" مباريات تؤدي للطلاق .. لو جوزك بيحب الكورة تعملي إيه ؟! .. نصائح للأزواج "

 " مباريات تؤدي للطلاق .. لو جوزك بيحب الكورة تعملي إيه ؟! .. نصائح للأزواج  "

بتحضري شنطتك علشان تسيبي البيت 

بدل ما تقفي على الطلاق إنتي وجوزك 

بسبب الماتشات الكتير الجاية ؟ 

ما تبقيش خايبة واتفرجي على الحلقة دي 

علشان جهزنالك انتي وجوزك أهم النصايح 

الواجب اتباعها وقت الماتشات 

شهر يونيو الحالي فيه أربع ماتشات مهمين جدًا

نهائي كاس الاتحاد الانجليزي بين مانشستر سيتي ومانشستر يونايتد

ذهاب نهائي أبطال أفريقيا بين الأهلي المصري والوداد

نهائي أبطال أوروبا بين انتر ميلان والسيتي 

وماتش العودة لنهائي ابطال أفريقيا بين الأهلي والوداد

يعني لو جوزك أهلاوي وبيشجع أي فرقة تانية

من الفرق الاوروبية اللي اتكلمنا عليها 

فهيفضل طول الشهر ده متوتر والجو هيبقى في البيت مكهرب 

وبالتالي قدامك حل من اتنين ، يا إما تسيبيه ينزل 

يتفرج على الماتش في القهوة .. وتقصري الشر 

وتتابعي الاخبار من بعيد علشان تعرفي النتايج 

ففي حالة الفوز اعملي فرح في البيت 

وفي حالة الهزيمة لا قدر الله اقطعي النفس وشوفي حتة تداري فيها 

يا إما توفريله الجو المناسب في البيت 

علشان يفضل قاعد معاكي ويتفرج على الماتشات دي تحت عينك 

والجو المناسب ده له شوية إجراءات كده 

أولهم ، إحبسي العيال في اوضة كاتمة للصوت 

أو نزليهم عند الجيران علشان ما يرميش عيل من البلكونة 

ويرمي عليك اليمين بعده 

ثانيًا ، حضري كرسي مريح قدام التلفزيون 

وترابيزة عليها قزازة ماية مشبرة وكوباية شاي 

سكر بره .. علشان هو مش هيبقى فايق يقول 

لا ده مسكر لا ده ماسخ والكلام ده .. ولو هو مدخن 

تحطيله طفاية نضيفة ويبقى كتر خيرك 

واعملي حسابك ان ده مشروب الشوط الأول بس 

الشوط التاني ابقي اعملي شوية عصير 

بس شغلي الخلاط بين الشوطين .. وانجزي 

ثالثاً بقى وده مهم جدًا .. إمنعي الفرك والحركة 

الراجل مش ناقص توتر وخيلة 

كفاية عليه اللاعيبة اللي مطلعة عينه 

رابعًا بقى ، اركبي الموجة.. يعني لاقيتيه بيعترض ع الحكم 

اعترضي .. بيشتم لاعيب اشتمي وابقي استغفري ربنا بعدها 

بس بكلمة واحدة بس .. اوعي تزايدي عليه 

خامسًا ، إمنعي الأسئلة الغبية .. يعني مش تبقي 

شايفة الراجل واقف على ضوافره بيتفرج على هجمة 

وتسمعي كلمة أوف سايد .. تقومي مجرورة من لسانك 

وتسأليه يعني ايه اوفسايد .. مش وقته 

إعملي سيرش ولا اتصرفي ولا مش لازم تعرفي اصلاً

خلص الماتش على خير بمكسب هتبقى ليلة جميلة والنفسية في السما 

خلص بهزيمة لا قدر الله اعملي حسابك 

تسيبيه من غير ما تتكلمي معاه كلمة ساعتين بالظبط 

وما تطلبيش منه حاجة .. لا فلوس ولا كلمة حلوة 

ولا مساعدة في حاجة .. وعدي ليلتك .. وفرجيه معاكي على الفيديو ده 

وما تنسوش انتوا الاتنين تاخدلكوا لفة في المقالات اللي فاتت

هتنبسطوا ..