أنواع الجيران (الجزء الأول) !

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

أهلاً بيكوا مرة تانية في مدونتكم ، وموضوع مقالنا النهارده

عن العشرة ، والجيرة ، اللي الباب في الباب 

اللي لو اتوجعنا هما أقرب حد لينا .. 

واللي لو حصلتلنا مشكلة هما أسرع حد هيلحقنا 

اللي اتعمل عليهم مسلسلات لما اتهروا 

سابع جار .. ساكن قصادي .. وغيرها وغيرها 

مقالنا النهارده عن الجيران .. وأنواع الجيران كتير جدًا 

في منهم اللي يصونك ويصون بيتك وجيرتك 

ولما تشوفه تحس ان الدنيا بخير .. ومنهم اللي لما تصطبح بوشه

اعرف انك لا هتشوف توفيق ولا خير 

لكن احنا كالعادة هنركز على الأغرب 

والأندر ، الأكثر ندرة يعني .. والأعجب .. 

النوع الأول : رئيس إتحاد الملاك

البرنس ، الرتبة .. اللي متخيل إنه رئيس إتحاد الكورة

وفاكر إنه مهم أكتر من العمارة نفسها 

الراجل اللي عنده جنون عظمة والأنا عنده 

أعلى من برج القاهرة ، تيجي انت فيه ايه 

إنت مجرد ساكن ، مالك أو مستأجر إنت مجرد واحد م الشعب

ساكن زيك زي سكان كتير جدًا ماليين العالم 

وكلهم زيك كده ملهومش لازمة .. تعرف ايه انت 

عن إدارة عمارة زي دي ، كنت فين إنت وإحنا سهرانين

مع السباك ولا بتاع الأسانسير .. ؟ 

ولا واحنا راحين جايين بين جروب الواتس اب 

والخاص علشان نلم الصيانة الشهرية .. 

أقولك كنت فين ؟ كنت نايم .. واحنا سهرانين 

لأن ده دورنا نسهر على راحة سكان العمارة

وخدمتهم راحتنا .. وبراحتنا بقى .. ناخد امتيازات 

واحترام وتقدير وتعظيم ، زي ما احنا عايزين 

ملاحظ انه كل الكلام بصيغة الجمع 

كل الكلام احنا .. احنا .. وده للتفخيم معروفة

طبعاً رئيس اتحاد الملاك يا إبني .. وتقولها وأنت واقف انتباه

و مشدود شدة من حديد ونار .. 

النوع ده من الجيران يا جماعة له هيبة مزيفة

هو بس اللي واخد باله منها .. هو بس اللي مصدقها 

أنا متخيل الراجل ده لما بيصحى من النوم 

ويبدأ يفكر نفسه برتبته ومركزه .. وتسمع صدى صوت 

مالي الأوضة .. رئيس اتحاد الملاك .. رئيس اتحاد الملاك

يقف يلبس هدومه قدام المراية .. بيكون هو الوحيد 

اللي بيبقى شايف انه مش لابس زي الناس

ده لابس يونيفورم زيه زي أي لوا شرطة  

هو الوحيد اللي شايف النجوم اللي على اكتافه .. 

لا وبيرقي نفسه بنفسه .. كل ما يقدم في الرئاسة

رئاسة اتحاد الملاك يعني .. يعلق نجوم زيادة 

وسلطته تزيد ، واسمه يسمع بين العمارات 

ورئيس اتحاد الملاك لأنه راجل بيتعب 

فهو له مميزات حصرية مش لأي حد 

يعني استحالة تعرف هو بيدفع في الخدمات والصيانة 

ولا لأ .. احنا ما بنقولش انه راجل معدوم الضمير

لأ .. بس استحالة تعرف ، ولو حلف على المياه 

بقت أيس كوفي هيفضل عندك سنة شك فيه

كمان هو الوحيد اللي كل خدماته مظبوطة .. 

باب الأسانسير في دوره بيفتح بدون صوت 

مع انه طالع نازل صوته بيصحي الموتى 

يبقى سلم العمارة مليان زبالة وريحته تقرف .. 

و ما اتمسحش من أيام ما كانت العمارة لسه ع الطوب الأحمر

 لكن قدام شقته بقى تلاقي البواب زارع ورود 

تشم روايحها من على بعد شارعين ومش ماسح قدام الشقة 

لا ده لاحس الأرض بلسانه لحس .. 

طبعاً هو يستجري يقصر مع سيادة رئيس اتحاد الملاك 

تحسه رئيس اتحاد ملاك الكوكب .. 

رئيس اتحاد الملاك ، نوع من الجيران احنا بنتعامل معاه طول الوقت

لكن هو أكبر دليل على الفساد ، يعني راجل عادي جدًا 

السكان اختاروه أنه يدير شؤون العمارة

فجأة بقدرة قادر بقى هو اللي بيتحكم في كل كبيرة وصغيرة

مين طالع ومين نازل ، مين جاي متأخر 

مين بيستقبل ضيوف في وقت ما يصحش 

لأن العمارة كلها أهالي وعائلات .. مين بيستخدم الأسانسير 

وفي ايه بيستخدمه ، وهكذا .. والسلطة الوهمية دي 

بتكون عندن غرور غير مبرر ، وبيصدق نفسه إنه 

رئيس لمجموعة من الناس حتى لو بشكل شرفي 

فتلاقيه مثلاً قاعد على باب العمارة بيراقب مين 

راح ومين جه .. مين داخل ومين خارج .. 

ويبص لكل الناس بشكل يخليهم يشكوا في نفسهم 

أكنهم بيعملوا حاجة غلط .. وأكنهم دايمًا مطلوب منهم 

تقارير يومية بتحركاتهم وتصرفاتهم ، ومفردات مرتباتهم 

والجار من النوع ده مش محتاجين نقول إنه كان عنده حلم 

زمان وهو صغير انه يبقى ظابط جيش أو شرطة

وخيشت معاه ودخل معهد لاسلكي مثلاً.. 

ففضل يحلم طول حياته باستقبال الناس له 

والهيبة اللي بتخر منه مع كل خطوة بيخطيها 

والتعظيم فيه ، وفي انجازاته .. وما بيصدق 

يلاقي منصب زي ده في رئاسة اتحاد الملاك

فبيكون متوقع انه كل يوم وهو خارج يلاقي تشريفة

البواب يديله تعظيم سلام ، والسكان واقفين صفين 

يمين وشمال انتباه احترامًا وتقديرًا لمنصبه 

النوع الثاني : صاحب الحضانة 

وده الجار بقى اللي عمره ما سمع عن برامج تنظيم الأسرة

ولا عمره تخيل إنه فيه إنسان ممكن يخلف طفلين بس

ده بالنسبة له إهانة لرجولته ، وتقصير لدوره في الحياة

ولما تيجي تحسب عدد البشر اللي في العمارة 

هتلاقي مساوي لعدد البشر اللي في شقته تقريبًا

وده طبعاً مش محتاجين نقول إنه ضخم الجثة 

عريض المنكبين ، ربنا فاتح عليه ورزقه واسع

فمخلف ١٢ عيل في مختلف الأعمار والمراحل الدراسية كلها

من أول العيلين اللي لسه بيرضعوا وبيلبسوا كوافيل

لعند اللي في الحضانة واللي بيحضر دكتواره 

مرورًا باللي في ابتدائي واعدادي وثانوي وجامعة 

جيش من العيال .. فريق كرة بيحتل سلالم العمارة 

من أول المدخل لعند الروف .. ومعاهم الأسانسير 

اللي محدش عارف يستخدمه بسببهم .. طالعين نازلين 

وغير احتلالهم للمكان ، فهتلاقيهم محتلين العمارة زمانيًا برضه

يعني البيت اللي فيه زوجين وعيلين ، فمعروف ده رايح المدرسة الصبح 

والأهالي رايحة شغلها وده رايح الجامعة بعد الضهر 

وبيرجعوا كلهم اخر النهار .. البيت ده لأ . 

ده فيهم اللي بينزل من الفجر ، وده الأب طبعًا

 اللي علشان يلحق يأكل الجرمق ده فلازم ينزل 

مع بزوغ الفجر يجيب فرن عيش وسطل لبن 

وكرتونتين بيض ويرجع .. وبعدين من ستة الصبح ينزل شغله

ومن سبعة الصبح ينزلوا اللي في ابتدائي وبعدهم بنص ساعة 

بتوع اعدادي وبعدهم بنص ساعة بتوع ثانوي .. 

وبعدهم بساعة بتوع الجامعة .. وبعدين 

كل ده يبدأ يرجع بنفس الترتيب للبيت مرة تانية 

طبعاً ي بس نزلتهم وطلعتهم للدراسة .. ده غير مشاويرهم العادية

يعني لو كل عيل من دول نزل يجيب طلب 

فحرفيًا محتاجين أسانسير خاص بيهم 

ومن مكاني ده بناشد رئيس اتحاد الملاك .. بعد التحية 

ياريس ازاي الناس دي بتدفع صيانة وخدمات 

زيهم زي أي حد تاني في العمارة .. 

دول بيستخدموا السلم والأسانسير والموتور بشكل حصري

دول حرفيًا لازم يدفعوا على الأقل عشر أضعاف ونبقى مجاملينهم

المشكلة في النوع ده من الجيران .. انه مش واخد باله 

بالجيش اللي معاه انه بيضايق الناس ومسببلهم ازعاج 

بحكم ان كل الناس عندها عيال .. أيوه ياريس بس 

معندهومش العدد ده .. يقولك مش بالكم ، بالكيف 

يعني تلاقي العيال بيلعبوا كورة في المدخل 

ومكسرين كل المرايات ، وبيضايقوا وبيرازوا 

اللي داخل واللي خارج ، مفيش مشاكل 

تلاقي مجموعة منهم موقفين الأسانسير .. مش مشكلة 

 فيه سلم اهي رياضة برضه 

تلاقي مجموعة تانية بيلعبوا استغماية على سلم الدور التاني 

ومجموعة تالتة بيلعبوا عسكر وحرامية على سلم الدور التالت 

ومجموعة رابعة بيلعبوا ثبت صنم على سلم الدور الرابع

ومجموعة خامسة قاعدين على سلم الدور الخامس بيلعبوا بابچي

وغيرهم وغيرهم وصولاً لعتبة شقتك هتلاقي اتنين منهم 

قاعدين لاقطين واي فاي من الراوتر بتاعك 

وده الوضع في الأيام العادية .. فيه مناسبات استثنائية تانية 

تخلي السكان يعزلوا واحد ورا التاني وممكن تكون سبب ان 

سعر الشقة في العمارة دي يوصل لألفين جنيه

يعني تخيل لو دول عندهم عيد ميلاد 

وكل عيل فيهم داعي خمسة بس من أصحابه 

فتقريباً فيه عدد لا يقل عن ١٠٠ فرد في العمارة

من فوقها لتحتها .. ويا سلام بقى لو جارنا ده

داعي أخوه اللي طبعاً مش هيقبل إنه يكون 

عنده عدد أولاد أقل منه ، فهتلاقي فيه كمية 

عيال في العمارة تسبب صداع نصفي 

والحل مع الجار ده حاجة من اتنين .. 

يا إما تصبر عشرين تلاتين سنة لعند ما العيال دي 

تتجوز وكل واحد يشوف حاله .. اللي يسافر بقى

واللي يطلع يسكن بره العمارة ، واللي يتوظف في حلايب 

وده مش حل مضمون ، لأن أي تجمع عائلي للعيلة دي 

وأطفالهم وأحفادهم هيسبب أزمة انفجار سكاني 

أسوأ من القاهرة في السبعينات 

يا إما تعرض شقتك للبيع على اوليكس بسعر بخس 

وربنا يعوض عليك .. 

النوع الثالث : جمعية الرفق بالحيوان

وده جارك اللي تلاقيه مربي ١٠ قطط 

وكلبين ، وقرد ، وتمساح صغير 

وكام بغبغان على كام عصفور كناريا 

وواخدين مساحة بقى قدام الدور اللي ساكن فيه بالكامل 

طبعاً هتقولي يا عم مادام قدام بيته مفيش مشاكل 

أصلك ما تعرفش حاجة .. الجار ده بيكون مأمن البيت بشكل كبير 

من أول البوابة اللي ما ينفعش تتفتح ثانية 

علشان كل ما تتفتح كلب ولا قطة من بتوعه 

يهرب ويعمل حملة بحث عن الحيوان الهارب 

ويشيلك ذنبه وذنبه نومته في الشارع 

لعند السلم اللي كل الناس بتتحرك عليه بحذر شديد 

يا إما بسبب القطط الكتير اللي لسه مولودة وأمهم 

بتهجم على كل واحد معدي .. يا إما بسبب البهدلة 

اللي عاملينها على السلم ، ده احنا ما قولناش 

انك هتقاطع السلم تمامًا بسبب الكلاب 

اللي ممكن تفرتك عضمك عادي خالص ولا أكن حصل حاجة 

طب خلينا تجنبنا السلم ، وقفلنا البوابة واحنا خارجين وداخلين 

بسرعة البرق قبل ما قطة ولا كلب يهربوا 

الصوت هنعمل فيه ايه ؟ .. يعني لو انت تعبان 

أو عيل عندك عنده امتحان ومحتاج يركز 

أو إنت شخصيًا عايز تنام بدري علشان تصحى تشوف أكل عيشك

وواحد من جيرانك عامل ازعاج تقدر تقوله بعد اذنك 

هدي اللعب شوية علشان عايز أنام 

لكن ده مهما تقوله لا هو في ايده حل 

ولا يقدر يفيدك بحاجة ، لأنه ببساطة كده يعني 

إزاي هيسيطر على كلب قاعد يهوهو أو يعوي 

الساعة ٣ الفجر ، ولا قطط بتتخانق مع بعضها 

الساعة ٦ الصبح ، ولا عصافير صاحية بدري 

كالعادة صوصو صوصو وانت لسه ما نمتش 

فدي مشكلة ملهاش حل لا عندك ولا عنده 

ده غير النضافة بقى والروايح اللي مالية العمارة

طب الحل ايه مع الجار ده إيه ؟ 

والله في الوقت الحالي بقى تقدير الحيوانات 

أعلى بكتير من تقدير الإنسان .. وأي إعتراض منك 

الناس مش هترحمك .. دي روح يا أخي 

أيوه هو يعني أنا اللي جماد .. ما أنا روح برضه يا عم الحاج

فمفيش حلول ، غير يا تصبر على جارك السو 

يا تغير محل اقامتك وتبيع شقتك وتسافر 

النوع الرابع : أبو ودان 

والنوع ده من الجيران هو أسوأ نوع ممكن تسكن جنبه

أو تحته أو فوقه .. أو على بعد عمارتين منه 

لأن الراجل ده بكل بساطة ربنا وهبه موهبة

مش هتلاقيها عند أحسنها عازف عود .. 

ودنه حساسة وبيلقط دبة النملة .. 

فتلاقيه بقى سامع كل كلمة بتقولها لإبنك ولا لمراتك

كل حاجة بتحصل ، كل حد دخل العمارة 

بيتعرف عليه من خطوة رجله ، ولو اللي دخل العمارة ده غريب 

بيعرف هو طالع أنهي دور من صوت فتحة باب الأسانسير 

بيعرف انت زعلان ولا فرحان ولا مضيق ولا خايف 

ولا متوتر من صوت نبضك اللي سامعه وهو في شقته 

لو عديت قدامه وقولتله السلام عليكم 

يعرف من نبرة صوتك انت رايح فين 

هل رايح تشتري حاجة ودماغك مشغولة بالفلوس والمصاريف 

وده باين في نبرة صوتك ولا خارج تقابل واحدة 

عارفها على مراتك وده برضه باين من نبرة صوتك 

وده التواجد معاه في عمارة واحدة مش مريح 

لأنه بيكون عارف عنك كل حاجة أكتر من نفسك 

يعني عارف اديت مراتك مصروف كام 

اتخانقتوا ليه .. صرفت في ايه وحوشت ايه 

ولادك مستواهم ايه في الرياضيات والعربي 

بتسمع أغاني ايه .. بتحب ممثل مين .. 

بتاكل امتى وبتشرب إمتى وايه 

لو حد فيكم شاف قبل كده أفلام من نوعية كوايت بلايس

وده للي ما شافوش فيلم بيتكلم عن عيلة عايشة 

في مكان مليان وحوش بتيجي تاكل اللي يطلع أي صوت 

فلو ما اتفرجتش على الفيلم ده وعندك جار بالنوع ده 

لازم تتفرج على الفيلم وتتبع كافة الإجراءات اللي اتبعها ابطال العمل

زي أولاً تمشي حافي .. في البيت بقى على السلم 

حتى لو كنت رايح الشغل انزل حافي والبس الجزمة 

لما تطلع من العمارة عادي يعني .. ثانياً تتكلم 

وتعود عيلتك كلها تتكلم بالهمس ، أو الأسهل 

تعلمهم لغة الإشارة وتتعاملوا بيها بقية عمركوا 

ثالثاً .. بالنسبة لست البيت تنقع كل المواعين 

لمدة يوم كامل في ماية سخنة علشان تسهل عملية الغسيل بدون صوت 

رابعاً تستغنى عن كل الأجهزة الكهربائية 

لا كاتل ولا تلفزيون أو ممكن تتفرج على أجنبي 

تقفل الصوت وتقرا الترجمة عادي .. ولا موبايل 

كمان تنسى انك تستخدم الدُش .. وتتعود تستحمى بليفة 

وجردل ماية بدون صوت تمامًا .. كذلك هتمتنع عن استخدام الأسانسير 

بالشكل ده هتعيش حياتك في أمان وسلام بعيداً عن ودانه 

ومش هيعرف عنك أي حاجة .. والمريح في الأمر 

إن ربنا ما بيديش كل حاجة ، فزي ما الجاى ده ودانه مقوية قلبه

أكيد رايح منه نعمة النظر ، فلو عديت قدامه وتجاهلته 

وانت كاتم نفسك وماشي على طراطيف صوابعك حافي 

مش هياخد باله منك ولا اكن حصل حاجة 

ولو ما سمعكش بتقول انت ومراتط هتاكلوا ايه 

فمش هيعرف لأن حاسة الشم عنده برضه أكيد مش أحسن حاجة

فتقدر تتبع الإجراءات اللي قولنا عليها 

وتعيش في سلام وأمان .. 

أنواع الجيران كتير ومنهم غير الأربع أنواع اللي اتكلمنا عليهم 

أنواع تانية كتير زي الجار العازب اللي مشكوك في أمره دايمًا

والمحسوك اللي واقف للسكن على الواحدة .. والوهمي اللي ما تعرفش

ان كان موجود في العمارة ولا مش موجود .. عايش ومش عايش 

ولكن ما نقدرش نعيش من غير جيران 

لأنهم زي ما قولنا أقرب حد يفرحلنا 

وأقرب حد يسندنا في حزننا .. 

ياريت لو مريت بتجربة مشابهة للي اتكلمنا عنه

في مقال النهارده تقولنا في الكومنتات

ولو تعرف حد فيه صفة من الصفات دي 

تعمله مينشن وخلي قلبك جامد 

وما تنساش تشترك في المدونة

علشان يوصلك كل جديد.. وبكده تكون انتهت مقالتنا النهارده

عن أنواع الجيران الجزء الأول 

استنونا في مقال جديدة .. 

وأشوفكم على خير