شغلانات غريبة .. أغرب المهن في المجتمع المصري

 

شغلانات غريبة .. أغرب المهن في المجتمع المصري

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

أهلاً بيكوا مرة تانية في مدونتكم ، وموضوع مقالنا النهارده

عن أنواع معينة من الشغل موجودة حوالينا في كل مكان 

من غرابتها وندرتها كان لازم نعمل عنها حلقة 

أنواع من الشغل ما أنزل الله بها من سلطان 

ولا تعرف الناس دي أصحاب الشغلانات دي اتعلموها فين 

يعني معروف تدرس تربية تبقى مدرس 

تدرس هندسة تبقى مهندس .. تدرس طب تبقى دكتور 

وهكذا يعني .. لكن فيه حوالينا شوية شغلانات غريبة 

لا عمرك هتعرف سكة تتعلمها منها ، 

ولا عمرك هتلاقي فيها تخصصات .. وفلان شاطر او خايب

هي باكيدج كده على بعضها ، بتبدأ الأول من صفاتك الشخصية

وبعدين تشتغلها يوم في التاني تلاقيها ماشية تبقى هى الكارير بتاعك

طول عمرنا نعرف ان الناس بتشتغل علشان تعيش 

وفيه منهم اللي بيشتغل أكتر وأذكى علشان يعيش أحسن

انما بقى من وسط المألوف ظهرت أنواع شغل غريبة

ومحدش يعرف ظهرت منين.. 

النوع الأول : السايس 

السايس يا جدعان عمرك ما هتلاقيه في حتة تانية 

لو لفيت العالم تلات مرات الا في مصر 

ولما تيجي تبص لمؤهلات الشغلانة هتلاقي التالي 

حد يكون بيعرف يتكلم.. مش لسانه حلو.. لأ خالص

هو حد عنده القدرة على الكلام مش أكتر 

يكون بيعرف يمشي.. ومش مشية معينة 

لا هو مش هيمشي على الريد كاربت.. 

لا هو حد بيعرف يمشي وخلاص

ولازم يكون بيعرف يعمل بإيده حركتين 

هات ورا وبس.. طبعًا ممكن يكون بيعرف يصفر.. يبقى مميز قوي 

لما تيجي تدور على لازمة السايس في المجتمع 

هتلاقي انه مفيش.. ايوه حرفياً ملوش لازمة 

يعني عربية عملها الخواجة فيها امكانيات تخليك تعرف تركنها

وسواق معاه رخصة بتقول انه بيعرف يركن 

انت بقى بتعمل ايه ؟ لا بجد ؟ 

ولو حد اتفرج على فيلم همام في أمستردام

هتلاقي همام اللي بيرمز لكل مصري فهلوي 

معدوم الإمكانيات والخبرة ، أول ما حطت رجله في أمستردام

قرر يشتغل باركينج اند كليننج ، 

يركن العجل وينضفه ، وده كان سبب كافي للقبض عليه 

فده معناه ان دي شغلانة ملهاش لازمة 

ما هو علشان تدخل فلوس لازم تقدم قيمة 

لكن تقلب الناس رايح جاي فلوس مقابل 

انك بتشاور لهم يركنوا فين .. دي غريبة بصراحة 

والأغرب بقى إنه بعد ٢٠ سنة من انتشار السايس 

هتلاقي أصحاب عمارات وناس أغنيا جدًا 

بنوا ثروتهم من الشغلانة دي .. ما تنساش تبل شهادتك 

و.. لا مؤاخذة تشرب مايتها 

النوع الثاني : رجل المنديل 

والنوع ده من الوظايف هتقابله على مدار اليوم في اماكن كتير

يعني راكب اتوبيس هتلاقي حد طالع وراك بمناديل 

راكب مترو نفس الكلام 

دخلت تقعد في قهوة.. نفس الحكاية 

انما انا بقى بستغرب من المطاعم اللي بتوقف على باب حمامها 

شاب ماسك منديل.. ما هو انا داخل الحمام واكيد عامل حسابي 

يا اما انا معفن بقى.. وبعدين راح الاستغراب لما عرفت

ان المطعم لو سابلك جوه المناديل ممكن تفرتكها في يوم 

انما الراجل ده وظيفته انه بيدي كل زبون منديل واحد بس 

والنوع ده من الوظايف بيحسسك انه المنديل مش بالنسبة له سلعة

لأ.. ده منديل إصحى .. ده وسيلة للربح  

عايز تعرف ازاي ؟ .. ادخل اي مكان من دول

 ومجرد ما يدخلك شحات بمناديل اديله فلوس وخد مكانها منديل 

هتلاقيه زعل قوي قوي .. لو حتى كتبتله شيك على بياض

لأنك كده هتضطره يشتري مناديل تانية يستخدمها للترويج لصنعته 

اللي هي ايه بقى ؟ شحات متخفي ..  

فلذلك هتلاقيه معاه اصدارات من المناديل بطلوا يصنعوها 

لأنها في ايده بيشحت بيها من سنة ٨٠

النوع الثالث : كل سنة وانت طيب 

والنوع ده من الوظايف هو اغرب حاجة في كوكب الأرض

يعني تلاقي حد داخل عليك في أي حتة وخصوصاً على أبواب المصالح الحكومية

تلاقيه مقابلك بإبتسامة عريضة وكأنكوا تعرفوا بعض من سنين 

وبيسلم عليك و يقولك كل سنة وانت طيب 

كده بدون سبب او تاريخ معين أو مناسبة 

يعني لا هو عيد فطر ولا أضحى ولا رمضان

ولا طلعة رجب ولا تحرير سينا ولا أي حاجة

يوم تلات مثلاً ملوش لازمة.. طب يا سيدي وانت بالصحة والسلامة  

والنوع ده الحلو فيه بتلاقيه موجود دايماً

 في الاماكن اللي ممكن يحصل فيها ولو احتمال بسيط حاجة تفرح

يعني تلاقيه على باب المرور لو انت نجحت واخدت رخصة 

تلاقيه على باب مستشفى ولادة .. قدام سفارة وممكن تاخد فيزا

 في الأماكن دي اللي هي فيها احتمالية تخرج منها مبسوط ١٪

والنوع ده عنده فراسة رهيبة.. يعني مجرد ما يبص في وشك

كده من بعيد يعرف حاجة من اتنين 

تايه محتاج حد يدلك ، وطبعاً هو ابن الحلال اللي هيقولك القرد مخبي ابنه فين

ما هو بايت هنا من سنين 

ولكن مش لله .. هو هيجاوبك بفلوس 

والحاجة التانية يقدر يعرف هو انت مبسوط ومجبور الخاطر

وخلصت مصلحتك جوه المكان  

فيقولك كل سنة وإنت طيب 

ولا الدنيا جاية عليك والموظفين عملوها معاك 

وانت بالصحة والسلامة فعلاً 

وطبعاً هو ما يقدرش يقولك هات فلوس كده خبط لزق

لأ ده هو بيقولك كل سنة وانت طيب ومبسوط كده 

فخليني مبسوط معاك بقى .. ولا إيه ؟

طب ما هو لو انا في نيتي ادي فلوس لحد 

الأولى ادي للراجل اللي خلاني مبسوط 

وما تقنعنيش اني علشان قابلتك مصلحتي اتقضت 

لا خالص .. ما فيه مليون غيري عدوا قدامك وخرجوا زعلانين

والتعامل مع الراجل ده بسيط جداً

هو بيقولك كلمتين عايز عليهم فلوس 

انت اعمل معاه مقايضة .. كل سنة وانت طيب 

وانت بالصحة والسلامة..

النوع الرابع : المحلل 

طبعًا كل ما نسمع كلمة محلل دي تحس اننا بنتكلم على عادل إمام 

في فيلم عريس تحت الطلب .. لكن لأ 

انا هنا اقصد المحلل الرياضي .. تحديدًا

يعني حط نفسك مكان جمهور الراجل ده 

ماتش بيتعرض والناس كلها اتفرجت عليه 

وهو بيبدأ ياخد فقرة فقرة ويقولك اللاعب ده لعب الكورة دي ازاي 

ده شاطها بوش رجله .. لا ده لعبها بدماغه لورا راحت للخصم 

طب ما انا شايف امه .. أنا شايف .. 

يعني ضيفلي جديد .. او روح أشتغل في الراديو

اهو يعني يبقى لشغلانتك لازمة .. 

وبعدين ده ماتش وخلص والنتيجة اتحسمت 

لما اقعد بقى مصلوب قدامك طول الليل علشان تقولي مين غلطان 

ومين في حالته علشان خاطب جديد 

ومين مش في حالته علشان ما بيعرفش يلعب الا حافي

أنا استفدت ايه ؟ هل هيلموا اللعيبة دي تاني 

ويعيدوا الماتش ، علشان ما يكرروش أخطائهم 

ولو ده حصل يعني .. هو كلامك اللي هيعمل كده 

ده مجرد كلام يا أستاذ .. كلام يدل إن المثل اللي قال

اللي ع الشط عوام كان حقيقي .. 

وإن إنت بتحكي في المحكي .. مش أكتر 

النوع ده من الوظايف هو قايم على حاجتين 

عندك بدلة حلوة .. وتعرف ان كانت الكورة مدورة ولا مسدسة 

لكن صدقني كل الكلام اللي هتسمعه من الراجل ده 

هتلاقيك يا اما عارفه.. يا اما سمعته وقت الماتش ع القهوة

من أي زبون قاعد جمبك .. أو من القهوجي نفسه 

طب والحل مع الناس دي برضه بسيط 

تتفرج ع الماتش وتقفل التلفزيون تمامًا وتقوم تشوف مصالحك  

النوع الخامس : المسحراتي 

طبعاً احنا ما نقدرش نقول ان المسحراتي شغلانة ملهاش لازمة 

ده تقليد موجود من مئات السنين ورمضان ما يعديش الا بيه 

بس هي شغلانة حرفيًا بقت غريبة 

يعني ايه تعدي من جنبي وانا قاعد ع القهوة 

وتقولي اصحى يانايم وحد الدايم .. لا اله الا الله يا سيدي

بس أنا صاحي أصلاً.. هو حد قالك اني نايم 

يعني تلاقي المسحراتي ماشي في وسط الشوارع 

بيعمل نفسه بيصحي الناس علشان يتسحروا 

والناس مالية الشوارع .. وواقفة في البلكونات 

عاملين نفسهم مستنيين المسحراتي يصحيهم 

عبث .. انت ممكن تقولي فوق .. ركز .. لكن اصحى 

مش للدرجة دي .. بس احنا ممكن نستغل المسحراتي 

في رمضان استغلال افضل من كده بكتير 

يعني ايه اللي يمنع انه يعدي ع الناس الساعة ٧ الصبح 

يصحيهم لشغلهم ، ما الناس دي كلها نايمة بعد الفجر 

وهينزلوا شغلهم يتهانوا علشان متأخرين 

وساعتها هنسميه المصحياتي .. وكده يبقى معقول ومنطقي 

النوع السادس : منظم مرور الأفراح 

بعد ما انتشرت ظاهرة أفراح القاعات ، وخدت في سكتها 

أفراح الشوارع ودفنتها بالحياه ، ظهرت معاها شغلانات غريبة جداً 

زي الراجل ده .. اللي ما تفهمش مدى سلطته وعلمه علشان يشتغل شغلانة زي دي 

تبقى بتحضر فرح لا بيك ولا عليك وطالع تجامل صاحبك 

ولا تهزلك هزتين علشان تفك الكبت اللي انت فيه 

ويدوب هتدخل في الموود تلاقي عيل رزل 

ماسك مايك وموطي المزيكا ، وبدأ ينظم المرور

لأ صحاب العروسة يجوا كده وصحاب العريس يجوا كده 

لا اعملوا دايرة حوالين العرسان .. 

لا اقفوا حيطة علشان العريس هيشوط فاول 

ياعم ما احنا من سنين قبلك بنعمل الحاجات دي من غير مدرب 

ولو اعترضت عليه يقولك لأ يا أستاذ 

لو سمحت سيبني أشوف شغلي .. هو فين ؟

هو فين شغلك ؟ يعني حددلي كده مهام عملك في بنود واضحة 

مفيش هي مرازية وفصلان على الفاضي 

وده الحل معاه بسيط برضه .. تكمم بوقه 

أو تسحب منه المايك هتلاقيه اتبخر كأن لم يكن 

النوع السابع : أبو بخاخة 

وده حد راس ماله في الحياة بخاخة وشوية ماية بصابون 

وفوطة أو مساحة صغيرة كده .. وده تبقى في بنزينة 

قدام مول ، ركنت قدام مطعم تدخل حمام مثلاً

تلاقي حد طلع من تحت الأرض ، وأكنه كان عايش في كبوت العربية

وهوب راح باخخ بختين على قزاز العربية موسخه 

ومعدي عليه بالمساحة ويمدلك ايده عايز فلوس

يا ابني هو حد قالك اني عايز منك حاجة 

يعني البيع والشرا والشغل عموماً ، هات وخد 

عرض وطلب .. لكن لا أنا طلبت ولا انت جيت قولتلي 

أمسحلك القزاز يا باشا وعرضت ، ده انت فرضت نفسك عليا فرض 

طب لو افترضنا اني معفن ومتعود اسيب قزاز عربيتي كده 

ده معناه اني راضي ولو عايز اعمل اللي بتعمله ده هعمله بنفسي

ده الأغرب كمان انك ممكن تبقى خارج من المغسلة 

ولسه دافع دم قلبك في غسيل العربية

ده يجي يوسخها ويعمل نفسه بينضف اللي وسخه 

ويقولك هات فلوس .. وده برضه الحل معاه بسيط 

تشوفه تجري .. 

النوع الثامن : المطيباتي 

والنوع ده من الشغل أصحابه دارسين المفروض كويس 

وفاهمين في مجالهم كويس لكن هما اختذلوا كل الدراسة والكتب دي 

في كلمة واحدة .. معلش ، طب مين دول ؟

وظيفة تكاد تكون الأهم حول العالم 

لكن في مصر ملهاش لازمة تقريبًا

زي الأخصائي الإجتماعي في المدرسة الحكومي 

يروح العيل من دول زمايله بيتنمروا عليه 

وبيضربوه ، وبيطفوا في فخاده سجاير

يحكي ويسح دموع ، تلاقيه بيقولك معلش 

مش عارف اركز ، معلش .. كاره المكان معلش 

وكل معلش منهم بنبرة صوت مختلفة 

اكنه واخد فيه دكتوراه ، طب ما تقوله كلمتين يا أستاذ 

يحسنوا من نفسيته ولا يحببوه في المكان

لكن ايه معلش معلش .. طب معلش يا سيدي اننا قلقناك 

وده حله برضه سهل .. اعرف انه موجود 

بس ما تلجألوش بمبدأ الشكوى لغير الله مذلة 

وبكده تكون انتهت مقالتنا النهارده عن شغلانات غريبة

ياريت لو مريت بتجربة مشابهة للي اتكلمنا عنه النهارده

تقولنا في الكومنتات ، وما تنساش

تشترك في المدونة علشان يوصلك كل جديد

وأشوفكم على خير