" أشهر نصاب في تاريخ كرة القدم "

 " أشهر نصاب في تاريخ كرة القدم "

اتنصب عليك قبل كده ؟ طب كان رد فعلك

 ايه لما حسيت انك انضربت لا مؤاخذة على قفاك ؟

النصابين كتير .. أشكال وألوان .. عايشين في كل مجال حوالينا 

طول ما الجملة دي عايشة .. كل نصاب يحتاج لطماع .. 

 و من أغرب قصص النصب في العالم

هي قصة النصاب كارلوس هينريكى كايزر

 أشهر نصاب فى تاريخ كرة القدم،

لكن ليه القصة دي تحديدًا غريبة ..؟

لأن النصاب ده قدر ينصب على عدد كبير 

من مسؤولين ورؤساء أندية وجماهير انه لاعب كرة قدم 

لاعب حريف مفيش منه اتنين .. 

لو فكرت ثانيتين هتعرف انك قدام نصاب هو من الأذكى في العالم 

لأنك كلاعب كرة قدم علشان تقدر تتنقل من نادي لنادي 

وتمضي عقود بملايين 

لازم تكون بتلعب كورة بجد ودي حاجة مافيهاش بين البينين ..

 يا اما بتلعب كويس يا اما ما بتعرفش 

كايزر صنع لنفسه شهرة وهمية على أنه مهاجم موهوب

 والحقيقة بقى انه ما لعبش أي مباراة ولا حط جون واحد في حياته 

لكنه بذكائه قدر يكون صداقات

 مع أشهر اللاعبين البرازيليين فى أوائل الثمانينات زي 

روماريو ، إدموندو ، وريناتو،  و جاوتشو 

وكان بيعمل لهم حفلات ويقنعهم يخلوا أنديتهم تديله فرصة 

وبالفعل كانوا بيعملوله دعاية ببلاش بدون أي وكيل 

ولما كان بيروح للإختبارات كان يجرى حوالين الملعب شوية ويشوطله كام كورة

 ويقع في الأرض ويدعى الإصابة  ويروح ع العيادة 

وطبعا محدش قادر يكذبه لعدم وجود آشعة وقتها .

قدر كايزر يقضي 33 شهر فى النادى

عامل فيها مصاب ومش قادرين يجربوه كويس

وخلال المدة الطويلة دي قدر إنه يقوى علاقته باللاعبين ، 

ويدخلهم ستات فى المعسكرات التدريبية المغلقة 

بس ده مش يبقى نصاب .. ده كده لا مؤاخذة

وبقى هو المسئول الأول عن الحفلات كل يوم

كرر كايزر التجربة مع عشر أندية برازيلية كبيرة

 وكان ذكى جداً فى المواقف المحرجة 

 فكان يدعى أنه بيتكلم انجليزي مع وكلاء لاعبين في أوروبا 

علشان يحسس الناس إنه عليه الطلب 

لعند ما جه اليوم اللي سمعه طبيب الفريق 

اللي كان بيتكلم انجليزي كويس وهو بيتكلم في التليفون 

ولقى انه بيتكلم انجليزي مش مترتب 

وكان رد فعل كايزر أنه هرب فورًا

مرة تانية ، كايزر كان متعاقد مع نادي بوتافوجو ، 

والمدرب ضم اسمه للقايمة 

و كان الفريق خسران ولازم يدفع بكايزر

 علشان يعدل النتيجة .. هوب كايزر لقى نفسه متورط 

 ولأنه فعلا مايعرفش حاجة عن الكورة ، غير انها مدورة

ولأن حركة الإصابة اتهرشت توجه كايزر ناحية المدرجات 

وبدأ يشتم في جمهور فريقه 

وخد كارت أحمر ، وانطرد بعد دقيقة واحدة

 من نزوله .. يا ابن اللعيبة .. 

ولما سأله رئيس النادى عن تصرفه الغريب مع الجمهور ،

 رد وقال: "أنا أبويا ميت ، وبعتبرك زي أبويا 

ومش هسمح لحد يقول عن أبويا إنه حرامي .. وده اللي قاله الجمهور"

 طبعا رئيس النادى جدد عقده بعدها ست شهور.

كايزر بعد ما ابتدت الصحافة تتكلم عنه

 وأنهم عمرهم ما شافوه بيلعب كورة 

و ريحته خلاص فاحت .. قال مابدهاش بقى

و سافر لأوروبا ووقع مع نادى آجاكسيو الفرنسى

ولما حضر للتعاقد تفاجأ بحفل توقيع و 200 متفرج 

مستنيين يتفرجوا على اللاعب الحريف اللي هينقذ فريقهم ..

كايزر وقتها فضل يشوط الكور ناحية الجماهير كهدايا

لعند ما خلص كل الكور اللي في الملعب

كايزر عاش حياته زيه زي ناس كتير وسطنا 

بيدعوا الموهبة وبشوية دعاية بسيطة

 وشوية ذكاء بيقدروا يبنوا لنفسهم مستقبل وعيشة مرتاحة

وكله على قفا الزبون .. كايزر عمل مسيرة بين كتير من الأندية في أوروبا والبرازيل

وفى فترة كان بيتقال عليه مهاجم موهوب 

 من غير ما يشوط كورة واحدة 

تقدر تقولي دلوقت تعرف كام واحد عنده نفس الموهبة ؟

مش موهبة لعب كرة القدم لأ .. موهبة النصب ..

طب عندك جرأة تعملهم مينشن في الكومنتات ؟

ما تنساش تقولنا كايزر بيفكرك بمين من اللاعيبة 

وتاخدلك لفة في المقالات اللي فاتت.. هتنبسط