" من غير زحمة ولا تكاتك .. تعرف على البلد الأكثر فراغًا في العالم .. الأرض الخضراء "

 " من غير زحمة ولا تكاتك .. تعرف على البلد الأكثر فراغًا في العالم "

زحمة .. دوشة .. كلاكسات .. مخالفات 

صدااااااع .. خلاص جبت أخرك 

ومش مستحمل التفاصيل الكتير اللي حواليك ؟ 

إيه رأيك في رحلة لمكان هادي تفصل فيه من كل الدوشة دي ؟

من البلد الأكثر فراغًا في العالم (جرين لاند) .. أو الأرض الخضرا 

وتعتبر جرين لاند أكبر جزيرة في العالم 

ومساحتها ٢ مليون و ١٦٦ ألف كيلو متر مربع

وأغلبها مكونة من الجبال الجليدية والشلالات 

مساحة كبيرة جدًا بس فاضية .. تمامًا 

وبتغطيها أكبر رقعة جليدية ثابتة في العالم بره القطب الجنوبي

موقع جرين لاند بين المحيط المتجمد الشمالي والمحيط الأطلسي 

و هي تقسيم ذاتي الحكم داخل مملكة الدنمارك 

وبرغم مساحة جرين لاند الضخمة 

إلا إن عدد سكانها لا يتعدى الـ ٥٧ ألف بني آدم

عايشين في المساحة المهولة دي لوحدهم 

يعني تقريبًا قد عدد سكان حي بولاق في القاهرة 

واللي سكانه بيعيشوا في مساحة ٦ كيلو متر مربع بس 

وبالتالي تعتبر جرين لاند هي المنطقة الأقل كثافة سكانية في العالم

فلا هتلاقي هناك زحمة .. ولا إشارات مرور 

ولا دوشة ولا طوابير .. ولا سايس بيركنك صف تاني 

لأنك مش لاقي ركنة .. 

وسكان جرين لاند غالبيتهم من (الإنويت) ودي قبيلة 

هاجر أجدادها من ألاسكا ، ومتمركزين على 

الساحل  الجنوبي الغربي للجزيرة 

وتلت السكان تقريبًا عايشين في العاصمة نيوك 

وللوهلة الأولى على سكان جرين لاند هتحس انهم أسيويين 

بسبب شكل عينيهم الضيقة ، ولكن هما من سكان أوروبا 

والسبب ورا عينيهم الضيقة دي تطور چيني حصلهم 

على مدار آلاف السنين ، بسبب التلج 

واللي لو مشيت فيه يوم كامل هيسببلك حالة اسمها عمى التلج 

بسبب انعكاس آشعة الشمس من التلج على عينيك 

فمع تطور الأجيال ، اتولدوا بجزء اضافي فوق العين لحمايتها

وده اللي بيخليك تحسهم أسيويين .. 

جرين لاند فيها أكبر حديقة وطنية في العالم 

واللي مساحتها ٩٧٢ كيلو متر مربع 

يعني مساحتها أكبر من دول كتير جدًا في العالم 

ومع إن جرين لاند تابعة للدنمارك إلا إنها أكبر منها في المساحة ٥٠ مرة 

والرياضة الوطنية في جرين لاند كرة القدم 

بس للأسف هي مش عضو في الفيفا 

وطبعاً بما إن التلج بيغطي أغلب مساحة جرين لاند 

فده معناه إن الجو هنا برد .. برد قوي كمان 

فلازم تعمل حسابك في لبس تقيل علشان تعرف تعيش 

وجرين لاند سجلت أقل درجة حرارة ليها في سنة ٥٤

وكانت حوالي ٦٦ درجة مئوية

جرين لاند مكان يستحق الزيارة لأن أهله ودودين جدًا 

وهتحس هنا بهدوء مش ممكن تحسه في أي مكان تاني 

إلا إنك هتواجه مشكلة صغيرة خالص 

وهي إنك هتضطر تسافر لمدة ٨٠ ساعة تقريباً

يعني هتضيع الاجازة كلها في السفر

لكن لو حابب فعلاً تفصل من الزحمة اللي حواليك 

فهي أهدأ مكان ممكن تلجأله

بعد ما عرفت عن جرين لاند .. البلد الأكثر فراغًا في العالم

قولنا على ٣ حاجات هتاخدهم معاك 

وانت في طريقك لجرين لاند 

وياريت تاخدلك لفة في المقالات اللي فاتت.. هتنبسط