أغرب راهب في التاريخ .. جريجوري راسبوتين ..

أغرب راهب في التاريخ .. جريجوري راسبوتين .. 

شخصيات كتير حول العالم حواليهم غموض كبير 

فيه منهم اللي ما نعرفش إن كان الكلام اللي اتقال عليه حقيقي أو لأ 

وفيه منهم اللي ما نعرفش هل كراماته اللي ادعوها 

أو صفاته الغريبة اللي مختلفة عن كل صفات البشر 

كانت صفات حقيقية ولا مجرد وهم كان بيثار حواليهم 

فيه اللي مثبت عنهم في سيرتهم إنهم كانوا فعلًا خارقين للعادة

وفيه منهم اللي من شدة غرابته ربطوا صفاته بالشيطان نفسه 

حد من الناس دول .. هو يكاد يكون أغربهم 

سيرته مثبتة في التاريخ بقوة لإرتباطه بأحد العائلات المالكة 

حد كان له سلطة طاغية بين الناس لمدة طويلة 

وكان بيتحكم في مصير العائلة الحاكمة في روسيا القيصرية نفسها

حكايتنا النهارده عن الراهب الأكثر غرابة 

جريجوري راسبوتين ..

ما عرفتش روسيا القيصرية شخصية في غموض غريغوري راسبوتين،

 واللي عجزت أغلب رموز التاريخ الحديث عن تفسير سيرة حياته

 واللي اتكتب عنه أكتر من مئة كتاب 

 تاريخ ميلاد راسبوتين مختلف عليه ولكن معظم الآراء تجمع على أنه اتولد سنة 1860،

في مدينة بوكروفسكوي في مقاطعة "تيومين" الريفية في سيبيريا ، لوالد ووالدة من الفلاحين ، 

وهناك عاش طفولته بين سهول وأودية سيبريا 

ما اتعلمش إلا قليل جدًا ، زي الكتابة والقراءة واللي ما وصلتش لشكلها الصحيح كمان

ولكن كان من صغره يمتلك البصيرة الثاقبة بالفطرة 

  حياة راسبوتين كانت مليانة بالمشاكل والبلاوي من صغره ،

 توفيت والدته وهو طفل في عمر الثانية عشر ، 

وأكلت النيران معظم منزله وبعد كده سقط شقيقه في النهر ومات، ونفس الموضوع اتكرر مع أخته .

اتقال عن راسبوتين أنه كان راهب ، لكن ده ما حصلش أبدًا 

وإنما اقترب من حياة الرهبان، من خلال بعض الأديرة القريبة من قريته،

 وما لقاش نفسه في الوسط الروحاني ده ، إنما التحق بأغرب البدع

 اللي ظهرت في أواخر القرن الرابع عشر في روسيا، واللي إسمها "الخالستية"، 

واللي كانت قواعدها بتقول أنه يتوجب علينا أن نصنع الشر، لكي نرى رحمة الله في حياتنا .

في سن التاسعة عشرة، التقى راسبوتين في دير "أبالاكك"، 

بفتاة تدعى براسكوفي ، واللي كانت أكبر منه بأربع سنوات،

 قرر الزواج منها لأنها رفضت أن تهبه نفسها.

و أنجب منها أربعة أطفال قبل ما يصل إلى سن الثلاثين، 

وفجأة تغيرت حياته مرة واحدة، وقرر انه يكمل حياته كحاج إلى الأماكن المقدسة،

 زي اليونان مثلاً القريبة من روسيا جغرافياً.

في الوقت ده كان القيصر الروسي نيكولا و وزوجته الكسندرا

 من اللي بيؤمنوا بالمشعوذين والعرافين ومدعي تحضير الأرواح

 وربنا رزقهم بـ 4 بنات و ولد واحد اسمه أليكسي وهو ولي العهد ،

 كان أليكسي مصاب بمرض نادر  وعضال في الوقت ده وهو مرض الناعور

أو (الهيموفيليا) ، واللي أعراضه أن أي نزيف دموي ناتج عن جرح بسيط

 هيأدي لنزيف الدم بصفة مستمرة وهيؤدي لنهاية حياة الشخص ، احنا هنا بنتكلم عن ولي العهد .

  سبب  المرض ده شرخ نفسي عميق في نفس القيصر وزوجته 

وعينوا جيش من الأطباء للسهر على ولي العهد واللي كان دايمًا محاط بالرقابة 

طول الوقت خشية أن يتعرض لجرح مميت .

 وفي الوقت ده ظهر راسبوتين ، و تعهد للقيصر وزوجته بإنقاذ حياة ابنهما ووريث عرشهم

كانت لدى راسبوتين قدرة خارقة على إغواء النساء 

حتى أكثرهن عفة والمتزوجات منهن على وجه الخصوص وده كان بيسهله حاجات كتير جداً

  وقال كتير من المؤرخين ان قدرة راسبوتين على اكتساب المكانة دي في البلاط القيصري

 كانت بسبب مساعدات عشيقاته من زوجات كبار رجال الدولة،

ثبت عن راسبوتين قدرته الهائلة على التنويم المغناطيسي (الإيحائي)،

 وكانت له في هذا المجال جولات وصولات،

 حيث عرف عنه تفرده بالقدرة على التنويم باستخدام صوته فقط ،

 كمان يقال إنه كان بيمارس التنويم المغناطيسي بالصوت من خلال الهاتف،

 والدليل على كده أن عدداً كبيراً من الناس اللي تأثروا بيه حصلتلهم نفس النتيجة

 وتأثروا بصوته برغم إن عينهم ما جاتش في عينه أبدًا .

كمان كانت أحد أسباب شهرة راسبوتين ترجع إلى فصاحته

 وطلاقة لسانه وقدرته الهائلة على الإقناع ، ده غير شفاء الأمراض و لئم الجروح

 بمجرد وضع أيده على مكانها فقط 

وده جعل له عدد كبير من المريدين والمتوددين خصوصاً . 

وطبعًا قدرته الخارقة دي هي السبب في توطيد علاقته بالعائلة المالكة 

  من خلال إيقافه عدة مرات لحالات النزيف الخطيرة اللى تعرض لها ولي العهد

 والتي كادت أن تودي بحياته أكثر من مرة ، وكانت أغرب هذه المرات

 لما راسبوتين تمكن من إيقاف نزيف ولي عهد القيصر الروسي 

من على بعد مئات الأميال عبر مكالمة هاتفية قام خلالها بتنويمه مغناطيسيا ً !

من مهارات راسبوتين كمان تحديد هوية السارق ومكان المسروقات 

من غير ما يعرف أي حاجة عن ملابسات السرقة ودي ملكة كان بيتمتع بيها من صغره

عاش راسبوتين حياة مليانة بالعلاقات المحرمة 

والقذارة وإهانة الدين وتعاليمه وده اللي خلى ناس كتير تقول 

إن كل مهاراته وملكاته كانت بسبب إتفاق تم بينه وبين الشيطان 

باع روحه فيه للشيطان مقابل المهارات دي 

أما عن نهاية راسبوتين فهي مرت بمراحل غريبة زي حياته 

عندما دخلت روسيا الحرب العالمية الأولى عام 1914 

كان راسبوتين في أوج نجاحه وعنده القدرة على تحطيم كبار المسؤولين في الكنيسة

 أو الحكومة إذا ما قاموا بانتقاده أو ذكر شيء عن سلوكه أو تصرفاته المشينة. 

وكان المجلس التشريعي (الدوما) يكره راسبوتين لدوره مع القيصرة ألكسندرا 

في عزل كبار المسؤولين في الحكومة ممن اتصفوا بالمقدرة والكفاءة

 واحداً بعد التاني إلى أن أصيبت الحكومة بالتفكك 

و في شتاء عام 1916- 1917 تآمر نائب الدوما بوريشكيفيتش

 مع الأمير فيلكس يوسوبوف والغراندوق ديمتري بافلوفتش

 فنجحوا في إستدراج راسبوتين لمخدع الاميرة إيرينا زوجة يوسوبوف لقتله.

بعد منتصف ليلة 16 ديسمبر سنة 1916 استقل راسبوتين سيارة الغراندوق 

وكانت هذه هي آخر مرة شوهد فيها راسبوتين حي ، 

وعثروا على حذائه الأسود بعد يومين على ثلوج نيفا تحت جسر بتروفسكي ،

 و الشرطة بعدها لقت جثته ، وأثبت التشريح أن راسبوتين تناول سماً 

وتلقى طلقات نارية قبل إغراقه في النهر وحينئذ فقط أعلن عن موته رسمياً . 

واللي علشان يقتلوه إضطروا لسمه واكتشفوا انه ما حصلوش حاجة 

لأن راسبوتين كان بياخد جرعات من السم بشكل يومي استعداداً لأي محاولة اغتيال 

ولما ماماتش ضربوه بالنار ولما قاوم بعدها اضطروا يغرقوه .. 

ودي من أغرب حالات الإغتيال على مدار التاريخ 

لأن الطبيعي واحد حياته بالغرابة دي .. لازم كانت تنتهي بطريقة أغرب..

دلوقت بعد ما سمعتوا حكاية راسبوتين .. تفتكر هل الحكاية دي برغم انها مثبتة 

من عدة مصادر تاريخية .. تفتكر حقيقية ..؟ ولا مبالغ في أحداثها .. 

لو عندك معلومة مختلفة ياريت تقولنا في الكومنتات

لأن حكايتنا النهارده انتهت .. استنونا في حكاية جديدة