" أغرب الطرق للإقلاع عن التدخين ! "

مع انك مش طايقها ولا طايق نفسك 

طول ما هي في ايدك .. بتطلع السلم تنهج 

بسببها وأكنك عندك 70 سنة وانت في عز شبابك 

سنانك صفرا ومخلصة على فلوسك 

بس برضه مش قادر تبطلها 

السجاير .. عادة من أسوأ العادات على مر التاريخ 

والاقلاع عنها مسألة شغلت الناس من زمان 

ففي منهم اللي لجأ للقراية بس ما قدرش 

يكمل صفحتين في الكتاب اللي بيقراه 

إلا اما يولع سيجارة .. 

ومنهم اللي بدل السجاير ببنبوني وجاله السكر 

وبرضه لسه ما بطلش .. 

وفيه اللي قرر إنه يركز ويحط خطة للاقلاع عن التدخين 

ولكنه احتاج سيجارة علشان التركيز وطبعاً الخطة فشلت 

محاولات كتير جدًا جدًا .. كلها تقليدية 

إنما من ضمن الطرق الغير تقليدية والغريبة 

طريقة مواطن تركي إسمه إبراهيم يوجيل 

واللي بعد ما والده مات بسرطان الرئة

قرر أنه يحط حوالين دماغه قفص حديد 

وادى المفتاح للمدام واللي طبعاً ما اتوصتش 

وما بتفتحش القفص إلا على الأكل .. 

لكن تفتكروا ده حل عملي .. ولا فيه حلول تانية 

خارج الصندوق وعملية أكتر 

فيه بحث عملته صحيفة الجارديان عن أغرب أنواع الاقلاع عن التدخين

وجمعت فيه تجارب القراء .. واللي فعلاً كانت مختلفة 

وغير تقليدية تمامًا .. وجابت نتايج 

واللي أولهم كانت تجربة لمدرس من اسكوتلندا 

كان بيدخن 20 سيجارة في اليوم 

وبطل من 11 سنة بطريقة سهلة ومفيدة كمان 

وإنه قرر كل ما يحس انه محتاج يدخن 

كان بيقوم علشان يشرب كوباية ماية 

واتعمد إن المياه تكون بعيد عنه .. لعند ما تروح زروة رغبته في التدخين 

والموضوع نجح معاه .. وكمان بقت بشرته نضرة 

من كتر شرب المياه .. 

تاني تجربة بقى كانت لقارئ من لندن

واللي اعتمد نظام التخفيض التدريجي 

وقرر انه يقلل معدل تدخينه كل يوم سيجارة واحدة

ووصل من 40 سيجارة في اليوم لسيجارة واحدة بس

في فترة 6 أسابيع .. وقال إن الموضوع ما كانش مرهق أبدًا 

ده حتى كمان اختار أقل وقت بيستمتع فيه بالتدخين 

ولغى السيجارة بتاعته ونجح في ده .. بس يا ترى لسه بيدخن كل يوم سيجارة ؟

تالت تجربة بقى كانت لمصمم جرافيك اسمه آندرو 

والراجل ده عمل حل بره الصندوق تمامًا

فكان كل ما يحس انه عايز يدخن .. يدخل يستحمى 

وطبعاً مستحيل يدخن تحت الدش .. 

وخلال 40 يوم تقريبًا كان مبطل سجاير 

وارتاح منها ومن قرفها بس دفع دم قلبه في فاتورة المياه 

التجربة الرابعة كانت لقارئ من مدينة (سري) في بريطانيا 

وده اللي قرر انه يحتفظ بعلبة سجايره كل يوم 

جنب الصابون .. وده اللي خلى السجاير 

رحتها اتغيرت وطعمها بقى كله صابون 

وده خلاه يكرهها ومع الوقت بطلها 

أما التجربة الخامسة واللي ما بننصحش بيها أبدًا 

كانت من خلال التدخين المتواصل 

ودي طريقة من طرق العلاج العكسي 

لشخص قرر يدخن ٤٠ سيجارة في ٦ ساعات بس

لعند ما كره أمها وما بقاش طايقها وجسمه تشبع بالنيكوتين 

وغيرهم كتير من محاولات فيه منهم 

اللي بيشيل مشابك الغسيل ويعاملها معاملة السيجارة

ومنهم اللي تعمد يغسل سنانه بعد كل وجبة 

وتجارب كلها نجحت مع غرابتها الشديدة 

الخلاصة إن التدخين عادة سلبية سبب تملكها من المدخن 

ربطها بالعادات الرئيسية للبني آدم 

زي الأكل والشرب والنوم والصحيان

يعني سيجارة بعد الأكل ولا مع كوباية شاي 

ممكن تكون هي السبب في صعوبة الاقلاع 

ولو بدأنا اننا نفصل بين العادات الرئيسية والتدخين 

هنبطل بسهولة .. 

بعد بقى ما عرفت عن تجارب الناس في الاقلاع عن التدخين

تقدر تقولنا ايه أطول مدة بطلت فيها تدخين ؟ 

ولا انت ما بطلتش أصلاً ؟