مراحل نمو الرجل المصري

 

مراحل نمو الرجل المصري 

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

أهلاً بيكوا مرة تانية في مدونتكوا ، وموضوع مقالنا النهارده

مراحل تطور ونمو الرجل المصري 

الراجل اللي بنشوفه حوالينا في كل حتة 

عامل نفسه فاهم في كل حاجة وعارف كل حاجة

الراجل اللي يكسر أجدعها إشارة طول ما مفيش ظابط واقف 

الراجل اللي مقضي طول حياته تايه 

بين ايه الصح وايه الأصول وايه اللي يريحني 

بعيدًا عن الصح والأصول خالص 

ومراحل تطور الراجل المصري يمكن تكون مختلفة 

عن مراحل تطور ناس كتير في دول تانية 

وحالة فعلا تستحق الدراسة علشان كده عملنالكوا الحلقة دي 

عن مراحل نمو الراجل المصري ، ويلا نبدأ على طول 

المرحلة الأولى : الطفولة المشردة 

ودي مرحلة كل طفل مصري وعربي مر بيها 

وبالذات جيل التسعينات والتمانينات 

هيفهموا كلامي كويس قوي .. الناس دي اللي اتولدت 

قبل ما يكون فيه موبايلات ووسائل ترفيه في البيوت 

الناس دي اتولدت من هنا وفضلت لمدة ٦ سنين 

محبوسين في البيت ما شافوش شكل الشارع

وفجأة تبدأ تنزل المدرسة تتفاجأ إن فيه ناس زيك كتير 

لبسك الرسمي كلوت مقيح وأي فانلة وشبشب بصباع 

ده لو ما كنتش بتضيع شبشب كل يوم 

حافظ الشوارع اللي حواليك طوبة طوبة 

وحافظ جيرانك واحد واحد وعيل عيل 

وما يشغلكش كل واحد فيهم شغال ايه 

قد ما يشغلك كل واحد فيهم بيعاملك ازاي 

من أول الجار اللي أول ما يشوفك يبصلك 

بصة معناها إنك مش متربي ومحتاج تتربى من جديد

لعند جارك اللي مجرد ما يسمع صوت الكورة 

في الشارع يتوكل على الله وينزل يشقها بسكينة 

أهلك بتشوفهم قليل .. اقل ما بتشوف كلاب الشارع

وبعد ما كنت ما بتخرجش م البيت ومتربي 

على إنك تقعد مربع ايديك ورجليك وكده انت مؤدب يعني 

بقيت ما بتدخلش البيت واللي يقولك وطي صوتك 

تسمعه من المنقي خيار .. صدمة حضارية فظيعة 

طفولة مشردة بمعنى الكلمة .. مفيش حاجة بتتعلمها 

مفيش مهارة بتكتسبها .. ما بتطورش 

ومطلوب منك تكون مؤدب قدام الضيوف 

بس مخربش وتجيب حقك من عيال الشارع

وتكون شاطر في المدرسة وصايع في البيت

علشان تأجل عمايل الواجب .. بتتفرج على افلام كارتون 

تجيب تخلف عقلي .. وحلمك تبقى بطل خارق 

تصحى تلاقي نفسك مازنجر مثلاً

بذرة مجنون .. جاهز للنمو في العالم وتطويره 

المرحلة الثانية : سن الغلاسة 

بعد ما تخلص طفولتك المشردة وتطلع منها 

بكام بطحة على ركبك من الجري ورا الكلاب 

وكام خربوش من عيل زنقك في بير السلم عجنك من الضرب 

يبدأ بقى يخطلك شوية قرف على شنبك كده 

اعرف انك دخلت في أسوأ عمر على مر التاريخ

سن الغلاسة وبداية المراهقة ، تلاقي صوتك اتغير 

بين يوم وليلة .. طولت .. بقيت حلوف ومعدوم الاحساس

وعندك برود يغير درجة حرارة غينيا بحالها 

أهلاً بيك .. ربنا يعين أهلك عليك 

وفي السن ده بتلاقي اهتماماتك اتغيرت تمامًا

وبدل ما كنت بتتفرج على كارتون والنمر المقنع والبلاوي دي 

 بقيت بتتابع مسلسلات وأفلام زي الكبار

بقيت بتشجع كورة بجد وعندك لاعيب مفضل 

وبقيت بتسمع أغاني .. لأ وبيحركوا مشاعرك كمان 

بتحب على نفسك أي روح معدية من قدامك

أي حاجة إسمها أنثى ، وتقريباً

كل يوم بتحب واحدة شكل وع الأغلب 

ولا واحدة فيهم بتعبرك .. وتحس انك منبوذ 

لا أهلك طايقينك ولا انت ناجح في دراستك 

ولا انت فاهم ايه اللي جابك هنا

فترة وتعدي تلاقي نفسك فجأة بعد ما كان 

بيتقال عليك من عشر دقايق ده عيل 

ونفسك تكمل لعب .. بقى بيتقال عليك انت كبرت 

وبقيت راجل ومفيش راجل بيعيط ولا فيه راجل بيلعب 

ومفيش راجل بيتقمص وانت ما جيبتش من الرجالة 

غير تهمة اتهموك بيها ومسؤولية انت مش قدها

ومفيش ومفيش .. ومفيش داعي يا جماعة .. 

تلاقي نفسك بتقول لنفسك ياريتني ما كبرت .. بس خلاص راحت عليك 

المرحلة الثالثة : الدراسة (نهاية الكون) 

في نهاية سن الغلاسة ما بين ال 10 سنين لسن 14 سنة 

بتبدأ تحط رجلك في مرحلة الثانوية العامة 

وتكتشف انه قدامك 10 شهور بس 

على حسب كلام الناس اللي حواليك 

هما اللي هيحددوا مستقبلك كله 

تخيل 10 شهور على كلامهم ممكن يخلوك 

إنسان فاشل أو ناجح .. فقير أو غني 

معاك فلوس أو مفلس .. محترم ولا مهزأ

بيحددوا مستقبلك حرفيًا وكل خطوة في حياتك اللي جاية

بيترتبوا على العشر شهور دول .. 

والمفروض انك تاخد قرار وتختار مستقبلك من دلوقت

ازاي بس يا جماعة ؟ ده انا من كام يوم كنت عيل تافه 

بجري ورا كلاب السكك .. فجأة بقيت مسؤول 

عن مستقبلي ولازم احدده خلال كام شهر 

ويا جات يا راحت .. أهوه هو كده .. 

وطبعاً الناس دول بيكونوا غلطانين بس انت ما تعرفش 

ومضطر تمشي وراهم وانت مغمض 

فتتحول حياتك بعد ما كانت لعب كورة 

وتزويغ من المدرسة وكلام فارغ 

لمذاكرة ودروس وكمية معلومات لازم تحشي 

دماغك بيها مهولة وفي وقت قصير 

وأسئلة لازم تعرف كل إجاباتها

لازم تعرف أين تنمو حشائش السافانا 

لازم تعرف أي دولة بتصدر ألمونيوم 

وأنهي بتستورد شبت وكسبرة .. 

لازم تعرف مين اللي قتل كليبر 

وقتله ليه وازاي ؟ ولازم تعرف الرمز الكيميائي

لمحلول كربونات البوتاسيوم يمكن تحتاجه في حاجة 

لازم تعرف كل حاجة عن كل حاجة تقريبًا 

علشان تبقى جاهز ليوم الامتحان انك تروح ترجع 

الكلام ده على ورقة وتكتب عليها اسمك 

وتديها لمراقب يحدد بناءاً على المعلومات 

اللي انت رجعتها دي مستقبلك .. وإن كنت 

إنسان كويس يستاهل يعيش عيشة كويسة 

ولا لأ .. مبدأ غريب جدًا.. وتقعد بقى شهرين اجازة 

تستنى النتيجة .. شهرين بيمر منهم أول شهر و 20 يوم بسرعة البرق

واخر 10 أيام بتوع النتيجة دول بيمروا أكنهم عشر سنين

مستني قرار تغيير حياتك يا للأحسن 

يا يكون مصيرك الشحاتة والتشرد 

وفي الآخر تاخد على وشك .. يا إما تدخل كلية من كليات القمة 

فتضيع عمرك وشبابك كله فيها وتطلع تناضل 

علشان تاكل عيش .. يا إما تدخل كلية من كليات الشعب

وتنجز نفسك وتطلع تناضل برضه علشان تاكل عيش 

وهي هي تقريبًا شبه بعضها 

فتندب حظك انك اتولدت .. وتدعي على نفسك وتقول 

يا ليتني كنت تراباً 

المرحلة الرابعة : المفرمة 

بعد ما طلعت عينك في الثانوية .. وكل الناس وعدتك 

إنك تتعب في الثانوية ترتاح في الكلية وتعرف ان كلهم كدابين 

وتفقد الثقة في كل اللي حواليك .. تحاول تجتهد في الكلية شوية 

وبعد نتيجة أول سنة تقعد مع زمايلك وتكتشف اكتشاف رهيب 

إن اللي بيحضر ويذاكر كل يوم زيه بالظبط

زي اللي بيلخص وبيشوف باب الكلية يوم الامتحان بس 

هما الاتنين بيجيبوا مقبول ، الأهم انك تعرف تعدي الإمتحان 

فيبقى هدفك في الحياة انك تخلص كليتك على خير 

على أساس إنك بالشكل ده هترتاح من كل مصاعب الحياة 

بعد الكلية .. ما تعرفش إن الخوازيق لسه بتتسن 

وبتستعد علشان تخزوقك .. تتخرج من هنا ولسه بتقول هيه 

تلاقي نفسك لابس جيش .. كل الناس تقولك 

معلش أيام وهتعدي ولازم تعدي على وشك 

تقول لنفسك بس .. يخلص الجيش

وكل حاجة هتبقى حلوة .. وتقول لنفسك نفس الجملة 

بعد الجيش كل مصاعب الحياة هتهون وترتاح 

تخرج من الجيش ترتاح يومين في البيت 

وتبدأ في مرحلة التوهان .. تايه وداير بالسيفيهات 

بتاعتك بين الشركات علشان حد فيهم يقبل يشغلك 

بخبرتك اللي مش موجودة أساسًا 

عبد ب ١٠٠٠ جنيه في الشهر 

تصرفهم في اول يومين تلاتة وتشحت طول الشهر

فتبدأ تدور على شركة غيرها .. ومن شركة لشركة 

لعند ما تلاقي نفسك في مفرمة أوسخ من كل اللي فات 

مطلوب منك تجهز نفسك علشان تتجوز 

برغبة كل الناس اللي حواليك وزنهم عليك 

يلا مد ايدك في جيبك وطلع مليون جنيه

علشان تجيب شقة وعفش وتعمل فرح ونيش 

طبعاً النيش قبل العروسة نفسها 

يا جماعة مليون جنيه ايه .. ده انا مديون بفلوس 

مواصلاتي للشغل لطوب الأرض .. 

ده انا كنت من كام يوم بس بجري بالكلوت 

ورا العيال في الشارع .. ملناش فيه انت مش راجل 

ولا ايه ؟ يلا نجوزك .. يلا خلف .. يلا ربي .. 

الله .. طب مش لما اتربى أنا الأول .. 

يلا علم العيال .. جهزهم .. جوزهم .. 

لعند ما تلاقي نفسك طالع معاش ولا حد بيسأل عليك 

ولا حد بيسأل فيك.. فتعرف إنك انضحك عليك في الحياة دي 

المرحلة الخامسة : ع المعاش 

خلاص العيال اتجوزوا وعندك دخل يدوب 

تاكل بيه عيش وجبنة وتقعد على القهوة 

تسب للاعيية المنتخب اللي لسه متعشم 

انه يعمل حاجة في كاس العالم قبل ما تموت 

أهلاً بيك في مرحلة المعاش .. مرحلة الروقان الحقيقي 

أنا شايف إن المرحلة دي هي المرحلة الاروق 

في حياة كل راجل مصري في حالتين اتنين

عنده اللي يعيش منه .. لسه عنده شوية صحة 

مخلينه يمشي من غير عكاز وضهره مفرود 

الناس بتعاملك انك راجل كبير 

لا بتقف في طوابير ولا في مترو ولا غيره 

ولا بتلتزم بأي دور وليك استثناءات 

تقول اللي انت عايزه والكل يحترم كلامك 

حتى لو كان غلط .. تزعق للي انت عايزه 

والكل يسكت ويهابك .. يتحجزلك أحسن مكان 

في القهوة وبتتعامل انك بركة ووجودك مهم 

أو ممكن تتعامل انك شوجر دادي لو معاك قرشين حلوين 

وعربية حلوة .. بس طول ما انت بره البيت 

فانت مبسوط وعايش ومندمج مع الناس

ترجع البيت تحس بوحدة رهيبة .. تتأكد ١٠٠٪ 

إنك لتاني مرة انضحك عليك وان مفيش 

حد بياخد كل حاجة وان كل مرحلة من مراحل نموك 

كراجل مصري فيها شوية حاجات حلوة 

والباقي وحش للأسف .. وكل أملك في الدنيا 

تقفل موبايلك وتناملك يومين تلاتة 

مراحل نمو الراجل المصري مهما اتغير مكان وجوده 

أو طبقته الاجتماعية فهي واحدة .. 

مفيش راجل مصري الا وهيمر بالحاجات دي 

فالمطلوب منك تعيش حياتك بضمير

وتنبسط بكل سن بتعيش فيه .. وتسلمها لله

وبكده تكون انتهى مقالنا النهارده

ياريت لو بتمر بمرحلة من المراحل دي 

تقولنا في الكومنتات وما تنساش

تشترك في المدونة علشان يوصلك كل جديد