" ليه الدحيح ؟! "

عزيزي .. من أنجح البرامج اللي ظهرت على السوشيال ميديا

في الكام سنة اللي فاتت برنامج الدحيح 

واللي بيقدمه ، أحمد الغندور 

البرنامج اللي حصد ملايين المشاهدات

وغير فكرة كانت موجودة عند ناس كتير 

وأنه أعلى الڤيوهات دايمًا بتكون من نصيب 

أصحاب المحتويات التافهة واللي ملهاش قيمة 

على العكس تمامًا .. برنامج الدحيح حقق نجاح 

على مستوى العالم العربي كله 

وعمل قاعدة جماهيرية كبيرة جدًا .. طب هو مين الدحيح ؟

وليه نجح النجاح الباهر ده ؟ 

الدحيح .. هو أحمد وليد محمد الغندور 

شاب مصري من المنصورة خريج كلية العلوم 

من الجامعة الأمريكية بالقاهرة قسم الأحياء 

ودلوقت هو باحث ماجستير في جامعة هونج كونج 

بدأ الدحيح محتواه بشكل شخصي على اليوتيوب سنة ٢٠١٤ 

وكان هدفه تبسيط العلوم أو ما يعرف بالبوب ساينس 

يعني شاب مصري عادي جدًا عمل محتوى 

واستغل فيه قراءاته المتعددة وعلمه مع شوية سيرش وتحضير 

وكسر الدنيا.. ليه بقى ؟ واشمعنى الدحيح بالذات ؟ 

والله لما دورنا اكتشفنا ان النجاح الطاغي ده كان له أسباب كتير

أولهم ، الاستمرارية.. وإن الدحيح من ٢٠١٤ 

ولمدة قربت على العشر سنين 

بيقدم نفس المحتوى .. بنفس شكل الديكور 

بنفس اللبس تقريبًا ..اللبس الموحد اللي بيعكس شخصيته 

وده سبب ألفة عند الناس ، وبقوا متعودين عليه 

وعلى صوته وشكله وطريقته اللي بيقدم بيها 

تاني حاجة لازم نحطها في الحسبان إن الدحيح نفسه اتطور 

على مدار السنين دي بشكل كبير 

وده معناه انه ما بطلش يشتغل على نفسه 

وبعد ما كان بيقدم محتوى لوحده ، بقى المحتوى 

له شكل احترافي اكتر مع تنقله من منصة لمنصة 

ده غير متحف الدحيح .. اللي كان بيحكي الحدوتة 

في شكل درامي وكوميدي يجذب المشاهد 

وبالقاعدة دي الدحيح نفذ أهم شرط من شروط النمو 

(من لا يتقدم يتقادم ، من لا يتطور يترك بالخلف) 

تالت سبب وإن الدحيح على قد ما محتواه قد يبدو صعب 

ومعقد ومش مناسب لكل الناس .. إلا إنه 

قدر يوصل لكل الفئات حرفيًا عن طريق تبسيط العلوم 

يعني هتلاقي إن فيه حاجات كتير درسناه في المدارس 

لمدة طويلة اتكتب على ايد مختصين 

ودرسناها عن طريق مدرسين عندهم خبرات كبيرة 

وبرضه ما فهمنهاش إلا من خلال الدحيح 

اللي نزل لمستوى الطالب اللي ما بيحضرش

رابع حاجة فريق عمل الدحيح .. فريق عمل الدحيح 

فريق ضخم من الباحثين والمعدين 

كلهم كان عندهم رسالة واحدة وهدف واحد 

إنهم يوصلوا المحتوى العلمي المعقد ده 

لأقل دماغ في الوطن العربي .. 

خامس سبب في نجاح الدحيح هو 

قربه من لغة الشارع بس في نفس الوقت 

حافظ على لغته ومصطلحاته الشخصية 

محدش يقدر ينسى كلمة عزيزي اللي بترن في ودانا 

أول ما نشوف صورة الدحيح .. 

أو محدش يقدر ينكر إنه ما بصش على المصادر زي ما قاله الدحيح

السبب السادس لنجاح الدحيح وتفوقه 

هو نوعية المواضيع اللي بيناقشها 

واللي اتنوعت جدًا علشان تبقى ملفتة ومهمة 

لكل الفئات تقريبًا .. يعني زي حلقاته عن الفراعنة 

وإزاي خلال دقايق عرفنا التاريخ الفرعوني كله بشكل بسيط

أو حلقاته عن الحرب العالمية الأولى والتانية 

واللي ياما اتلخبطنا في أحداثهم .. 

ده غير الحلقات اللي بتتكلم عن ميسي وكرة القدم

واللي بتهم ناس كتير جدًا .. ما كانوش هيفهموها من غير الدحيح

وغيرهم أسباب كتير جدًا .. بس أساسهم إن ورا كل ده 

شخص مجتهد وقادر يكون مواكب لكل جديد 

وعنده أسلوب مميز خلاه على قمة صناع المحتوى في الوطن العربي

تم اختيار الدحيح لجائزة IBC العالمية سنة ٢٠١٩ 

كأكثر الشباب المؤثرين في الإعلام 

وده في حد ذاته وصول لهدفه اللي كان بيسعاله من البداية 

تبسيط العلوم .. 

الدحيح .. قدوة لشباب كتير في الوطن العربي 

حد قدر يجمع العلم بالشهرة وله محبين في كل حتة