" نعمل ايه لو اختفى الذباب من العالم ؟! "

" نعمل ايه لو اختفى الذباب من العالم ؟! "

آااه يا بنت الـ… ياه لو العالم مفيهوش دبان 

أصلك ما تعرفش أنا بضايق من الشيء اللي اسمه دبان ده قد ايه ؟

ومش عارف ايه الفايدة منه بصراحة ؟ 

ولا أنا اللي مش مذاكر كويس ؟ وناسي إن ربنا قال 

(إنا كل شيء خلقناه بقدر) 

وجهلي بالشيء مش معناه أبدًا إنه ملوش لازمة 

هو أنا بناقض نفسي مش كده ؟ 

مش تناقض قد ما هو رغبة في المعرفة .. 

وبما إن السؤال ده بيجي في بال ناس كتير 

(هي إيه فايدة الدبان في الحياة ؟)

فإحنا قررنا نجاوب عليه بطريقتنا

أولاً لازم تعرف إن فيه أكتر من ١١٠ ألف نوع من أنواع الذباب

 والأنواع دي بتقوم بتلقيح عدد كبير من النباتات

 زي شجرة الكاكاو مثلاً ، الشجرة المنتجة للشوكولاتة 

ولولا وجود الذباب في العالم 

كانوا الناس بتوع الشوكولاتة دخلوا في اكتئاب

تاني حاجة إن الذباب بيمثل حلقة وصل في سلسلة الطعام 

عشان بيتغذى عليه بعض الطيور والأسماك 

ولو تم فقد الحلقة دي هتنقرض الكائنات اللي بتتغذى عليه

 وبالتالي هتنقرض الكائنات اللي بتتغذى ع الكائنات اللي بتتغذى عليه .. وهكذا 

 لحد ما سلسلة الإنقراض دي توصل لينا 

يعني ممكن حضرتك تموت م الجوع لو الدبان اختفى 

تالت حاجة بقى إن الذباب بيعمل كمحلل عضوي للكائنات الميتة

 اكيد كلنا لما بنشوف حاجة ميتة بنلاقي الذباب ملموم عليها 

وبنقول ايه القرف دا .. بس اللي انت ممكن تكون مش عارفه

 إن الذباب بيضع البيض بتاعه في الجثث دي

 والبيض بيتحول ليرقات ، 

واليرقات دي بتتغذى على اللحم والدم الموجود فيها 

وبتحوله لسماد طبيعي ولما بتكبر بتطير وبتستمر في دورة حياتها الطبيعية 

ولولا الذباب كان زماننا عايشين في كوكب متعفن مليان بالحيوانات الميتة 

انسى بقى الاستمتاع بالطبيعة والهواء الطلق

وكل الحاجات الجميلة دي خالص

رابع حاجة بقى إنه الذباب مصدر ملهم للفيزيائيين

 للتطوير من تكنولوجيا الطيران وأدوات التصوير،

و طبقًا للأبحاث الذباب يعتبر من أكثر المخلوقات تعقيدًا 

بسبب طرق طيرانها المعقدة أعلى وأسفل وللأمام والخلف 

وبشكل دائري وفي اللحظة اللي انت بترمش بيها بعينك 

الذبابة تقدر ترفرف بجناحاتها ٥٠ مرة 

بمعدل ٣٠٠ ضربة في الثانية، 

ده بالنسبة للطيران .. طب موضوع التصوير ده ايه علاقته بالذباب ؟

لازم تعرف إن الذبابة الواحدة عندها ٦ أعين مكونة من ٤ آلاف عدسة 

كل عدسة بتشتغل لوحدها وبكده تقدر ترصد أي تهديد جايلها من أي مكان،

علشان كده لما جيت اضربها فشلت فشل ذريع زي ما شوفتوا

 والغريب بقى واللي ما يتصدقش 

انه اختراع زي الطيارة بدون طيار 

اللي بيستخدموها في التصوير وشكل كادراتها بيبهرك دي 

اللي معروفة بإسم الدرون ، السبب في اختراعها 

أنها مستلهمة بالكامل من الذباب .. 

بعد كل ده وتقولي لازمته ايه ؟ 

تفتكر دلوقت رد فعلك هيكون هو هو لما تشوف دبانه ؟

هتضربها وتحاول تهشها ، ولا هتاخدها بالحضن ..

 وتشكرها على أثرها الكبير في حياتك ؟