سجون الأثرياء - تأديب وإصلاح و ترابيزات بلياردو وبينج !

سجون الأثرياء - تأديب وإصلاح و ترابيزات بلياردو وبينج !

لو معلوماتك عن السجون انها تأديب وتهذيب وإصلاح 

فأحب أقولك إن الوضع اتغير تمامًا 

وإن فيه سجون في العالم تتمنى بس تنام فيها ليلة واحدة

أو تاخد فيها داي يوز كده تفك عن نفسك 

لأن الرفاهية اللي موجودة فيها 

احتمال ما تلاقيهاش في فنادق كتير في العالم 

سنة ٢٠١٠ في سجن بوندوك بامبو للسيدات 

في اندونيسيا ، اكتشفت السلطات في دورة تفتيش مفاجئة للسجن

وجود غرف مكيفة ، ومجهزة بشاشات 

و قسم خاص بالمساچ والساونا وكمان غرف كاريوكي 

في قضية فساد كبيرة أثبتوا فيها 

تلقي المسؤولين عن السجن رشاوي ضخمة من السجناء

 

لتوفير الامكانيات دي ، اللي على درجة من الرفاهية

مش موجودة في فنادق ٥ نجوم 

والحقيقة إن الموضوع ده اتكرر في سجون كتير 

في جنوب شرق آسيا ، فبعدها بسنتين 

اكتشفت السلطات في سجن بيلبيد في الفلبين 

غرف فيها جاكوزي وتلفزيونات واستديوهات مزيكا 

مش بس للتسلية والترفيه ، لأ .. ده خرج منها ألبومات 

اتوزعت واتباعت ومبيعاتها وصلت لـ ١٥ ألف نسخة كمان 

كان الرابط بين الحدثين كالعادة الرشوة 

وكان المبرر الوحيد اللي المسؤولين قدموه لما اتحاكموا

إن السجون عندهم بتعاني من ازدحام شديد

فمقابل الفلوس اللي أخدوها من المساجين 

واللي ادّعوا إدراجها لتطوير السجن نفسه 

قدر المسؤولين توفير فلل خاصة تحت حراسة السجن 

مجهزة بكل وسائل الترفيه 

والحقيقة إن فكرة زي دي لمعت في دماغ المسؤولين 

عن السجون في الولايات المتحدة وخصوصاً في كاليفورنيا

واللي فيها ٣٤ سجن بيعانوا كلهم من الازدحام 

وخصوصاً سجن الولاية الأكبر لوس أنجلوس 

اللي بيعيش فيه ٢٠ ألف فرد في حين 

إنه ما يستوعبش إلا ١٥ ألف فرد بس 

وده بسبب إن نسبة الرجوع للجريمة في كاليفورنيا

أكبر من أي ولاية تانية بنسبة ٦٥٪ 

لدرجة إنهم كل سنة بيضطروا يفرجوا عن ١٢٠٠ سجين قبل ما مدتهم تخلص

فقالك بقى بدل ما نسيب المساجين للمسؤولين عن السجون

واللي وارد انهم ياخدوا منهم رشاوي 

علشان يوفرلهم شوية رفاهية .. احنا نقنن الموضوع 

ويبقى من السجين للحكومة عدل .. 

فابتكروا فكرة جديدة ممكن تغير شكل السجون في العالم كله 

وبدأوا بتطبيقها بالفعل على سجن seal beach

واللي الليلة فيه تكلفتها ١٢٠ دولار 

مقابل توفير شوية خدمات ترفيهية 

زي الانترنت وشوية قنوات مشفرة

وانهم يتحركوا بكل حرية في السجن 

ويقدروا يستقبلوا قرايبهم كمان .. 

ومن خلال الفلوس دي يقدروا يبنوا ملحقات جديدة للسجن 

ومساحات أوسع بحيث إن كل غرفة تاخد ٦ افراد بس 

التجربة كانت ناجحة جدًا لدرجة إنها دخلت ١٥٠ ألف دولار للحكومة كل سنة 

ولدرجة خلت مساجين كتير تستدين علشان تستفيد من الخدمات دي 

السؤال هنا بقى .. لو فكرة زي دي انتشرت في العالم كله 

تفتكر ممكن تغير صورة السجن عند الناس ؟ 

وهل هيفضل هو الرادع الوحيد اللي بيمنع من الجريمة ؟

ولا هيفضل السجن هو السجن حتى لو من جوه فندق ؟!