" إحذر من الزومبي ! "

 "  إحذر من الزومبي !  "

تعمل ايه لو قمت من النوم في عز الليل 

ولقيت أخوك متحول لزومبي وقافش في دراعك 

عايز قطمة يسد بيها جوعه ؟ 

طبعاً فاكر إني بهزر وإن كل الكلام عن الزومبي 

مجرد كلام أفلام خيالي واستحالة يحصل 

بس ده مش حقيقي .. والزومبي فعلاً موجودين 

يمكن انت بس .. اللي ما تعرفش 

فيه دراسة اتنشرت في مجلة the open journal viruses

في أواخر سنة ٢٠٢٢ بتقول إن بعض العلماء 

قرروا يعيدوا بعض الفيروسات القديمة 

واللي متجمدة في تربة سيبيريا من أكتر من ٣٠ ألف سنة 

للحياة مرة تانية .. علشان يعرفوا مدى تأثير الفيروسات

على البشر ، والعلماء دول استغربوا جدًا 

من حالة الفيروسات دي اللي بعد موتها لسنين طويلة 

بسبب التجمد ، مجرد ما اتحطوا في درجة حرارة عادية 

دبت فيهم الروح مرة تانية وعلشان كده سموهم فيروسات الزومبي 

يعني اللي بترجع للحياة بعد الموت مرة تانية 

وده اكتشاف خطير ممكن يغير كتير في مستقبل البشرية 

مع ارتفاع درجة حرارة الكوكب وذوبان الجليد 

اللي بيزيد كل يوم أكتر م اللي قبله 

طب هو فعلاً فيه حاجة إسمها زومبي ؟ 

علشان نعرف اجابة السؤال ده لازم نرجع للقرن ال ١٩ 

لما بدأت تنتشر أسطورة الزومبي في أمريكا الشمالية

والفلكلور الأوروبي ، ومع انتشارها 

يبدأ الزومبي يظهر في أفلام كتير جدًا 

بداية من فيلم (ليلة الحي الميت) للمخرج جورج روميرو 

سنة ١٩٦٨ ، بس زي ما احنا اتعودنا 

ان كل حكاية وليها أصل .. وكل حاجة هوليود بتروجلها 

يا اما ناوية تنفذها يا اما وراها حقيقة 

وعلشان نعرف أكتر عن وجود الزومبي على كوكب الارض 

هنرجع للكاتب والعالم إدموند ويد دايفيس 

واللي مهتم جدًا بدراسة ظاهرة الزومبي .. وعنده أبحاث كتير 

اتنشرت في مجلات منها ناشيونال جيوغرافيك كمان 

وبيقول إدموند إن أول ظهور للزومبي كان في جزيرة هاييتي 

احدى جزر البحر الكاريبي ، لما شوهد فيها 

مجموعة من البشر الأموات ولكن أجسامهم ما اتحللتش 

بيمشوا ويتكلموا وياكلوا ويشربوا ، لكنهم مسلوبي الارادة تمامًا

وفاقدين ذاكرتهم قبل الموت .. 

وأهالي جزيرة هاييتي بيعتقدوا إن ده بسبب السحر الأسود

اللي منتشر في أنحاء الجزيرة وعلشان كده 

لعند النهارده بيحطوا صخور كبيرة 

على قبور موتاهم بسبب خوفهم انهم يتحولوا لزومبي 

تاني حادث بقى حصل في بداية التسعينات

تحديدًا سنة ٩٤ لما حصل انقلاب في جزيرة هاييتي 

وقرر الجيش الأمريكي اقتحام الجزيرة 

ولكن الثوار طلعوا اشاعة انهم بيحضروا 

جيش من الزومبي لمهاجمة الجيش الامريكي 

بس ده ما حصلش والجيش الأمريكي دخل الجزيرة عادي جدًا

فمش متأكدين ، هل فعلاً فيه حاجة إسمها زومبي 

طب هو سحر ؟ ولا فيروس بيصيب البشر ؟ 

ولا هو خدعة بيرهبوا بيها بعض الناس ؟ 

ولا تفتكر انها حاجة ممكن تتحضر في معمل وفي وقت معين 

ممكن تخرج للعلن .. 

ياريت قبل ما اخوك اللي اتحول لزومبي ياكل دراعك 

تقولنا رأيك في الكومنتات ، وما تنساش

تاخدلك لفة في المقالات اللي فاتت

هتنبسط ..