" محطات في حياة الزعيم ، عادل إمام "

 

" محطات في حياة الزعيم ، عادل إمام "

العالم مليان بالزعماء السياسيين والثوريين 

وغيرهم كتير من اللي بيطلق عليهم لقب زعيم 

بس إحنا كمصريين ما عندناش إلا زعيم واحد بس 

دخل قلوبنا من أول مرة شوفناها فيه 

و كان سبب في رسم البسمة على وشوش ملايين البشر 

في مصر والوطن العربي والعالم كله 

الزعيم عادل إمام .. واللي حبينا نقوله بطريقتنا الخاصة

كل سنة وأنت طيب بمناسبة عيد ميلاده الموافق ١٧ / ٥ 

والحقيقة إن عادل إمام ما يكفيهوش حلقة واحدة للكلام عنه 

لكن إحنا هنمر على بعض المحطات في حياته المؤثرة 

إسمه بالكامل .. عادل محمد إمام محمد بخاريني 

من مواليد ١٧/٥/١٩٤٠ بحي السيدة عائشة بالقاهرة 

ولكن أصول أسرته من قرية شها مركز المنصورة

بمحافظة الدقهلية .. إتنقل عادل إمام في طفولته بين أحياء كتير

من السيدة عائشة للحلمية للعمرانية 

ويمكن ده كان له أثر رئيسي في تكوين شخصيته 

وبعد تخرجه من الثانوية دخل كلية الزراعة بجامعة القاهرة 

قسم علم الإنتاج النباتي ..وبدأ مسيرته الفنية من مسرح الجامعة

لعند ما وهو في سنة تالتة كلية .. وبيقدم أحد عروضه على خشبة مسرح الجامعة

في حضور أستاذ فؤاد المهندس واللي كان بيختار وجه جديد

للمشاركة في مسرحية أنا وهو وهي سنة ١٩٦٣ 

ومن بين ٩٠ ممثل إتفرج عليهم فؤاد المهندس .. اختار الزعيم

والحقيقة المسرحية نجحت نجاح كبير ودور عادل إمام علم مع الناس 

ولحد دلوقت ما نقدرش ننسى جملته (بلد بتاعت شهادات صحيح)

ومن هنا انطلق عادل إمام وبدأ يشارك في أدوار صغيرة في السينما 

لعند ما وصل عدد أعماله النهارده لـ ١٢٦ فيلم ، ١٦ مسلسل 

و١١ مسرحية .. ومسلسل إذاعي واحد بس مع العندليب

عبد الحليم حافظ بإسم (أرجوك لا تفهمني بسرعة) 

واللي ما كملش للأسف بسبب حرب ١٩٧٣ 

عادل إمام عنده ٣ أولاد .. رامي إمام المخرج المعروف

واللي قدم معاه أعمال كتير زي العراف وفرقة ناجي عطا الله

وصاحب السعادة ومأمون وشركاه وفالنتينو وعوالم خفية وعفاريت عدلي علام

وأمير الظلام و حسن ومرقص وغيرهم 

وإبنه التاني الكوميديان اللي ورث عن أبوه خفة الدم محمد إمام 

وسارة إمام واللي ما كانش ليها أي إحتكاك بالمجال الفني نهائيًا

وله ٣ أخوات .. عصام إمام المنتج اللي أنتجله 

الإرهاب والكباب والتجربة الدنماركية وعريس من جهة أمنية

وأمير الظلام والسفارة في العمارة 

وأختين هما منى إمام .. وإيمان إمام ارملة المرحوم 

الفنان مصطفى متولي ووالدة الفنان الشاب عمر متولي 

يمتلك عادل إمام ٨ أحفاد من أولاده التلاتة 

وفي تصريحاته أنه بيقضي أغلب وقته معاهم 

ومن الجوايز اللي حصل عليها الزعيم 

أفضل ممثل سنة ٩٥ عن دوره في فيلم الإرهابي من مهرجان القاهرة السينمائي

جائزة الأنجاز مدى الحياة من مهرجان دبي السينمائي سنة ٢٠٠٥ 

أفضل ممثل عن دوره في فيلم عمارة يعقوبيان

من مهرجان ساو باولو السينمائي الدولي سنة ٢٠٠٦ 

أفضل ممثل لأفلام السرد سنة ٢٠٠٦ من مهرجان تريبكيا بنيويورك

جائزة التانيت الذهبي من مهرجان قرطاج سنة ٢٠١٦

الوسام الوطني للاستحقاق في قطاع الثقافة 

من الرئيس التونسي الباجي قائد السبسي سنة ٢٠١٦

وجائزة الإنجاز الإبداعي في مهرجان الجونة السينمائي

في دورته الأولى سنة ٢٠١٧

كمان تم تعيين الزعيم كسفير نوايا حسنة 

بمفوضية الأم المتحدة لشؤون اللاجئين سنة٢٠٠٠ 

وانتشرت حوالين عادل إمام إشاعات كتير طول حياته 

ولكن أغربهم واشهرهم .. إنه مستعد يسدد ديون مصر 

بس صورته تنزل على الجنيه ..

 والحقيقة هو مش محتاج صورته تنزل على الجنيه 

لأن مفيش مصري ولا عربي ما يعرفش مين هو الزعيم عادل إمام