" نجوم كسروا وهم الثانوية العامة ! "

 "  نجوم كسروا وهم الثانوية العامة !  "

فاكر ليلة نتيجة الثانوية العامة ؟ 

لما فضلت تدور على حتة تبات فيها 

علشان ما تواجهش والدك بمجموعك 

اللي ما يدخلكش كلية بريد قسم لحس الطوابع حتى 

طب فاكر ساعتها احساسك إن العالم انتهى 

ومستقبلك ضاع والأولى إنك تتعلملك صنعة 

تاكل منها عيش مادام موضوع التعليم ده مش جاي معاك سكة

أنا جاي أديك أمل وأقولك العالم ما انتهاش 

وإن الثانوية العامة مش أهم مرحلة في حياتك زي ما قالولك 

الثانوية العامة مرحلة دراسية عاملة قلق لكل البيوت المصرية 

واللي بيعلنوا حالة الطوارئ لمدة عشر شهور 

وبيعرضوا الطلاب لحالة من الضغط النفسي والتوتر الرهيب 

وبيوهموهم إن الثانوية العامة هي اللي هتحدد 

إن كنت إنسان فاشل في حياتك الجاية ولا ناجح 

ولكن على عكس المألوف نجوم كتير نجحوا في حياتهم العملية 

بعد ما فشلوا في الثانوية العامة ، فشل ذريع 

وعلى رأس القايمة دي الزعيم عادل إمام 

اللي خرج من الثانوية العامة مرحلة تانية 

ودخل كلية الزراعة سنة ٦٢ وكان مسرح الكلية 

فتحة الخير عليه لأنه اترشح من مسرح الكلية 

للمشاركة في مسرحية (أنا وهو وهي) لفؤاد المهندس 

وبعدها بقى الزعيم عادل امام ، الغني عن التعريف

 

كمان الفنان محمد هنيدي اللي اتخرج من الثانوية العامة 

بمجموع ٥٧٪ وبعدها دخل كلية الحقوق واتفصل منها بعد سنتين 

بسبب اهتمامه بمسرح الجامعة ، وبعدها دخل المعهد العالي للفنون المسرحية

علشان يكمل مسيرته كممثل من أقوى ممثلي الكوميديا في مصر والوطن العربي

كمان الهضبة عمرو دياب كان أحد ضحايا الثانوية العامة 

واللي اتخرج بمجموع ٦٠٪ والتحق بعدها 

بالمعهد العالي للموسيقى وبقى الهضبة ، اللي أغانيه بتلف العالم

الفنان أحمد حلمي اللي سقط مرتين في الثانوية العامة 

وفي المرة التالتة نجح بمجموع قليل جدًا 

والتحق بأكاديمية الفنون قسم الديكور 

وبقى واحد من أهم ممثلين جيله

 

كمان الفنان طلعت زكريا اللي دخل امتحان الثانوية العامة

مرتين ، أول مرة جاب ٥٢٪ فقرر يعيد الثانوية العامة

علشان يحسن مجموعه ، بس للأسف جاب ٥٠٪ 

فدخل المعهد العالي للفنون علشان يبقى من أفضل 

وأنجح نجوم الكوميديا المصرية بعدها

كمان مش المجال الفني بس اللي مليان بنجوم فشلوا في الثانوية العامة

لأ عندنا كمان الملك المصري محمد صلاح 

اللي اتخرج من الثانوية الصناعية سنة ٢٠٠٨ بمجموع ٥٧٪ 

ودلوقت هو من أشهر واغلى لاعبي العالم كله 

وفيه أمثلة كتير جدًا غيروا العالم برغم عدم تفوقهم الدراسي 

زي أينشتاين ، العقل الأذكى على مر التاريخ

 

وصاحب النظرية النسبية ..

وكمان توماس اديسون مخترع المصباح الكهربائي

اللي المدرسين قالوا لوالدته ان معدل ذكائه أقل من زمايله 

وطردوه من المدرسة علشان يكمل تعليم في البيت 

ومارك زوكربيرج مخترع الفيسبوك اللي برضه 

كان طالب غير متفوق .. بس بقى من أغنى رجال العالم

وغيرهم كتير جدًا ..وده دافع يخلينا نقول 

إن الثانوية العامة مش نهاية العالم ابدًا 

وإنك تقدر تحقق النجاح في اي مجال 

بشرط تحبه وتخلصله .. فبلاش تضغطوا على عيالكوا 

وعلى نفسكوا .. بحجة إن الثانوية العامة 

هي اللي هتحدد مصيرهم .. وسيبوهم يختاروا الطريق اللي بيحبوه 

علشان الحب ده هو اللي هيوصل للنجاح 

مش امتحان الثانوية العامة خالص ..