أنواع الجواز !

  

أنواع الجواز !

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا ..  

 

أهلاً بيكوا مرة تانية في مدونتكم ، وموضوع مقالنا النهارده

الطموح الأول والهدف الرئيسي لكل إنسان مصري

الحاجة اللي بتتعلم علشانها وبتشتغل علشانها 

وبتتغرب علشانها .. وبتمضي على وصولات أمانة علشانها 

وأحياناً بتخش السجن علشانها .. الحاجة اللي لو سألت أي مصري 

هتعمل ايه لما اتخرج وقالك هدخل الجيش هسافر 

ههاجر هتاجر ، في الآخر يقولك هتجوز .. 

الجواز يا جدعان ، حد يخبطني بحجر على نافوخي يفقدني الذاكرة

الجواز ، الصخرة اللي بيتحطم عليها أمال وأحلام كل الناس 

اتجوزت .. خلاص بقى روح الشغل وارجع من الشغل 

لا تقولي دكتوراه ولا نجاح ولا كارير ولا الدموع 

لا للأمانة الدموع موجودة وبغزراة .. 

البت تتولد من هنا تلاقيها نفسها تروح الفرح 

علسان تشوف العروسة ، مش علشان الفرح نفسه 

والولد شنبه يخط من هنا يبدأ يقولك لما أتجوز هعمل وأسوي 

طيب يا حزين يا أبو شخة .. إقلع البامبرز الأول 

الجواز يا جماعة ، هو الهدف الأول والأخير .. 

اللي مفيش بعده أهداف ، لو انت هالاند نفسه 

هتبطل كورة وتسرح بتوك وامشاط وفلايات 

الجواز وما ادراك ما الجواز .. الخدعة الأكبر في حياة كل الناس 

اللي بيكونوا فاكرين انهم هيقضوها ضرب بالمخدات 

والريش يطير حواليهم .. ولا سهر قدام أفلام وأكل فشار

أحب أقولك إن مفيش مخدات بتطلع ريش ولو حصل 

هتنزل تلمهم ريشة ريشة قبل ما مراتك تعمل منك بطاطس محمرة 

ومفيش سهر علشان عندك شغل بكره بدري 

ولو اتأخرت هتتفشخ وتتشرد انت والمدام تلموا كنزات وقزايز بلاستيك 

والجواز أنواعه وأغراضه كتير ومختلفة وخصوصاً هنا في مصر 

و عن الجواز وانواعه.. طبعًا ما بنقصدش هنا الأنواع اللي نعرفها

من الجواز العرفي ولا الرسمي ولا حتى جواز السفر 

احنا نقصد انواع الجواز على حسب الغرض منه 

النوع الأول : جواز المصلحة 

وجواز المصلحة هو النوع الأقدم على مر التاريخ 

يعني تلاقي دولتين ولا مملكتين مقطعين بعض

بقالهم مئات السنين وقربوا يخلصوا والبيوت فضيت من الرجالة 

وتفضل الحرب دي دايرة لعند ما إبن الملك ده وبنت الملك دي 

يبلغوا .. يجوزوهم لبعض والعجل هد المصطبة ومش عارف إيه 

وبين يوم وليلة كل الحروب والحوارات اللي بينهم تهدا 

وكأن ما حصلش حاجة ، والموضوع ده متكرر وقديم 

لدرجة اننا فضلنا عمر كانت كل حبكات مسلسلاتنا وأفلامنا

أساسها الحدوتة دي .. واحد بيحب واحدة 

بس هما غاصبينها على الجواز من إبن شريك بابا الغني

علشان يكبروا شراكتهم أكبر ويحافظوا على المال 

ويبقى زيتنا في دقيقنا .. مع العلم إن دي حاجة مقرفة جدًا

إلا لو كنت بتعمل كيكة اسفنجية 

والجواز للمصلحة ، في كل الثقافات والأعراف 

يعني عيل عربجي يجوزوه بنت شيخ بلد 

علشان ينقذه لو اتلط في مشكلة 

ولا يقعدله في قاعدة عرب ويطلع الغلط على كل الناس الا هو 

ولا مدرس يجوز إبنه لبنت المدير فما يشطبش عليه لو غاب

وما يجازيهوش لو عمل حاجة غلط .. وهكذا 

فهل الجواز للمصلحة يختلط مع الكوسة ؟

طبعاً .. ده هو أساس الكوسة .. تتجوز بنت رتبة 

تخلف عيل يدخل شرطة ، ويغير مستقبل عيلتك كلها 

تتجوز بنت مدير شركة بترول تبطل غربة وسفر 

وتشتغل براتب مش هتاخده في نادي النصر السعودي 

هيه ماشية كده من أيام مملكة أطلانتيس وهتفضل كده 

والجواز من النوع ده هو اللي بينطبق عليه المثل اللي بيقول

يا واخد القرد على ماله يروح المال ويفضل القرد على حاله 

أيوه ما هو قرد .. وهي الفلوس هتغير القرود ؟ 

هتقولي آه عمليات التجميل النهارده ما خلتش .. مظبوط 

بس لو والنبي لو عملت إيه الجينات بتفضح 

فالقرد ولا القردة هيخلفولك قرود مطابقين للنسخة الأصلية 

فهيبقى شكلك إيه وانت حلو وهي حلوة .. ومخلفين قرود 

هيتقال عليكوا خاطفينهم .. لعند ما يشوفوا صور مراتك القديمة

فعمر ما القرد يبقى غزال إلا في حالة واحدة بس 

في عين أمه .. لكن بالفلوس .. استحالة

جواز المصلحة من اشهر الانواع اللي بنشوفها في كل حتة حوالينا

ومنتشر في كل المجالات ، متوغل كده كالنار في الهشيم

 عايز تحلق ببلاش طول حياتك انت وعيالك هتناسب حلاق

عايز تاكل لحمة طول الشهر هيتجوز بنت الجزار 

مش محتاجة يعني.. 

والنوع ده من الجواز مش دايم زي مال القرد كده 

لان بعد وقت بتتغير المعايير فاللي كان متجوز واحدة علشان فلوسها

يا اما بيزهق وما بيستحملش يكمل عيشته معاها فبيبعد

يا اما ما بيعرفش يستفيد بالطريقة اللي عايزها فبيبعد برضه

يا إما بتهينه ويعيش حياته ينزل الزبالة معاه 

لعند ما بيجي يوم ويكره سيرة الجواز والفلوس 

وعربية الحي بتاعت الزبالة .. ويشنق نفسه 

واللي كان متجوز واحدة علشان شكلها وتبقى واجهة اجتماعية له 

بيجي يوم وبيحس انها عروسة بلاستيك ولو استحمل كتير 

بعد سنين مش هتبقى هي هي نفسها اللي اتجوزها في يوم م الايام

كله بيكرمش يا ابني وبيدهن فولتارين بعد كده وكلها شبه بعضها 

ده احنا ما تطرقناش ان الحلوة بتوحش والتخينة بترفع 

والرفيعة بتتخن .. ده احنا بس بنتكلم على مصلحة وارد ما تدومش 

يعني ووارد إنك بمجرد ما تدخل عليهم البيت بالشمال 

ويكونوا في ثراء فاحش تفقرهم .. وتجيب درفها 

ساعتها هتدور على زوجة تانية تفلسها ، ولا هتشحت انت والمدام 

فالجواز للمصلحة أفشل من الجواز نفسه كنظام 

النوع الثاني : تكفير ذنوب 

والنوع ده من الجواز على قد ما هو بيعذبك

على قد ما هو بيخليك ترجع لربنا .. وتتوب على ما فعلت 

وتندم يا مفتري يا اللي ما تعرفش ربنا 

وهو البديل للسجن .. اللي معروف عنه إنه تهذيب وإصلاح 

أهو ده أنقح .. ده تهذيب وتربية وإصلاح 

ودايت ومرار طافح وندم على اللي فات وخوف من اللي جاي 

والنوع ده من الجواز انت فيه لا حول لك ولا قوة 

لانك ما بتكونش انت صاحب القرار 

 او بتفكر فيه وبتقرر انك تاخد الخطوة وتتجوز ..لأ 

ده من أعمالك السودا سلط عليكم ، 

ومن كتر ما انت رازيت خلق الله 

وعملوا معاك البدع علشان ترتجع ..

 ربنا بيحطك على المسار الصحيح 

المكان اللي هيربيك بجد ، واللي هيخليك تقول قي برقبتي 

وبعد ما كنت تمشي في الشارع تخوف الناس 

والأرض تتهز تحتيك .. بقيت ماشي باصص في الأرض 

لو حد نده اسمك تترعب وترتعش وعينك تدمع 

وبتتلفت حواليك في كل حتة .. خايف مراتك تلمحك فتمرجحك 

وتبدأ معاك التحقيق .. كلمت مين ؟ وقفت مع مين ؟ 

اتأخرت ليه ؟ .. فتمشي مكسوف تبص في وش حد لا يعرفك  

والجواز من النوع ده زي ما قولنا ما بنختاروش .. ولا بيتم بإرادتنا

لا ده زي القضا المستعجل.. بيقع على دماغك من كتر افعالك السودا 

حاجة كده تخفف عنك عذاب الاخرة بسبب العذاب اللي شوفته في الدنيا

وحواز تكفير الذنوب عكس جواز المصلحة في حاجة مهمة جدًا

إن الجواز ده بيدوم .. ولمدة طويلة جداً ، طول ما انت بتسمع الكلام 

فاحنا مكملين مع بعض ، ابتديت تعترض ، فهتسمع الكلام غصب عنك 

بس فيه احتماليات ضئيلة تخليه ممكن ينتهي 

لو انت توبت توبة نصوحة بجد ، ومع كام سنة قيام ليل 

ربنا يزيح عنك إن شاء الله .. وترجع سنجل حر نفسك 

وجواز تكفير الذنوب مش كله عيوب .. 

لا ده له مميزات كتير كمان .. 

النوع ده من الجواز بيقصر العمر صحيح 

ولكن بيخليك في تواصل دائم مع ربنا 

يعني بتلاقيك دابمًا بتذكر الله ولسانك رطب بالذكر

يعني لا حول ولا قوة إلا بالله او حسبنا الله ونعم الوكيل 

وطبعًا استغفر الله العظيم استغفر الله العظيم 

فعلى قد ما هو مضر ولكن بيرفعك درجات وأخرتك حلوة بإذن الله 

ولو مت قبل مراتك هتبقى مبتسم ووشك منور 

وخرجتك إيه .. تلاقي النعش طاير بيك كده 

ولو صبرت بقى ياااه على الجزاء والثواب اللي هتاخده 

ده انت يتبنيلك قصر في الجنة 

إنما بقى لو رجعت لأفعالك اللي كانت قبل الجواز 

هتلاقي قسوة مراتك وشدتها عليك بقت أضعاف 

وبدلت الشبشب أبو وردة لقبقاب خشب زان 

يخرشم مش يلسع .. انت اعمل حسابك في بيتادين وشاش وقطن كتير

ويمكن يجيلك عيل يجيب أجلك ويجلطك بالمرة 

وتخلص من الحدوتة دي خالص 

جواز تكفير الذنوب اتعمل لكل شاب فاكر انه جاب أخرها 

ومقطع السمكة وديلها ، وإنه اللي مفيش منه اتنين 

ونهايته يا السجن يا مستشفى المجانين 

النوع الثالث : تخليص حق 

والنوع ده من الجواز بتلاقيه في حالات كتير حوالينا 

بس محدش بيقول لان اللي هيقول هيزعل 

فتلاقيه بيتم في غرف مغلقة ، ومحدش بيعرف إلا الأطراف أصحاب المشكلة 

وبيفضل سر بين العيلتين مدى الأمد

والأمثلة عليه كتير لا تعد ولا تحصى 

يعني تلاقي عيلتين بينهم خلافات الدنيا.. 

والعيال مقطعين بعض بسنج تلمة 

وبيباتوا في الأقسام أكتر ما بيباتوا في البيت 

وعلشان يخلصوا من سلسال الدم ده 

لازم يجوزوا حد من العيلة دي للعيلة دي 

ملهومش دعوة بقى انت وضعك إيه 

بتحب.. بتجهز نفسك.. بتشتكي من مشاكل عضوية لا مؤاخذة 

انت هتسمع كلامهم ورجلك فوق رقبتك

ما يهمناش انت خريج إيه ؟ قاعد في شقة ولا في الشارع 

شغلتك إيه ؟ ما يهمناش اسمك ولا العنوان 

يهمنا الإنسان .. إنت إنسان .. ذكر 

وإنتي إنسانة أنثى أو هنعرف بعدين

يلا اتجوزوا وخلصولنا الحدوتة دي 

وجواز تخليص الحق ممكن ما يكونش منعاً للمشاكل بس 

لا هو كمان ممكن يكون منعاً للإفلاس 

يعني أبو العروسة ماضي كمبيالات بمبلغ مهول 

وبدل ما يتحبس هو يجوز البت لإبن اللي ماضيله 

ويستغنى عن المهر والشبكة وخلصنا 

وتعيش خدامة تحت رجلين بهايم العيلة عادي

المهم أبوها ما بيتحبسش .. طب هي ذنبها إيه ؟

ليه تضيع مستقبلها في زريبة الديّانة ؟

انت راجل فاسد شربت بالفلوس بانجو

هي ذنب أمها إيه بس ؟ يقولها اخرسي يا بت 

ولما الرجالة تتكلم البنات يحطوا في حنكهم جزمة قديمة 

وتتشحن البت على بيت اللي شاريها زي البهيمة 

وتعيش ذل ما شافتهوش نادية الجندي في تل أبيب 

والنوع ده من الجواز.. بيكمل وبيعيش اكتر من اي نوع

لان لو جه يوم لا قدر الله وانتهى هتطير معاه رقاب

والعيلتين هيطلعوا على بعض القديم والجديد 

فالزوج والزوجة مضطرين يكملوا حياتهم في وش بعض 

حقنًا للدماء 

النوع الرابع : ناكر ونكير 

والنوع ده قايم على شوية أسئلة وردود لو موجودة في مكانها 

يبقى تمام احنا نتجوز ونعيش سعدا

تحس انك هتتجوز اتش آر ولا مأمور ضرايب 

ولو إجابات الأسئلة دي لا قدر الله مش موجودة

 يبقى كل شيء نصيب ومبروك عليكوا الجاتوه 

كم اسئلة بقى.. لو لينا عمر هننزلكوا نماذج إجابة ليها 

زي شغال ايه ؟ بتقبض كام ؟ 

عندك شقة ؟ في الدور الكام ؟

هتجيب شبكة ؟ بكام ؟ 

وهكذا.. لو الاسئلة دي اتجاوبت صح فمبروك 

غلط فالله يبارك فيك 

النوع ده من الجوازات زي ما بيبدأ بأسئلة

 بيكمل ع الوتيرة دي طول العمر مع تطور العلاقة

فالخطوبة مثلا بتحب ايه ؟ بتكره ايه ؟ 

بتاكل إيه ؟ بتنام وسايبني ليه ؟ 

رايح فين ؟ جاي منين ؟ بتكلم مين ؟ 

مين اللي عاملالك لايك على صورتك دي ؟

دي أمي .. عندها كام سنة ؟ 

وبنفضل مكملين على كده .. بعد الجواز.. كنت فين ؟ بتكلم مين ؟

برضه ؟ .. اه ما هي دي أسئلة إجباري مش إختياري 

وهتلاقيهم متكررين في كل مرحلة بنمر بيها 

هتاكل إيه النهارده ؟ طب بكره ؟ 

هتخرجني فين ؟ هي فردة الشراب دي فين ؟

هو الأكل مالح ليه ؟ ماسخ ليه ؟ 

أسئلة في أسئلة تحس إنك في إمتحان 

ولا مقدم على هجرة ومستني دورك 

بعد أول عيل .. أخلف طبيعي ولا قيصري ؟

هنسميه إيه ؟ على إسم مين ؟ 

هنرضع طبيعي ولا صناعي ؟ وهنجيبه بكام ومنين ؟

هنلبسه بامبرز بكام ؟ وهنلاقيه فين ؟

هندخله حكومي ولا لغات ولا انترناشيونال ؟

خد بالك كل إجابة لكل سؤال من دول بفرق لوكشة فلوس 

مش أي كلام بيتقال .. مش بتحبيني اه والله وخلصنا 

طيب ما حصلش نصيب بين الطرفين ده من حسن حظهم 

تفتكروا سيل الأسئلة دي بيخلص ؟ لأ طبعاً 

فتلاقي بعد الطلاق الأسئلة بقى شكلها 

هتديني نفقة كام؟ وهشوف ولادي كام مرة في الشهر ؟

أنا هاخد البنت وانت خد الولد .. وأنا هاخد الشايب 

والعمر بيخلص في أسئلة .. ولو خلص العمر 

والزوجين دول مع بعض .. تلاقيهم وهما على فراش الموت 

بيمارسوا نفس العادة المنيلة بنيلة .. 

لو دخلت الجنة هتختار حور العين ولا هتختارني ؟

هتسامحني ؟ هتتجوز بعدي ؟ يا ستي ما انا بموت معاكي أهوه 

هتجوز إمتى وإزاي بس ؟ 

طب لو موت قبلك هتجيب للولاد مرات أب ؟

يا ستي العيال نفسهم طلعوا ع المعاش .. 

مفيش فايدة .. هي عادة واتفقوا على إن حياتهم

ما بتمشيش الا بيها من قديم الأزل 

وإستحالة يبطلوها .. جواز ناكر ونكير .. بيعودك تكون جاهز 

جاهز دايمًا بإجاباتك النموذجية المظبوطة 

لأن كل مرة بتجاوب فيها غلط بتشوف ليالي طين 

وبيعلمك كمان إن العلم نور .. فتقعد تذاكر وتتعلم من أخطاءك 

وبيعلمك إن اللي بيروح ما بيرجعش 

لأن السؤال اللي مش هتجاوب عليه صح 

هتثبت اجابته في مخ مراتك مدى الأمد 

ومهما حاولت تغير الإجابة بعد كده 

ولا تعمل تظلم ، تلاقي نفسك بتخسر وبتقل في نظرها 

لانك بتغير في كلامك .. ما هو للأحسن يا ستي .. ولو 

جواز ناكر ونكير بيحسسك إنك متجوز وكيل نيابة 

ناقص بس تلاقي راجل قاعد جمب المدام 

ساند على الكومدينو والمدام بتمليه 

وفي ساعته وتاريخه قررنا نحن .. 

جواز ناكر ونكير كان آخر نوع في حلقتنا عن أنواع الجواز النهارده 

وبالشكل ده تكون انتهى مقالنا

ياريت لو مريت بتجربة مشابهة للي اتكلمنا عنه النهارده

قولنا في الكومنتات ما تتكسفش 

وياريت ما تنساش تشترك في المدونة علشان يوصلك كل جديد

وبارك الله لكما وبارك عليكما وجمع بينكما في خير