أغرب توأم في العالم - التوأم الصامت

أغرب توأم في العالم - التوأم الصامت

التوائم .. تعرف في حياتك كلها كام توأم ؟ 

اتعاملت مع كام واحد فيهم وحسيت لوهلة أنهم واحد مش اتنين

طبعاً من أغرب حالات الولادة في العالم 

هي حالة ولادة التوأم ، واللي بسبب ندرتها بتكون حاجة مميزة جدًا 

وبتصل نسبة ندرتها ل 1,1٪ بمعدل حالة ولادة توأم 

لكل ٨٩ حالة ولادة عادية فردية ..

يعني لو سبق واتعاملت مع توأم فأنت من القلائل اللي حظوا بالتجربة دي 

أما بقى لو انت شخصياً ليك أخ أو أخت توأم 

فدي حاجة نادرة جدًا جدًا وبتخليكوا مميزين طول الوقت 

بس الحقيقة وعلى مر التاريخ ماكانش فيه توأم مميز

قد التوأم اللي هنتكلم عليه في النهارده 

جون وجينيفر جيبونز أو التوأم الصامت 

جون وجينفر جيبونز ، بنتين توأم اتولدوا في "ويلز" سنة 1963 

واتلقبوا بالتوأم الصامت بسبب عدم قدرتهم على التواصل مع حد 

غير نفسهم بس وده خلاهم منبوذين إجتماعياً بشكل كبير

 ومروا بظروف غاية في الغموض

جون وجينيفر ما كانش عندهم القدرة

  ما كانش حد بيقدر يفهم أي كلمة من اللي بيقولها 

إلا أبوهم وأمهم واللي كانوا بيعيشوا معاهم تجربة سيئة جدًا 

بين حالة بناتهم الغريبة ونبذ المجتمع والناس ليهم ،

 وصعوبة تعليمهم ده غير التنمر اللي كان بيحاوطهم طول الوقت 

وللأسف وضعهم ما اتحسنش ، ده زاد سوء مع الوقت 

لأنهم لما  بدأوا يكبروا أصبحت لغتهم أكثر سرية

وما عادش لا الأب ولا الأم قادرين يفهموهم تمامًا  

طبعًا أهاليهم ما سكتوش ولفوا بيهم على كل الدكاترة اللي يعرفوهم 

في تخصصات مختلفة علشان يقدروا يعالجوا الحالة الغريبة اللي بيمروا بيها 

ومع مرور الوقت ذاع صيت حالتهم وأصبحوا بؤرة اهتمام

لكل رجال الطب النفسي والعلم عمومًا 

واللي بعضهم نصح الأهل بالتفريق بين الأختين يمكن حالهم ينصلح

 وبعتوا كل واحدة فيهم لمدرسة داخلية مختلفة ،

 وكانوا فاكرين إن ده الحل ولكن النتيجة كانت كارثية.. 

بعد فصل الأختين عن بعض بوقت بسيط

 أصابهم مرض نادر جدًا اسمه الجامود أو Catatonia 

وده مرض أعراضه أنه الشخص بيبقى زي التمثال 

لا بيتحرك ولا بيتكلم ولا بيبدي أي ردة فعل نهائيًا

فاضطروا أهاليهم لجمعهم مع بعض مرة تانية في البيت 

وعدم اللجوء لدكاترة تاني خالص 

والتوأم كانوا عندهم هواية نسج قصص خيالية أبطالها ألعاب

فلاحظ الأهل ده فقرروا توجيه "التوأم الصامت" لمجال الكتابة والأدب 

وبعد سنين من الدراسة قام "التوأم الصامت" بتأليف عشرات 

الكتب والقصص المصورة الغريبة والمرعبة .. قصص دموية

لدرجة أنه لم يقبل أحد بنشر تلك القصص من شدة غرابتها…

والغرابة اللي في قصصهم مع الوقت خرجت من الورق 

و اتنقلت للحياة الواقعية وارتكبوا جرائم كتير زي الحرق والسرقة 

 

وللسبب ده تم إيداعهم بمستشفى "برودمور" في "إنكلترا"

 وعاشوا هناك لمدة 14 سنة وشخصت المستشفى حالتهم

 على أنها نوع نادر من أنواع الفصام 

وطوال مدة اقامتهم في المستشفى كانوا تحت المراقبة اللصيقة 

لمنع حدوث أي جرائم أو حرايق بسببهم 

لكن حالتهم ما اتحسنتش مع تجربة العديد من الطرق لعلاجهم

لعند ما توفت الأخت "جنيفر" عام 1993 بالتهاب مفاجئ في عضلة القلب 

واللي بعد ما ماتت بأيام قليلة ، قدرت الأخت جون 

انها تتواصل مع الناس بشكل أفضل 

وتكون طبيعية أكتر ومحبة للحياة

 وغير مقبلة على الجريمة أو ايذاء نفسها

كأن كان من الضروري انه تموت واحدة منهم 

علشان التانية تتحسن وتعيش حياة طبيعية

وده اللي اثبتته التقارير بعد كده 

لأنهم بعد سنين لقوا في مذكرات الأخوات "جيبونز" كلام غريب جداً 

مفاده أنه يجب على واحدة منهم فقط أن تموت لتعيش الأخرى حياة طبيعية

والغريب أيضاً أنه بعد موت الأخت "جنيفر" 

فضلت الأخت "جون" تكرر الكلمات التالية

"وأخيراً أنا حرة ، تحررت ! 

وأخيراً تخلت "جنيفر" عن حياتها من أجلي "

وبالفعل عاشت الأخت "جون" بقية حياتها

 تتكلم وتتصرف بشكل عادي جداً 

كأنها اتولدت من جديد … 

بعد ما سمعت حكاية التوأم الصامت 

تفتكر إنها منطقية وحقيقية ١٠٠٪ ولا فيها جزء من المبالغة والتهويل ؟ 

وتفتكر التعلق المرضي بين التوأم ممكن يصل للدرجة دي ؟ 

ولو التوأم موجودين في الوقت الحالي مع تطور الطب 

ممكن كنا عرفنا أكتر عن حالتهم ولا لسه فيه أسرار كتير 

ما وصلناش لتفسير ليها .. ولا هنوصل ؟