" الحاكم بأمر الله والسفر عبر الأبعاد "

" الحاكم بأمر الله والسفر عبر الأبعاد "

هل يُمكن لشخص السفر لأبعاد تانية..؟ 

يعني يروح بُعد غير مرئي.. زي الجن مثلاً ..؟

طب فيه حاجة إسمها كده أصلاً ؟ ده سؤال شغل بال البشرية من سنين طويلة 

مقدمة مقترحة ٢ : هتعمل ايه لو نمت يوم وصحيت بصيت 

وشفت نفسك في المرايا لقيت إن إنت مش هنا .. 

إنت مش ع الأرض.. أو يمكن على الأرض بس في بعد تاني 

لا الناس سامعاك ولا شايفاك 

بس ممكن تكون انت سامع وشايف ناس تانية أو مخلوقات تانية 

وده اللي بيسموه السفر عبر الأبعاد 

طب فيه حاجة إسمها كده أصلاً ؟ ده سؤال شغل بال البشرية من سنين طويلة 

فكشفنا عنك غطاءك فبصرك اليوم حديد 

الآية رقم ٢٢ من سورة ق 

واللي البعض فسرها بأن الإنسان وهو في سكرات الموت 

بينكشف عنه الحجاب وتبدأ تشوف اللي عمرك ما شوفته 

كائنات من عوالم وأبعاد تانية مختلفة تمامًا عن اللي إنت تعرفه 

طب فيه حاجة إسمها كده أصلاً ؟ ده سؤال شغل بال البشرية من سنين طويلة 

 الحقيقة إن القرآن وكل الكتب السماوية اتكلمت

 عن أبعاد تانية بتفصل بينا وبين كائنات تانية..

يعني فيه أبعاد فوّقية ترددها أعلى من اللي المفروض نشوفه ونسمعه ،

 ودي الي بيتواجد فيها الملايكة مثلاً ..

وفيه كمان أبعاد سفلية، ترددها أقل بكتير من اننا نشوفه أو نسمعه،

 ودي اللي بيتواجد فيها الجن..

إحساس إننا مش لوحدنا على نفس الكوكب هو إحساس جوه كل واحد فينا 

الفكرة دي كانت مبرر كافي لحوادث اختفاء قسرية كتير غير مبررة

وان يعني الأشخاص دول اختفوا من خلال سفرهم لأبعاد تانية مش شايفينها

زي قصة الحاكم بأمر الله واللي يعتبر أغرب حكام مصر على مر التاريخ

المنصور بن العزيز بالله نزار بن المعز لدين الله الفاطمي 

واللي مسك حكم مصر سنة ٩٩٦ ميلادية والمعروف بالحاكم بأمر الله 

واللي كانت فترة حكمه لمصر بتشهد قرارات غريبة جدًا 

 زي انه كان مهتم جدًا بعلوم "الكيمياء والطلاسم والعزائم والرياضيات" 

وعلشانها أسس بيت الحكمة، وجمع فيه الكتب والوثائق الخاصة بالعلوم دي،

 ونظَّم جلسات ثقافية للمُنشغلين بالعلوم دي عشان يستفيدوا منه ويفيدوه..

و قدر يلّم معلومات كتيرة جدًا واتشهر بخلوّاته في غرفة داخل القصر 

ومحظور على أي حد أنه يقرب منها 

والبعض كان شايف انه بيستخدم دراسته للطلاسم والتعاويذ

 في إنه يستحضر أرواح شريرة أو يتكلم مع الموتى..

وبعد ما تحصل على كل العلوم من النوع ده قرر 

انه يصفي كل المنجمين والمشعوذين علشان يسيطر على العلوم دي لوحده..

ده غير هوسه بالقتل وسفك الدماء

تولى الحاكم بأمر الله الحكم وعمره ١١ سنة ، 

وده خلى كبار رجال الدولة يطمعوا في السيطرة على الحكم

 وبمجرد ما سيطر على الدولة 

 بدأ في تصفيتهم ووصل عدد قتلاه لـ ١٨ ألف قتيل..

 لأنه كان بيحاسب اللي بيقصر في أعماله بالقتل فورًا بدون محاكمة

الناس كانت بتخاف تقرب له أو تطمح في مناصب سيادية حواليه،

 وعلى الرغم من كده كان بيتم تعيين بدائل للمقتولين 

وبيكونوا عارفين إن مصيرهم الأخير هيكون القتل..

والحقيقة إن القتل بدون حساب ما اقتصرش بس على أصحاب المناصب

ولكن إمتد للعوّام لدرجة أنه كان بيقتل الأطفال ويشرح جثثهم بنفسه ..

 قرارات الحاكم بأمر الله كانت بتمتاز بالتناقض الشديد ،

 مثلاً لمدة عشر سنين من حكمه منع صلاة التراويح بالمساجد، وسنين تانية سمح بيها..

كمان عدت فترة كان بيضطهد المسيحيين بشدة 

ويُجبرهم على اعتناق الدين الإسلامي أو النفي

 وفترات تانية كان بيعاملهم كويس

 وهو أول حد لبسهم أسود وأجبرهم على لبس الصلبان كميزة يعرفهم الناس بيها 

وعلى الرغم من شهادة الناس ليه بأنه كان على درجة عالية جدًا من الثقافة 

إلا إنه كان سيكو وتوكسيك وفيه كل العبر .. وعنده نزعة قاتل متسلسل

ولكن كان الأغرب على مدار سنين حكمه 

واللي التاريخ وقف عاجز عن تفسيرها هي نهاية حكمه..

الحاكم بأمر الله كان بيلّف في كل حتة ب"حمار" واحد من غير لا موكب ولا حرس، 

يدخل الأسواق يراقب حركات البيع والشراء

 أو يطلع على جبل المقطم يتأمل النجوم بالحمار ده..

والرعب الي كان في قلوب المصريين منه

 كان كفيل ان محدش يفكر في إنه يقرب منه أو يعترض عليه..

راجل عادي بيلف على حماره كل حتة في مصر 

ولا عمر حد شافه راكب غيره أو مشي وسط موكب..لحد اليوم ده..

٢ فبراير ١٠٢١ أخد الحاكم بأمر الله حماره وراح على المقابر لوحده يزورها..

و هوب .. اختفى.. ولحد النهاردة محدش يعرف راح فين

ولا حد لقى ليه جثة أو أي أثر لا هو ولا حماره

بكل بساطة فعلاً اختفى الحاكم بأمر الله هو وحماره،

 وباختفاؤه ده انتهت فترة حكمه للأبد..

 فيه ناس بتفترض إنه تم قتله واخفاء جثته ومحدش عرف لها سكة،

وناس تانية بتقول إنه تم قتله وحرق جثته مع حماره..

مفيش شيء مؤكد..

انما أغرب حاجة ممكن تقرأها هي إيمان ناس كتير بإن اختفاء "الحاكم بأمر الله" 

كان لموضوع تاني وقف عنده التاريخ عاجز عن تفسيره ،

 ربط البعض ما بين اهتمامه بالعلوم الغريبة والسحر والطلاسم..

و أنه اختفى جراء انتقاله لبعد تاني..

الحقيقة إن الرأي ده هو اللي كان سائد وقتها،

 أنه راح عالم خفي زي عوالم الجن كده ومحدش قدر يفسر سبب اختفاؤه أبدًا

 لأنه كان شخص غريب الأطوار وتليق بيه نهاية مختلفة..

يعني يقال إن الحاكم بأمر الله استخدم الطلاسم والتعاويذ

 اللي قدر يتعلمها في فتح بوابة تنقله لبعد تاني وإنه راح عند المقابر تحديدًا للغرض ده..

انت بقى ايه رأيك ؟ هل الحاكم بأمر الله اتقتل ؟ ولا اختفى وسافر لبعد آخر 

ولو جاتلك الفرصة انك تسافر لبعد تاني هتروح فين ؟

اتخيل براحتك .. بس مهما خيالك يشطح لبعيد 

ضروري يكون البعد التاني ده فيه نت