" كيف يعيش رواد الفضاء في سفنهم ؟! "

 "  كيف يعيش رواد الفضاء في سفنهم ؟!  "

متبتر على عيشتك وانت واكل شارب نايم 

في بيتك ومزاجك عنب ؟ لأ وكمان عندك 

الرفاهية والحظ الكافيين إنك تتفرج على 

ڤيديوهات ڤيديولوچي .. تعالى بقى أوريك 

إزاي رواد الفضاء عايشين متكدرين في سفنهم الفضائية 

علشان تعرف إنك محظوظ .. 

طبعاً هتقولي وهو إيه الفرق بين العيشة في الفضاء 

والعيشة على الأرض ؟ ما هي كلها عيشة .. 

والله كلام يحترم وكل حاجة .. بس هو فيه فرق صغير 

خالص ، إن على الأرض عندنا جاذبية 

هي اللي مخلياني ومخلياك قاعدين في مكاننا 

دلوقت ومخلياك عارف تتفرج على الحلقة دي 

لكن في الفضاء بقى الموضوع ده شاحح شوية 

للأسف معندهمش جاذبية .. علشان كده 

كل حاجة انت بتعملها بكل سهولة 

من أكل وشرب ونوم وغيرها من الحاجات

هما بيعملوها بإجراءات معينة صعبة ودقيقة 

وأول حاجة اللبس مثلاً .. الناس دي ما بتقفش قدام الدولاب

يختاروا هيلبسوا ايه النهارده بالسهولة دي 

لا دول عندهم كام بدلة بيبدلوا بينهم 

كل بدلة منهم مخصصة لمرحلة معينة 

يعني بدلة لمرحلة الإقلاع .. وبدلة تانية

لوقت التمرين .. وبدلة تالتة للمشي خارج السفينة 

وما ينفعش حد منهم يزهق مرة ويضربله شورت 

ويقعد قعدتك دي .. دي تبقى كارثة 

تاني حاجة الأكل .. الأكل اللي ناس كتير 

بتعتبره المتعة الوحيدة الحلال في الدنيا 

الناس دي ما بياكلوش إلا أكل مجفف تمامًا 

وخالي من أي مياه فبالتالي مفيش شورب 

ولا شوية خضار مسبكين كده يرموا عضمهم 

ولما بيقعدوا ياكلوا بيقعدوا على ترابيزة مثبتة في جدران السفينة

وبيثبتوا نفسهم بأربطة تمنعهم من أنهم يطفو 

يعني مش مدلعين زيك يقوموا يغرفوا

ويقعدوا قدام التلفزيون ويضربوا اللي عايزين يضربوه 

تالت حاجة بقى .. الناس دي كلت وشربت 

عايزين يدخلوا الحمام أكيد يعني 

فبيضطروا يثبتوا رجليهم بأرضية الحمام 

والسفينة مجهزة بآلية للتخلص من فضلاتهم في الهوا 

طب الناس دي هتعيش كده من غير حموم 

وخصوصاً إن الرحلات دي بتطول 

هما مش طالعين جمصة يومين صد رد 

لا دول مطولين بالشهور وده مش حلو على ريحة المكان 

فما بيقفوش تحت الدش زي حضرتك وشاور چل 

وشامبوهات والدلع ده .. 

لأ دول بيستحموا باستخدام قطعتين سفنج

قطعة منهم مبولة بصابون والتانية بمياه 

وبينشفوا نفسهم بخرطوم هوا شبه بتاع الكاوتش كده 

إيه من متع الحياة تاني متكدرين فيه ؟ 

النوم .. طبعاً لازم يناموا .. بس برضه 

معندهمش الرفاهية انهم يناموا في سرير طويل عريض

يبرطعوا فيه براحتهم تحت التكييف 

لأ دول بيستخدموا أكياس نوم مثبتة في الحائط 

عيشة كرب بصراحة .. فبما انك قاعد براحتك 

انت وجاذبيتك وبتتفرج علينا ومبسوط 

فما تنساش تعملنا لايك وتحمد ربنا على وجودنا في حياتك 

وتاخدلك لفة في المقالات اللي فاتت

هتنبسط