" بابا فانغا - العرافة العمياء "

 

 " بابا فانغا - العرافة العمياء "

عمرك رحت لدجال قبل كده ؟ 

طيب ما لاحظتش ان الدجال ده وغيره بينهم حاجات كتير مشتركة ؟

طيب تعرف الدجال ده بيشتغل ازاي ؟ 

أنا هقولك .. الدجالين حول العالم يا إما نصابين ومدعين 

وما يعرفوش حاجة بس بيستخدموا شوية مخبرين لمعرفة أخبار زباينهم 

وبمجرد دخول الزبون بيستخدم الدجال بعض المؤثرات البصرية 

واللي مربوطة عند الناس بفكرة السحر 

زي البخور مثلاً والإضاءة الخافتة.. ونبرة الصوت المتغيرة 

يا اما بيكون ساحر .. ولو ما تعرفش ازاي بيشتغل الساحر 

فطريقة شغله أقذر من انها تتقال في برنامج .. 

كله كوم وحكاية الدجالة أو العرافة دي كوم تاني 

واللي توقعاتها وتنبؤاتها قلبت العالم من يوم وفاتها لعند النهارده 

بابا فانجا .. أو العرافة العمياء 

ولدت بابا فانجا سنة ١٩١١ في مدينة ستروميكا

واللي كانت تابعة للإمبراطورية العثمانية وقتها

 قبل أن يتم التنازل عنها لبلغاريا عام 1912.

و كانت طفلة ولادة مبكرة وعانت من مضاعفات صحية

 واسمها الحقيقي .. فانغيليا و في طفولتها كانت طفلة عادية جدًا 

ولكنها عاشت فترة مراهقة صعبة شوية 

 كان والدها ناشط في المنظمة الثورية المقدونية 

 واتجند في الجيش البلغاري خلال الحرب العالمية الأولى

 وفي نفس الوقت ماتت أمها وده خلى فانغا تعتمد على إحسان الجيران 

وأصدقاء العائلة المقربين لمعظم فترة شبابها

 بعد الحرب، تم التنازل عن بلدها ستروميكا لمملكة الصرب والكروات 

أو ما يسمى يوغوسلافيا وخلصت الحرب من هنا 

واعتقلت السلطات اليوغوسلافية والدها من هنا  

وصادروا جميع ممتلكاته وعاشت فانغا فترة فقر شديدة

ولكنها كانت ذكية بالنسبة لسنها

 بدأت ميول فانغا بالظهور لما حصلت نقطة تحول في حياتها لما رفعها «إعصار» في الهوا

 ولما لقوها بصعوبة كانت خايفة جدًا ، وعيونها متغطية بالرمال والغبار، 

وما عرفتش تفتحهم بسبب الألم ، وده أدى إلى فقدانها تدريجيًا للبصر

في عام 1925 دخلت فانغا إلى مدرسة للمكفوفين في مدينة زيمون، 

 وقعدت هناك ٣ سنين اتعلمت فيهم قراءة بريل وبعض الحرف المنزلية 

 وبعد وفاة مرات أبوها كان لازم ترجع لبيتها لرعاية إخواتها

في عام 1939، أُصيبت فانغا بالتهاب الرئة

 و الدكاترة قالوا أنها هتموت قريب لكنها عاشت لسن ٨٤ سنة  

خلال الحرب العالمية الثانية، تم غزو يوغوسلافيا وضمت بلغاريا ستروميكا مدينة فانغا

وفي الوقت ده بدأت تظهر عند فانغا بعض القدرات على الشفاء 

وبدأ يزورها الأهالي اللي عندهم جنود في الحرب 

وانقطعت أخبارهم علشان يعرفوا ان كانوا عايشين ولا ميتين

أو يحاولوا يعرفوا مكانهم فين لو ميتين 

ومن هنا بدأت فانغا تتشهر بين الناس جدًا 

واللي اتقال وقتها ان كل توقعاتها كانت صحيحة .. والله أعلم 

وشهرتها وصلت إن في 8 أبريل 1942 زارها القيصر البلغاري بوريس الثالث 

في مايو 1942، تزوجت فانغا من عسكري بلغاري اسمه ديميتار غوشتيروف،

 واللي جه لزيارة فانغا علشان يعرف منها مكان اللي قتلوا اخوه 

 ونقلوا إلى مدينة بيتريتش، وفي وقت بسيط جدًا أصبحت فانغا مشهورة

وبعدها اتجند جوزها في الجيش البلغاري وتوفى سنة ٦٢

 وكانت فانغا في التوقيت ده في قمة شهرتها كمنجمة وعرافة

وكانت أكبر القيادات السياسية بتزورها للحصول على مشورتها 

 حتى رئيس الوزراء السوفيتي ليونيد بريجنيف نفسه

توفيت فانغا عام ١٩٩٦ بسرطان الثدي 

وحضر جنازتها عدد كبير جدًا من كافة مسئولين الاتحاد السوفييتي 

و تم تحويل بيتها في بيتريتش إلى متحف في مايو 2008

 ومع إن فانجا ماتت قبل 25 سنة 

 إلا إنها الأشهر في توقعات أحداث العام الحالي

 رصد تقرير نشرته صحيفة الديلي ميل البريطانية 

خمس نبوءات مرعبة لعام 2023 للعرافة العمياء

زي مثلاً ، انها تنبأت بأن السنوات الجاية 

هتظهر فيها الكثير من العواصف الشمسية ، واختبار أسلحة بيولوجية على البشر

 وتحول مدار الأرض ، و انفجار نووي ، وإنهاء الولادات الطبيعية في عام 2023. 

كمان من أغرب توقعاتها انقطاع التيار الكهربائي الجماعي وانقطاع الاتصالات

بعد ما سمعت حكاية بابا فانغا .. تفتكر كل التكهنات اللي تنبأت بيها 

مجرد صدف ؟ .. ولا ممكن تكون الست دي عندها ملكة خاصة 

مش موجودة عند باقي البشر ؟ .. ولا تفتكر إن كل الكلام ده مجرد 

تمهيد لأحداث هما بالفعل عارفينها ؟ مفيش حاجة أكيدة 

ولا حقيقة كاملة …