" ليه بنجوع قدام البحر ؟! "

لو بتجهز لفورمة الساحل ؟ ومحافظ على تمرينك 

ومراقب أكلك كويس ، فلازم تاخد بالك

 من أكتر سؤال مرتبط بالبحر والمصيف 

وبنسأله بقالنا سنين ومالوش إجابة 

هو إحنا ليه بنجوع قدام البحر ؟ 

ده حتى لو مانزلناش .. فلو بتسأل نفسك السؤال ده كل سنة 

وملقتلوش إجابة .. تابع الحلقة دي 

علشان هنجاوب عليك .. 

في دراسة عملها موقع فان بيدج الإيطالي عن الموضوع ده

واللي من الواضح إنه بيشغل العالم كله 

قال إن السبب الأول والرئيسي للجوع في البحر 

هو انخفاض ضغط الدم ، فمع درجات حرارة أعلى من الطبيعي

بيحصل توسع للأوعية الدموية وده بيسبب ارهاق وجوع 

حتى لو انت نايم على الشيزلونج وما بذلتش أي مجهود 

فبتلاقي نفسك قاعد تعمل في سندوتشات عمال على بطال 

ومش فاهم فيه ايه ؟ ولا عارف تسيطر على نفسك

أما بقى لو انت من الناس اللي غاوية سباحة 

أو حتى قمت اتمشيت شوية على الرمل مش أكتر

فجسمك هيحرق بمعدل أعلى من الطبيعي بكتير 

وبدون أي إدراك أو قصد منك 

وده مرتبط بشكل كبير بدرجة حرارة المياه 

فكل ما كانت درجة حرارة المياه أقل .. هتجوع أكتر

وده بسبب ارتفاع معدل الأيض في الجسم 

بنسبة 350٪ لمحاربة انخفاض درجة حرارة الجسم 

ده غير العنصر الأساسي المنتشر في البحر 

اليود .. واللي بيحفز بشكل طبيعي عملية التمثيل الغذائي

وبينشطها وبيخليها أسرع ، وده معناه 

إن عملية الهضم بتتم بسرعة أكبر بكتير 

فكل ما تاكل تهضم وتجوع فتاكل وتهضم وتجوع تاني .. وهكذا 

وده بيفسرلنا ليه الناس المقيمين في مناطق ساحلية 

أو اللي شغلهم مرتبط بالبحر بشكل أساسي

بيتمتعوا بجسم رشيق ولياقة بدنية أعلى 

لأن معدل الحرق عندهم أزيد بكتير من باقي الناس

يعني ياربي عايشين جنب البحر وجسمهم رشيق 

من غير ما يعملوا دايت ولا يروحوا لدكتور ؟

أيوه .. ما تحسدهومش بقى .. 

فعلشان كده لو انت مجرد ضيف جاي تصيف كام يوم ومروح

وما عرفتش تسيطر على جوعك المستمر والمتكرر

فأحب أقولك إنك هترجع من البحر وزنك زايد

وهتفشل كل محاولاتك في الدايت 

أما بقى لو قدرت انك تسيطر على جوعك في البحر

فالبحر هيكون فرصة هايلة للوصول لنتايج 

استحالة طنت توصلها في أي مكان تاني 

كل الكلام اللي فات ده بيفسرلنا حاجتين مهمين 

الأولى إن فورمة الساحل بتتعمل في الساحل نفسه 

علشان معدل الحرق أعلى 

والتانية .. إننا عرفنا ليه ممكن عيلة 

تجيب معاها البحر محشي ومكرونة وبانيه 

دول طلعوا فاهمين اللعبة أحسن مني ومنك 

فلو انت رايح تصيف بننصحك 

كل كويس حتى لو هتزيد كام كيلو .. 

دول يومين في السنة .. ومحدش واخد منها حاجة ..