" طيارة اختفت 35 سنة ورجعت مليانة بالهياكل العظمية - سر الرحلة 513 "

 

" طيارة اختفت 35 سنة ورجعت مليانة بالهياكل العظمية - سر الرحلة 513 "

كل الأسر المصرية عندها مشاكل مع فردة الشراب الضايعة دايمًا

 والمشكلة دي ما بتظهرش إلا في الأوقات الحرجة 

 زي مثلاً لما تكون نازل شغلك ومتاخر عليه 

وهوب تعملها معاك .. مش لاقي فردة الشراب

 ولو قلبت عليها البيت كله ما بتلاقيهاش

 وأكن الأرض انشقت وبلعتها ، 

وأكن فيه ثقب دودي بلع فردة الشراب ..

 الحقيقة أن موضوع الحاجات اللي بتختفي فجأه دي

 مش مشكلتك لوحدك.. الحاجة دي بتحصل لناس كثير غيرك ..

 زي 92 فرد حظهم التعيس حطهم مع بعض 

على متن الرحلة 513 سانتياغو

 في طيارة اختفت لمدة 35 سنة .. 

يوم 4 سبتمبر سنة 1954 في مدينة آخن  في ألمانيا الغربية 

طلعت رحلة طيران 513 متجهة لمدينة سانتياجو بشكل طبيعي

 واللي كان على متنها 92 فرد ..

 88 راكب ، وطاقم الطائرة المكون من أربعة أفراد ..

 وبعد مرور ساعتين من إقلاع الطائرة ، 

وفي مكان ما فوق المحيط الأطلسي 

انقطعت كل وسائل الاتصال بالطائرة ، 

واختفت بدون أي أثر وفضلت مختفية لسنين طويلة جداً 

 سنين طويلة من البحث والتنقيب عن مكان الرحلة 513 

بدون أي نتيجة وأكن فعلًا الأرض انشقت وبلعتها

لعند اليوم ده 12 أكتوبر 1989.. بعد 35 سنة ،   

يتفاجئ العاملين في برج مراقبة الطائرات

 بظهور طائرة من العدم فوق مطار بورت اليجر في البرازيل

 تفاجئوا بطيارة بتقوم بعملية دوران فوق سماء المطار

 وهبطت بسلام في أرض المطار

 ولما حاولوا يعرفوا دي انهي طيارة بالظبط اكتشفوا إنها الرحلة 513 

وقت ظهور الطائرة في المطار ، سلطات المراقبة ما استلمتش أي إشارة 

من طاقم الطيارة أثناء هبوطها المفاجئ ، علشان كده

 أرسلت مجموعة أمنية لتفتيش الطائرة

 واللي بمجرد وصولهم للطياره حصل لهم حالة من الفزع والخوف الشديد

 بسبب اللي شافوه واللي ما كانش يتخيله اي حد

 92 هيكل عظمي لأشخاص قاعدين في كراسيهم

 ومن ضمنهم كابتن الطيارة ميجل فيكتور كيري ، كابتن الرحلة 513

حادثة الطائرة 513 في وقتها عملت جدل كبير بين الناس 

مش بس بسبب اختفائها اللي دام لسنين طويلة

 ولكن كمان بسبب ظهورها المفاجئ بالشكل الغريب ده 

بعد 35 سنة لدرجة إن فيه ناس كانت مشككة إن ده حصل فعلاً ، 

واهتم بحادثة الرحلة 513 باحثين كتير جداً

 واللي كان من ضمنهم دكتور سيلسو اتيلو ، 

الباحث في علوم ما وراء الطبيعه 

واللي صرح إنه من المؤكد أن الطيارة دخلت فجوة دودية 

وده اللي نقلها بالزمن من سنة 54 لسنة 89

 ولكن كان السؤال الاغرب هنا .. 

إزاي طياره يتحول كل اللي فيها لهياكل عظمية ؟

 وازاي كابتن الطياره اللي في حالته دي .. 

مجرد هيكل عظمي زي بقية الركاب

 يقدر يهبط بسلام بالطياره في أرض المطار

الحكومة البرازيلية من ناحيتها ما سكتتش

 وخصوصاً إن الطياره هبطت على مطار من مطاراتها

 وشكلت لجنة بحث وتقصي حقائق حول الحادثة

 واللي ما اصدرتش أي تصريح رسمي 

بخصوص مسار ونتائج البحث ده

 والموضوع ده اللي اثار غضب ودهشة كتير من المختصين 

وطالبوا الحكومة البرازيلية فتح المجال لاشتراكهم في البحث

 على سبيل المثال ، أحد الأكاديميين دول

 واللي طالب الحكومه البرازيليه باشراكه في البحث كان ، 

البروفيسور الفيزيائي (رودريجو دي مانها) 

واللي اعتبر إن أي إخفاء للمعلومات والأدلة عن الحادثة

 هو ظلم كبير في حق العلم والإنسانية

 لأنه لو اثبت ان اختفاء الطائرة حصل بسبب دخولها إلى فجوة زمنية

 او اللي بيسموها تايم راب 

فدي حاجه هتغير نظرتنا للعالم والعلم 

ومن اول الناس اللي اتكلموا عن الحادثة

هو الصحفي اروين فيشر في تقرير

 بمجلة ويكلي ورلد نيوز تابلويد ماجازين

سنة 89 ولكن بعد فترة من انتشار تحقيقه في المجلة 

بطل يتكلم عن الموضوع تمامًا بشكل مريب  

سواء كانت حادثة الرحلة 513 حقيقية او لأ ؟

 إلا انها فضلت لغز كبير من اكبر ألغاز البشرية لحد دلوقت

و دلوقتي بعد ما سمعت حكاية الرحلة 513 ..

 لسه شايف انك مش محظوظ

 علشان مش لاقي فردة شرابك الضايعة ؟!