نظام دانلوب وخطة هدم التعليم في مصر

عمرك سمعت عن كتاب علي مبارك الممنوع تدريسه في مصر

 بأمر من التاج البريطاني ؟! 

طب تفتكر الحال اللي وصله التعليم كان مقصود ؟

ولا جه بمحض الصدفة .. ؟  

تعالى أحكيلك عن نظام " Slowly but surely "

 وخطة دانلوب لتدمير التعليم المصري 

سنة 1901 بيرجع الشيخ عبد العزيز جاويش مصر ،

 بعد ما حصل على درجة البكالوريوس في التربية من إنجلترا ، 

بيرجع وهو معاه أحلام ضخمة لتطوير نظام التعليم في مصر، 

و كل اللي كان عاوزه جاويش فرصة بس ..

فرصة لإصلاح نظام التعليم وتحديث المناهج ونظام التدريس ،

 و لما نزل القاهرة أكتشف إن وزارة المعارف المصرية

أصبح ليها سكرتير خاص مسئول عن القصة دي

تطوير التعليم المصري 

 وهو سكرتير بريطاني إسكتلندي ، اسمه دوجلاس دانلوب

 وعنده خطة لإصلاح التعليم المصري هو كمان ،

 فالإنجليز نصحوه إنه يتوجه بأفكاره المهمة دي

 إلى سكرتارية وزارة المعارف لمناقشتها 

  جاويش مكدبش خبر وراح بسرعة علشان يقابل السير دانلوب 

اللي عينه اللورد كرومر في 8 مارس من 1897

 كمسئول إصلاح نظام التعليم المصري 

بيعرض جاويش على السير دانلوب أفكاره ، والتاني ما أبداش أي رد فعل

 سواء بالقبول أو الرفض ، لحد ما يكشتف جاويش إنه بيتم خداعه 

وإن دانلوب استدعاه بس علشان يعرف تفكير المصريين وصل لحد فين

في مسألة تطوير تعليمهم وبالشكل ده

 يعرف إزاي يقدر يعرقل مسيرة الإصلاح ده  

يعني كان الهدف واضح جدًا من البداية 

وكانوا عارفين إن دوام فترة احتلالهم لمصر 

قائم على فكرة تجهيل الشعب المصري .. 

فلا يكون عارف حقوقه ولا عارف تاريخه ولا أصله 

واللي مش عارف أصله عمره ما هيثور على محتل  

جاويش أعترض لما أكتشف الحقيقة دي

 وخصوصًا أن كلام دانلوب كان مفاده 

انه ما ينفعش يتم تطبيق نفس نظام التعليم في بريطانيا على المدارس المصرية

يعني انت كمدرس مصري تدرس سنة واحدة لتأهيلك لوظيفتك

انما مدرس التاج البريطاني لازم يدرس أربع سنين 

لأنه مش مجرد مدرس .. ده مسؤول عن نشر ثقافة بريطانيا العظمى 

يعني بالبلدي متقارنش نفسك بمدرس إنجليزي ، لأنك مجرد تابع

 اتضايق جاويش وخرج من عند دانلوب علشان يبدأ رحلة كفاح تانية ..

في محاولة لتأسيس هوية المعلم المصري 

 وأول ما وصل اللورد كرومر أول مندوب سامي بريطاني على مصر

 درس النظام التعليمي المصري كويس جدًا ، 

واكتشف إنه علشان ينشر ثقافته الإنجليزية فلازم الأول يحاول ازالة اللغة العربية

تدريجيًا من الدولة فأصدر قرار بمنع  تدريس

 كتاب كان تم إصداره في عهد الخديوي إسماعيل

  إسـمه (طريق الهجاء والتمارين على القراءة في اللغة العربية)

 واللي ألفه على مبارك ، وبعدين قام بحذف الجزء المتعلق

 بالعبادات والمعاملات الدينية الإسلامية 

وحط بدلاً منها أفكار قصص من الفلسفة والخرافات والأساطير 

بعد كده رشحت إنجلترا دوجلاس دانلوب

 لتولي السكرتارية العمومية لوزارة المعارف المصرية 

واللي كان دوره يجيب التعليم المصري بالأرض تمامًا

 بإتباع إستراتيجية الإنجليز المعروفة " بطئ لكنه فعال " Slowly but surely " 

فكرة دانلوب كانت إنه مش بين يوم وليلة تهدم نظام التعليم المصري

 ولكن تعمل حالة سلبية بعيدة الأمد على جودة التعليم 

وبكده يكون النظام كله خاضع للسيطرة الإنجليزية 

 علشان كده دانلوب فتح مدارس نظام 4 سنين

 تروح تدرس 4 سنين في المدارس " الدانلوبية "

 الجغرافيا والتاريخ والإنجليزي والفلسفة 

وغيرهم من العلوم المواكبة للعصر 

علشان يُسمح ليك بالعمل كموظف في الدولة فورًا

 وبراتب 12 جنيه وده مبلغ كبير وقتها

الا لو كنت انت مدرس لغة عربية هتاخد 4 جنيه بس  

أما بقى لو انت أزهري هتاخد 120 قرش ، 

وهتتعين في المساجد أو الاوقاف

 لكن بنسبة كبيرة مش هيتم قبولك في أي وظيفة حكومية 

كمان مش لازم مدرسين أزهريين لتعليم المواد الشرعية

يكفي مدرس اللغة العربية انه يعلم المادتين

اللغة العربية والمواد الدينية واللي مع الوقت 

أصبحت بلا أهمية و لا تضاف للمجموع فتُهمل   

كمان تبديل مواد الأنشطة الصناعية والزراعية 

واللي كان ليها دور كبير جداً في تنمية مهارات الطالب المصري

بأنشطة ليس لها قيمة ترفيهية ومع الوقت اتحولت لحصص بدون مدرسين تمامًا  

مش بس كده من الأساليب اللي ساعدت في هدم التعليم

لا كمان تم تعيين مدرسين انجليز لمراقبة المصريين

 لمنع بث ثقافتهم وفكرهم الأصلي  

ده غير غرس فكرة إن زيادة التعليم تصرف عن فلاحة الأرض

 وتعود على مصر بالإفلاس وعلى المصريين بالفقر

وطرق تانية كتير مختلفة كانت السبب في تدهور التعليم في مصر 

وحتى مع إنتقال النظام الإنجليزي لإستراتيجات تانية مختلفة

 فضل الأسلوب الدانلوبي ده هو المتبع في التعليم المصري ومطبق لحد يومنا ..

والسؤال هنا كام دانلوب مصري بيخربوا في تعليمنا ؟

 ومسئولين عن اللي وصلنا له ؟! 

وهل حد ممكن ينقذنا منهم ؟! وياريت تقولنا رأيك في الكومنتات

وما تنساش تاخدلك لفة في المقالات اللي فاتت

هتنبسط