أغرب الوظائف في العالم .. لن تتخيلها

فرحان بشغلك الجديد وحماس البدايات جواك هيكسر المكتب ؟ 

يلا شباب بقى .. ما احنا كنا شباب برضه .. ولا ايه ؟ 

أحب أقولك إنك مع الوقت هتزهق 

زيك زي غيرك بالظبط .. وهتبدأ تدور على بديل 

بديل يتوفر فيه المعادلة الصعبة (شغل مريح + أجر مجزي) 

المعادلة دي اللي عمرها ما اتحققت 

إلا في حالات قليلة ، وده اللي هكلمك عنه النهارده

مع أغرب وظايف العالم .. 

والوظيفة الأولى من إنجلترا واللي مشهورة بإسم 

مدفئ السرير .. وده راجل وظيفته انه ينام 

في السرير علشان يدفيه قبل وصول الضيف للغرفة 

والراجل اللي بيشقى ده بياخد على الوظيفة دي 

٢٤ ألف دولار في السنة .. كلام فارغ 

وأظن إنك عندك خبرة فيها كبيرة .. دي حاجة كل يوم كلنا بنعملها ..

الوظيفة التانية بقى لمحبي الحيوانات وخصوصاً القطط 

بعض الدول الأوروبية بتعين للمياو معالج نفسي 

علشان ما يجلهومش اكتئاب .. وده راجل راتبه السنوي 

بيتخطى الـ ٣٥ ألف دولار ، مقابل إنه يقضي وقت مع القطط 

بس أعتقد دي وظيفة صعبة عليك حبتين 

بسبب الحالة النفسية اللي واصلها القط بتاعك 

من النكد اللي انت معيشه فيه 

الوظيفة التالتة بقى مثالية لعشاق النكد والدراما كوينز 

فلو حضرتك من الشكائين البكائين أحب أقولك فرصتك جاتلك 

تقدري تطيري على تايوان واللي هناك بيتنافسوا علشان يخلوا 

جنازاتهم مأساوية أكتر وللغرض ده بيعينوا 

حد يعيط ويندب ويلطم والذي منه وبيصل راتب 

المعددة والندابة لـ ٣٠٠ دولار في الساعة 

أما بقى لو انت حلنجي وعندك قدرة على الاقناع 

فتقدر تشتغل في مصانع الدراي فود 

كمتذوق لطعام الحيوانات .. طب ليه حلنجي ؟ 

لأنه مش منطقي إن إنسان يعرف إن كان الأكل ده 

هيحبه الحيوان ويستطعمه ولا لأ .. ولكن تقدر 

تلم شوية معلومات من ع النت وتعصر على نفسك لمونة 

وتقدم يمكن ربنا يكرمك براتب ٢٠ ألف دولار في السنة 

إنما بقى لو مشكلتك الأساسية مع أهلك النوم الكتير 

ودايمًا بيصفوك بالكسل وبيقولولك ابقى قابلني لو فلحت 

فتقدر تسافر فنلنلدا و تثبتلهم العكس .. 

واللي الفنادق هناك بتعين خبراء للنوم علشان يختبروا سراير الغرف 

ب ٣٠ ألف دولار في السنة .. وكل المؤهلات المطلوبة 

تنام بضمير كل يوم في اوضة شكل 

أما لو انت بتنطرد من البيت كل يوم

 

بسبب انك سايب مذاكرتك ومضيع وقتك في الألعاب 

فممكن تشتغل مختبر ألعاب فيديو ، ودي وظيفة موجودة 

في دول كتير حول العالم وشرطها انك تكون حريف 

ومرتبها ٣٨ ألف دولار في السنة .. ودي فرصة كبيرة 

علشان تثبت لأهلك إن اللعب اللي مش عاجبهم 

هو اللي هيكون سبب في تكوين مستقبلك وانك تكون من علية القوم 

أما بقى لو انت شخص فاضي وفيك صحة تخليك تقف كام ساعة في اليوم 

فتقدر تشتغل في دول كتير في أوروبا وأمريكا 

شغلانة تناسب امكانياتك وهي انك تقف في الطابور 

في المصالح الحكومية وغيرها من طوابير الشرا والخصومات 

مكان حد لعند ما يجي دوره ، ودي شغلانة مرتبها كويس 

وبيصل ل ١٠٠٠ دولار في الاسبوع الواحد 

بس المشكلة انك ممكن تصرفهم على الدوالي اللي هتجيلك من كتر الوقفة 

المشكلة في الوظايف اللي فاتت دي 

انها غير مقنعة ومستحيل تبقى بتتقدم لواحدة 

وأبوها يسألك انت بتشتغل ايه .. فتقوله شغلانة من الشغلانات اللي فاتت دي 

بس ممكن كل حاجة تمشي طالما الفلوس حاضرة

ولا انت إيه رأيك ؟