم .. انك تتفرج على الحلقة دي 

من غير ما تعمل لايك ولا تشترك في القناة 

علشان يوصلك كل جديد .. وتشاركنا رأيك في الكومنتات

وبكده تكون انتهى مقال النهارده