" فيلم يتنبأ بأحداث فرنسا المشتعلة "

  

" فيلم يتنبأ بأحداث فرنسا المشتعلة "

سنة 2022 صدر على منصة نتفليكس فيلم Athena

واللي بيحكي عن شاب فرنسي من أصل جزائري

بتنهي حياته الشرطة الفرنسية وبسبب الحادث ده 

بتحصل أكبر أعمال شغب في تاريخ فرنسا 

بس ده مش مجرد فيلم .. لأن ده اللي حاصل دلوقت بالظبط

طب إزاي ده حصل ؟ إزاي فيلم اتعرض من سنة وأكتر 

يتوقع الأحداث بالدقة دي ؟ وهل اللي بيحصل في فرنسا دلوقت 

كان متخططله زي ما ناس كتير بتقول ؟

طب هو إيه اللي بيحصل في فرنسا أصلاً ؟

في اللحظة دي موجود في شوارع فرنسا أكتر من 50 ألف 

من قوات الشرطة ومكافحة الشغب 

واقفين في وش مئات الآلاف من المتظاهرين

واللي حرفيًا مولعين الشوارع .. طب ليه كل ده ؟

بدأت القصة لما نائل الفرنسي من أصول جزائرية

واللي عنده 17 سنة كان مروح بعد يوم شغل طويل 

تحديدًا يوم 27 يونيو .. 

إلا إن الشرطة وقفته لمخالفة مرورية 

واتجه الشرطي ناحية نائل فقرر إنه يخبط الشرطي الفرنسي بعربيته ويهرب 

فالشرطي ضربه بالنار دفاعًا عن النفس 

ده التقرير اللي صرحت بيه الشرطة الفرنسية 

بعد الحادث علشان يهدوا الناس لأن موضوع 

موت شاب جزائري على يد شرطي فرنسي

موضوع حساس جدًا .. لكن بعد يومين 

الشارع الفرنسي بيكتشف إن التقرير ده كدب في كدب 

لما انتشر فيديو لنفس الحادث بس بتفاصيل مختلفة تمامًا

فيديو بيثبت إن نائل كان بيحاول يجري بعربيته من الشرطي

اللي ما كانش واقف قدام العربية ولا كان نائل هيخبطه 

ولا كان الشرطي بيدافع عن نفسه 

إلا إنه بمجرد ما شاف نائل بيحاول يهرب ضربه بالنار من مسافة قريبة جدًا

بعد ما الفيديو ده انتشر بسرعة اتغير موقف الشرطة الفرنسية تمامًا

وحبست الظابط ووجهوله تهمة القتل العمد 

في الوقت ده الرئيس الفرنسي ماكرون 

كان في القمة الأوروبية ولأهمية وحساسية الحدث 

رجع على باريس بسرعة 

وصرح إن الفعل ده غير مقبول وغير مغتفر 

والبرلمان الفرنسي وقف دقيقة حداد على روح نائل 

علشان يهدوا الأحداث 

طب وهديت الأحداث ؟ لا .. بالعكس

الدنيا ولعت وخصوصاً بعد ما عرف الشارع الفرنسي

إن الشرطة بتكدب عليه ، وبعدها خرجت أم نائل 

في فيديو وهي حزينة على موت ابنها الوحيد

ودعت الفرنسيين لوقفة احتجاجية ضد الظلم والعنصرية 

ولبي طلبها عدد كبير من الناس ودعموها عبر وسائل التواصل الاجتماعي

الليلة الأولى 29 يونيو بدأت المظاهرات بشكل سلمي 

احتجاجا على الظلم اللي حصل لنائل 

وبدون أي شغب وتركزت في مدينة (نانتير) 

إنما في الليلة التانية ٣٠ يونيو اتغير شكل المظاهرات تمامًا 

وبدأ المتظاهرين يولعوا في الأتوبيسات والعربيات 

وانتقلت الاحتجاجات لباريس نفسها 

أجراس الإنذار بتضرب في كل مكان ، والمتظاهرين 

بيحاولوا اقتحام تاني أكبر سجن فرنسي 

سجن (فريسنس) واعتقلت الشرطة ليلتها أكتر من ٦٠٠ شخص 

ونشرت المدرعات في كل مكان في الشوارع 

الليلة التالتة .. ١ يوليو ، نشرت الشرطة الفرنسية

أكتر من ٥٠ ألف فرد لمنع الاحتجاجات 

اللي كانت أكبر وأبشع من إنهم يسيطروا عليها 

حرايق في كل مكان .. نهب وتدمير لكل ممتلكات الدولة

وأصوات التفجيرات مالية الشوارع 

خرج الوضع عن السيطرة بالكامل

وتحديدًا في مدينة مارسيليا ، اللي استهدف المحتجين فيها

أكبر مكتبة في المدينة (مكتبة ألكازار) 

وخربوا أهم نصب تذكاري لتخليد ضحايا الهولوكوست الفرنسيين

في الليلة دي اعتقلت الشرطة الفرنسية أكتر من ١٣٠٠ فرد

ووزير الداخلية الفرنسي أعلن ايقاف المواصلات العامة 

ودول كتير حذرت رعاياها من السفر لفرنسا 

زي انجلترا وألمانيا وغيرهم .. 

زحف الاحتجاجات وصل لـ ١٠٠ مبنى حكومي

ووصلت الخساير لأكتر من مليار دولار  .. 

وليلتها اجتمع البرلمان الفرنسي لمناقشة إعلان حالة الطوارئ

من ناحية تانية خرج الرئيس الفرنسي في خطاب 

ولكنه خلى الوضع أسوأ 

لأن ماكرون ما اتهمش الشرطة الفرنسية ولا السلطات 

ولا حط اللوم عليهم في اللي حصل 

وانما اتهم وسائل التواصل الاجتماعي 

وطالب منصات (تيك توك وسناب شات وتويتر بسحب محتوى المظاهرات

وده حصل بالفعل في الليلة الرابعة ٢ يوليو

وتم حجب كل ما يتعلق بالمظاهرات من وسائل التواصل الاجتماعي

وحس الشعب الفرنسي إن فيه محاولة لتكميم أفواههم 

فكملوا في الشغب أكتر ولكن تحت تعميم إعلامي

وده خلى جرايد كتير تتوقع انقلاب عسكري في فرنسا

ضد ماكرون بسبب عدم رضى القادة العسكريين عن سياسته 

وكمان توقعوا إن البلد على وشك دخول حرب أهلية 

وخاصة بعد ما تفاجؤوا بكم الأسلحة اللي موجودة في ايد المدنيين

السؤال هنا .. هل ممكن حادث زي ده 

يكون أخر مسمار في نعش رئاسة ماكرون لفرنسا ؟

ولا ممكن يكون سبب في حرب أهلية تكتب شهادة وفاة 

فرنسا لسنين طويلة وتتحول من مدينة النور 

لمدينة من الخراب والجرايم ؟ 

والأهم والأغرب من ده كله .. إزاي فيلم صدر من سنة 

يتوقع كل الأحداث دي ؟ هل صناع الفيلم كانوا على علم باللي هيحصل ؟

ولا دي مجرد صدفة .. ؟