" أصول الكيف بين الحقيقة والزيف - مكيفات بره الجدول - "

الإدمان وطبعاً أول ما بنقول كلمة إدمان كل الناس بيجي في دماغها المخدرات

وسيجارة جابت چوان وچوان جاب حباية 

لكن الحقيقة احنا هنتكلم عن كل أنواع الإدمان إلا المخدرات

مكيفات بره الجدول .. محدش بيتكلم عنها لأنها لا عيب ولا حرام 

 

النوع الأول : إدمان الأكل

إدمان الأكل من أكتر أنواع الإدمان انتشار بين البشر 

وهو الأكل إدمان ؟ طبعاً ..

وبيموت زي المخدرات كل الفرق بس انه شرعي

عدد الوفيات في العالم بسبب المخدرات ٢٨٤ مليون بني آدم سنوياً 

عدد مهول .. وبرضه عدد الوفيات بسبب الأكل الغير صحي ١١ مليون في السنة

برضه عدد ضخم ، بس بالنسبة لإدمان الأكل 

 محدش هينبهك انه ده ممكن يموتك

إدمان الأكل زيه زي أي نوع إدمان في الدنيا 

طول ما انت بتاكل الأكل اللي على هواك 

طول ما انت مزاجك حلو ، لو بعدت يوم 

عن الأكل ده هتلاقي عندك نفس أعراض المدمن بالظبط

مزاجك وحش ومش عارف تركز في حاجة 

وتلاقي الحاجة بتقولك مالك يا ابني مش على بعضك ليه 

ولا حاجة يا ست الكل ابنك مدمن 

النوع الثاني : إدمان العلاقات  

طبعاً احنا هنا ما بنتكلمش عن إدمان العلاقات الجنسية المحرمة

 لأن مفيش اتنين ما يتفقوش أن العلاقات دي غير شرعية

لا احنا هنتكلم عن العلاقات اللي بتوصل لحد الإدمان ، ومسكوت عنها 

تلاقي شاب ولا بنت قاعدين يبدلوا في الناس كأنهم فرد شرابات

فتلاقي عيل ماجابش ٢٠ سنة وارتبط بـ ١٧ بنت 

طب عيل في السن ده وصل لكده ازاي ؟

وتلاقي الناس بتقولك ده مراهق .. رد عامل زي الحيطة المايلة ..

 شماعة بنعلق عليها كل المصايب 

لأن علاجها هياخد مننا وقت ومجهود  

الشاب ده عمل كده لسببين .. أولهم إنه مدمن علاقات ، مدمن إنه يكون فيه حد في حياته 

دايمًا بيحكيله  ويتكلم معاه 

والسبب الثاني ، انه الشاب ده وحيد ، و خرج من بيت خشن ، ما فيهوش بجنيه حنية 

وبدأ يدور عن اللي ناقصه و ما تقوليش انه هيتظبط بعد الجواز

لأن زي ما انتوا عارفين.. ان ديل الكلب عمره ما يتعدل  

طب هل ده  مضر ضرر ادمان المخدرات ؟

 أول حاجة إن الشاب ده مجرد ما ينفصل ويلاقي نفسه 

رجع لحالة الوحدة تاني بيقعد ١١ أسبوع في حالة تعافي 

زي المدمن بالظبط ، ١١ أسبوع ما بيقدرش ينجز فيهم أي حاجة 

بيروحوا هدر من عمره لا بيعرف ياكل 

ولا ينام ، ولا يذاكر ولا يشتغل كويس 

وده بقى بيسبب أمراض نفسية زيه زي ادمان المخدرات من اكتئاب 

و زهان وممكن انفصام ، وكل ده 

بسبب انه بيخرج من علاقة للتانية وبين كل علاقة والتانية 

فترة تعافي .. وعمره بيضيع هدر .. 

طب والحل ايه مع المدمن بالشكل ده 

نهتم بيه بس .. ونحبه ونخليه يحب نفسه الأول 

وهو هيبقى كويس ، وممكن نلجأ لاستشاري نفسي 

النوع الثالث : الكافيين 

عمرك لقيت راجل بيطرد إبنه من البيت بسبب إنه مدمن 

قهوة وشاي استحالة يحصل 

لأن النوع ده من الإدمان لا هو عيب ولا هو حرام 

ومحدش هيحاسبك عليه 

بحجة ما هي كل الناس بتعمل كده .. وادمان الكافيين زيه زي ادمان المخدرات 

نفس القريفة وعدم التركيز و التشتت 

و له نفس الأعراض  زي الأرق اللي بيسبب مشاكل نفسية كتير 

ده غير الغثيان و الصداع وآلام الصدر و تسارع نبضات القلب

و الهلوسة .. الهلوسة ؟ .. شوفت ازاي ؟ 

يعني تبقى نازل مصلحة حكومية في نهار رمضان

تلاقي الموظف بيعاملك على أساس ان انت اتنين مش واحد 

ما هو مدمن كافيين 

وما اخدش الجرعة فعنده هلوسة .. ده غير صعوبة التنفس

وكمان فقدان التحكم بالعضلات ، زيه زي أي نوع مخدرات 

ده غير انه له أعراض إنسحاب زي أي مادة مخدرة 

بس هو بياخد تقريباً من ١١ ل ١٥ يوم بس زي الصداع والإمساك

وسوء الحالة المزاجية ، والإكتئاب والقلق وصعوبة التركيز ..

 

النوع الرابع : إدمان السكر 

فيه ناس بتتعامل مع السكر ده على أساس إنه زي الهوا والمياه

وحاجة ما يعرفش يعيش من غيرها 

 بس الناس دي عمرها قصير للأسف

السكر له إدمان أقوى من بعض أنواع المخدرات

لكن محدش بيقول ، ليه ؟ لأنه لا حرام ولا عيب 

ولا هتلاقي حد ميت أوفر دوز سكر.. لكن هو بيموت بالبطئ محدش بياخد باله منه .. 

تبقى راجع من شغلك تعبان

 وتدخل تنام مش عارف تنام تمامًا .. عندك أرق 

طب ليه ؟ ده انت طول اليوم مهدود .. 

والأرق ده سببه إنك واكل سكريات 

لا يتحملها بشر يا صاحبي ، وهي السبب الوحيد للأرق اللي انت فيه 

أكتر من الكافيين نفسه .. ما بالك بقى لو انت بتشرب قهوة زيادة ؟

إدمان السكر نوع من الإدمان مسكوت عنه 

لكنه بيسبب أمراض بتكون سبب في الوفاة 

زي مرض السكري واللي بيموت بسببه مليون و ٦٠٠ ألف بني آدم

كل سنة .. ده غير أعداد كبيرة من المصابين بيه 

والسكر له أعراض انسحاب زيه زي الإكتئاب 

والأرق والصداع والغثيان والكآبة 

 وكل الاعراض اللي بنشوفها على أي مدمن مخدرات 

المقصود هنا إن الإدمان مش بس إدمان مخدرات 

وإن مش علشان إدمان بعض الحاجات مش محرم 

و قانوني .. ده معناه انه مش مؤذي 

بل بالعكس .. هو ممكن يكون مؤذي أكتر من المخدرات 

أفضل إدمان ممكن تستفيد منه في حياتك 

إنك تدمن القراية .. أو تدمن الفرجة على حلقاتنا 

هتضحك وتنبسط وتعرفلك كام معلومة هيفيدوك 

فياريت لو عندك حد بيمر بتجربة مشابهة أو لو انت شخصياً مدمن لأي نوع 

من أنواع الإدمان اللي اتكلمنا عنها 

 تقولنا في الكومنتات.. وتاخدلك لفة في المقالات اللي فاتت.. هتنبسط