ماذا تعرف عن نيكولا تسلا ؟

 ماذا تعرف عن نيكولا تسلا ؟

سمعت عن شركة تسلا صاحبة أفضل السيارات 

اللي بتشتغل بالكهربا قبل كده ؟ 

واللي صاحبها ومؤسسها هو ايلون ماسك 

طب تعرف ليه هو سماها بالإسم ده ؟ 

وتحديدًا على إسم العالم نيكولا تسلا .. 

لأنه ببساطة شايف إن العالم بيدين بالولاء 

لأحد أكبر علماء الكهرباء والفيزيا .. نيكولا تسلا

العالم اللي كان سبب في أغلب الاختراعات الموجودة دلوقت 

اتولد نيكولا تيسلا في 10 يوليو 1856 في صربيا

وهو مخترع وفيزيائي ومهندس كهربائي ومهندس ميكانيكي

 ومستقبلي صربي أمريكي، يعني حد له تنبؤات بمستقبل البشرية 

واشتهر بإسهاماته في تصميم نظام التيار المتردد الرئيسي

واللي كان عكس السائد التيار المستمر 

نيكولا تسلا كان كثير التنقلات بسبب مضايقات كتير بيتعرضلها

من مدينة براغ لمدينة بودابست لمدينة غراتس

لباريس لمدينة كولورادو لمدينة نيويورك 

وده أكسبه خبرات أكبر من أي عالم تقريبًا 

لأنه بسبب تنقلاته الكتير كان بيتكلم لغات كتير جدًا 

زي الإنجليزية ، والفرنسية ، والتشيكية ، والمجرية ، 

والألمانية ، واللاتينية، والإيطالية، والصربية الكرواتية   

اكتسب تسلا خبرة في التهاتف والهندسة الكهربية

 قبل هجرته إلى الولايات المتحدة سنة 1884م علشان يشتغل 

في شركة توماس إديسون الشركة اللي كانت مسيطرة

على انتاج وتوريد الكهرباء في الوقت ده 

و في مدينة نيويورك وبعد وقت قليل 

 انفصل تسلا عن إديسون لأنه حس بأن اديسون بيستغله بشكل كبير 

وبيخرج العديد من اختراعاته وعليها اسم توماس اديسون نفسه

وبعد ما انفصل عنه أسس معامله وشركاته 

لتطوير عدد من الأجهزة الكهربائية.

واشترى جورج ويستينغهاوس المقاول والمهندس الأمريكي

 حقوق استغلال براءة اختراع تسلا للمُحوّل ، 

و عينه لفترة قصيرة مستشار ليه ولأعماله 

وفي الوقت ده كان تسلا بيشتغل على تطوير التيار المتردد 

كبديل للتيار المستمر اللي بيشتغل بيه العالم كله 

 وده دخله في حرب كبيرة بين أنصار التيارين اتعرفت بإسم «حرب التيارات»

ده غير حرب كان بيخوضها ضد توماس اديسون 

 لاثبات ملكيته لاختراعات كتير وهي في الحقيقة 

من اختراع و تطوير تسلا نفسه 

ولأنه ما كانش مواطن أمريكي كان دايمًا بيتعرض للظلم 

لعند سنة 1891م لما حصل تسلا على المواطنة الأمريكية 

وكمل تسلا شغله على أفكار الإضاءة اللاسلكية

 والتوزيع الكهربائي في الجهد العالي وتجارب الطاقة عالية التردد، 

واللي كانت هتكون سبب لنشر الكهرباء في كل حتة في العالم 

بكل سهولة وبدون تكلفة .. وده السبب الرئيسي لمحاربته طول الوقت

اللي هو الكهربا بتتباع بفلوس .. واكبر مالك ليها شركة اديسون 

وتسلا كان شايف انها حاجة ممكن تنتقل بالهوا .. وببلاش لكل الناس 

فضروري كان يتحارب علشان اديسون وغيره من المستفيدين

من بيع الكهربا يفضلوا مكملين استغلالهم للبشرية

ما انت مش هتيجي من صربيا توقف حالنا بقى ؟

وصرّح تسلا في سنة 1893 م بإمكانية إجراء اتصال لاسلكي بأجهزته

ودي كانت فكرة سابقة لعصرها بشكل كبير 

وأدت بعد كده لأفكار مختلفة زي الراديو والواي فاي 

اللي قائم عليه أغلب مجالات عمل النهارده 

حاول تسلا تنفيذ أفكاره بمحاولة عمل بث لاسلكي عابر للقارات

 في مشروعه غير المكتمل برج واردنكليف

واللي كان هيغير شكل العالم وهيطوره خلال سنين بسيطة

 كمان أجرى في معمله مجموعة من التجارب على المولدات الميكانيكية،

 وأنابيب التصريف الكهربائية، ومحاولات أوليّة للتصوير بالأشعة السينية

الآشعة السينية اللي هي سبب النهارده في اختراعات كتير وتقدم طبي هائل

 كمان بنى قارب يتم التحكم فيه لاسلكيًا، وده كان حدث فريد من نوعه وقتها

ومن خلاله خرج اختراعات كتير لروبوتات التنقيب وفحص المتفجرات

وأي حاجة بتتحرك عن بعد .. كان السبب فيها مجهودات تسلا

وبرغم كل مجهودات تسلا في مساعدة البشرية 

إلا إنه كان بيقضي وقته بين معمله والمحاكم 

والمؤامرات ده غير انه بفعل فاعل وكلنا عارفينه طبعًا

اكتسب سمعة وصفة العالم المجنون

ولكنه بعد جهد كبير قدر يكسب من براءات اختراعاته فلوس كتير جدًا

 أنفق جزء كبير منها لتمويل مشاريعه الخاصة 

ولكن ثروته الفعلية تعرضت للتدمير أكتر من مرة 

في معامله وشركاته .. او تعرضت للسرقة كتير 

لأنه كان بيؤمن ان العلم وسيلة لتحسين حياة كل الناس

وانه لازم يتقدم بشكل مجاني 

 عاش تسلا معظم حياته في سلسلة من فنادق نيويورك 

 لحد ما توفى في 7 يناير 1943م بمدينة نيويورك بأزمة قلبية واندفن بمتحف يحمل اسمه

وبعدها فضلت اختراعاته وأعماله مخفية عن البشرية حتى سنة 1960م 

لما أطلق المؤتمر العام للأوزان والمقاييس اسمه على الوحدة الدولية

 لقياس كثافة الحقل المغناطيسي تكريمًا له.

ومن تسعينيات القرن العشرين، رجع الاهتمام بتسلا وأعماله مرة تانية

 ودلوقت بعد ما عرفت عن تسلا .. تفتكر كان هيغير شكل العالم بشكل كبير 

لو كان لقى الدعم المطلوب .. ؟

ولاعمره ما كان هيلاقي اللي يدعمه بسبب دعمه لفكرة العلم المجاني ؟

وهل كانت عنده الفرصة إنه يخلي العالم كله 

يستخدم الكهربا والاتصالات مجانًا ولا استحالة كان ياخد الفرصة دي ؟ 

وإن العالم لا يحترم إلا من يستغله ؟