الصحاب وأنواعهم (الجزء الثاني) !

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

 

أهلاً بيكوا مرة تانية في مدونتكم ، وموضوع مقالنا النهارده

 عن الصحاب وأنواعهم للمرة التانية ، وزي ما قولنا في الحلقة اللي فاتت

 إن الصحاب انواع كتير محتاجين 100 مقال علشان كده قسمناهم على جزأين

وزي ما اتفقنا في المقال اللي فاتت إن الصحاب

فيه منهم رزق من ربنا ، وفيه منهم إبتلاء وتكفير ذنوب .. 

منهم اللي هيفيدك ومنهم اللي هيضرك .. لكن في الحالتين

هما نصيبك ونصيبك هيصيبك يا إبن الناس .. أياً فين هربت

وزي ما انتوا عارفين إن الحياة ما تكملش من غير الصحاب

دبسونا بقى .. غرقونا .. طلعوا عينينا .. الحياة ما تكملش الا بيهم

وفي المقال لللي فاتت قسمنا الصحاب لأربع أنواع ، 

فاتح الشهية ، وده صاحبك اللي بيلف بيك ع المطاعم كلها لعند ما يجيلك تخمة 

وصاحب المزاد وإبنه ، وده صاحبك اللي كل ما تقوله أنا يقولك وأنا اكتر منك 

وراكب السلام ، وده صاحبك اللي راكب معاك في أي حوار ومشوار 

والمُدعي ، وده صاحبك اللي بيدعي صفات وبينسب لنفسه حاجات مش ليه 

وفي الحلقة دي بقى هنقسم الصحاب لأربع أنواع مختلفين تمامًا

هتلاقيهم حواليك ، و 100% هتلاقي صفة منهم 

في واحد أو أكتر من صحابك .. 

يلا نروح على طول لأنواع الصحاب ..

 

النوع الأول : الفتاي .. 

والنوع ده هو مهم جدًا لكل كاتب وسيناريست 

لأن خياله خصب ، وعنده قدرة على إختلاق أحداث ، 

وحاجات ما حصلتش قبل كده ولا عمرها هتحصل 

وده مختلف تمامًا عن المُدعي اللي اتكلمنا عليه في المقال اللي فاتت

لأن صاحبك المدعي ، صفته الرئيسية 

إنه بيلم أخبار وقصص وحواديت من الشارع طول اليوم 

ويجي يرميهم في حجرك آخر اليوم أكنه هو صاحب القصة نفسها 

مدعي يعني بيدعي إنه عمل الحاجات دي ..

إنما صاحبك الفتاي ده بقى .. بيختلق قصصه بنفسه من وحي الخيال

والراجل ده بيتميز بموهبة كبيرة جدًا

٩٠٪ من كتاب مصر بيحسدوه عليها 

خيال غير محدود وربط بين الأحداث مش طبيعي 

لكن للأسف مش موظف موهبته دي في مكانها الصحيح 

يعني تلاقيه بيكلمك يصحيك من النوم ويقولك قولي مبروك

على إيه ؟ قولي مبروك بس .. يا عم مبروك 

هتسيبني أنام يعني لو قولتلك مبروك .. يا سيدي ألف مليون مبروك

الله يبارك فيك .. طب على ايه يا حيوان ؟ 

يقولك لا خليها بقى مفاجأة ويقفل .. 

طبعاً دي مش رخامة .. قد ما ده تكنيك .. 

أسلوب تشويق كده زيه زي الأفان تيتر في أي فيلم 

تشويق يخليك ما تعرفش تنام وتكون متشوق للحدوتة اللي قاعد بيربط خيوطها

علشان يجي يحكيهالك ، فيخليك بدل ما انت قرفان من هريه وفشره عليك 

لا ده انت بتتوسل إليه إنه يحكيلك على اللي حصل 

أو على اللي ما حصلش أساسًا .. 

ولما يجي بالسلامة وبعد ما تتحايل عليه مليون مرة علشان يكدب عليك

يقولك مفيش ، أنا هخطب منة شلبي .. قوم روح يلا ومش عايز أشوف وشك تاني

تلاقيه بيحاوطك بقى من كل حتة .. اسمع بس .. 

أصلك مش هتصدق .. مش هصدق ؟! أنا مش مصدق من دلوقت أساسًا 

أصلها خبطتني بالعربية ونقلتني المستشفى 

وفضلت بايتة جنبي طول الليل علشان تطمن عليا 

وقربنا لبعض وهنتخطب بعد العيد إن شاء الله 

وطبعاً تلاقي باقي على العيد ١١ شهر .. لما يجي وقته بقى 

يحلها ألف حلال .. هيقولك مثلاً اتخانقنا علشان 

قولتلها يا أنا يا التمثيل ، أو أي حدوتة تانية

المهم إنه يسيبك شاكك في نفسك من كتر التفاصيل اللي بيقولها

ودقتها تحس إن الكلام ممكن يبقى حقيقي .. 

ودي موهبة في حد ذاتها تستحق إنه من بكره يتكتب إسمه 

على أفيش فيلم ، حلو ده .. هايل يا فنان ..

 تنفع حلقة من مسلسل دي موهبة تستحق ان اسمك يتحط على أفيش مسلسل

لكن هو بيستغلها علينا احنا لما اتهرينا 

والنوع ده يا صاحبي قد ما هو مسلي ، قد ما هو خطر 

خطر عليك قبل ما يكون خطر على نفسه 

لأن ممكن بفتيه وكدبه يلبسك في الحيط من غير ما ياخد باله 

يعني ، تلاقيك مرة بتلجأله في مشكلة يقولك بسيطة 

هنروح لسيادة اللوا فلان ده صاحبي وحبيبي 

احذر لأنك لو مشيت وراه ، هتبات في الحبس 

وخليك متأكد إن كل علاقته بأي مسئول بيجيب سيرته 

إنه يعرف إسمه وبس .. أو تلاقيه عارف الفورمات 

للأسامي الرتب اللي من النوع ده 

يعني حسام بيه عبد العظيم .. ويقول الإسم كده 

بنبرة صوت مختلفة عن كل الكلام .. يخليك ترتعش 

صاحبك الفتاي ده تلاقي عنده حلول لكل مشاكل الكوكب 

بس دايمًا محسسك إنه مش محطوط في مكانه الصح 

يعني يقولك لو أنا مكان المدير ده هخلي الشركة

تبيع عشرين ضعف ما بتبيع بس هي أرزاق 

أنا لو مكان المدرب الفلاني هخلي المنتخب ياخد كاس عالم 

بس محدش كلمني .. وصاحبك ده تحاول على قد ما تقدر 

تكون قاعدتك معاه في نطاق ضيق 

في البيت عنده ، أو عندك ، أو مكان لا يتجاوز النفرين 

لأنه بيفتي عمال على بطال ، وبينظر على كل الناس اللي في المكان 

يعني تبقى راكب ميكروباص مع سواق مبرشم 

ووشه كله حفر أكتر من الطريق اللي ماشي عليه 

وتلاقي صاحبك ده مش ساكت بقى .. قاعد ينظر 

ويفتي ويدي السواق نصايح من أول طريقته في لم الأجرة 

لعند طريقته في تفادي الرادار ، ومهما تحاول تسكت فيه 

ما بيسكتش .. واثق في نفسه ومش شايف اللي حواليه 

والنتيجة مش هتعجبك لا انت ولا هو .. 

لأنكوا هتنضربوا يا صاحبي ، هتموتوا م الضرب

لذلك بقولك حاول ما تخرجش معاه في مكان عام 

ولو .. ده لو اضطريت يعني تخرج معاه في مكان عام 

تكون جاهز ببعض الأدوات .. إكتب ورايا .. 

صاعق كهرباء ، علشان لو زادت منه تصعقه يفقد النطق لعند ما تروحوا بسلام 

بكرة لزق ، علشان تكمم بوقه .. 

حقنة بنج ، علشان تخدره .. أي طريقة تخليه يسكت أو ينام 

والأسهل بينهم حباية منوم وتدوبهاله في كانزاية بيبسي

صاحبك الفتاي في أي حتة زي ما ممكن يدبسك وتنضرب بسببه 

فممكن يشرفك برضه ، لأنه من كتر ما بيدعي إن عنده معارف مهمين 

فهو قدام الناس الغرب هو حد مهم جدًا وتلاقيه ماشي يوزع رقمه بين الناس 

اللي عنده مشكلة مع البنك ، يقولك ده المدير حبيبي 

واللي عنده مشكلة مع شركة المياه ، 

واللي عنده مشكلة مع الكهربا .. هو يعرف كل الناس 

وله علاقة بكل الرتب التقيلة ، في البلد وبره البلد 

واللي عايز فيزا واللي عايز يطلع رخصة 

وأحياناً الموهبة اللي عند الراجل ده بتكون فتحة خير عليه 

لأنه من كتر ما بيفتي انه عنده ناس مهمة 

أو إنه أبو السلكان كله ، بتلاقي الناس بتعرفه لبعضهم بالطريقة دي 

يعني كان فيه قصة زمان لراجل راح لبيل جيتس 

صاحب ميكروسوفت وطلب ايد بنته لابنه بحجة ان مدير البنك الدولي صاحبه

ولما راح البنك الدولي قال لمديره إن صاحب ميكروسوفت نسيبه 

وهكذا .. فأحياناً الفتاي ممكن ياكل عيش من ورا الشغلانة دي

سنة او اتنين لكن في النهاية ، هيتكشف ويقع 

هو واللي بيطبله أو اللي ماشي وراه فاحذر .. وخلي قاعدتك معاه دايمًا

في أضيق الحدود ، أو خلوا علاقتكوا ع النت أحسن وأفيد

لعند ما ربنا يرضى عنك ، ويا اما تحصله حادثة يفقد فيها لسانه 

يا اما يخسرك لسبب من الأسباب .. 

النوع التاني : المدبساتي 

وقبل ما نقول ولا كلمة ، لازم نقولك إحذر 

إحذر يا صاحبي من هذا النوع من الصحاب ، 

واقعد مع نفسك وراجع كده .. شوف انت عملت ذنب إيه في حياتك 

يعني وأدت بنات ؟ عاملت أمك وأبوك وحش ؟

سرقت مال يتامى ..؟ اقعد كده مع نفسك وتوب لله 

علشان يخلصك من الصاحب ده .. المدبساتي 

وده صاحبك اللي تلاقيه في يوم بيكلمك يقولك انزلي هنخرج خروجة

تقول بس .. ده هيروق عليك بقى .. ما هو هو اللي طالبك 

تنزل وتلاقيه بيطلب أوبر .. ووقت الحساب يقولك ما معييش فكة 

وتحاسب بقلب ، مش مشكلة ما هو الراجل هيظبط

تلاقيه دخلك أغلى مطعم في مصر يجيلك الويتر تطلب المنيو كله 

تطلب بقلب وضمير ما انت معزوم بقى 

وتاكل يا صاحبي في آخر زادك ، وتحلي وتشرب 

وتقعدوا بقى .. نص ساعة.. ساعة 

مش هتباتوا هنا يعني الناس عايزة تقفل وتروح 

تطلب الشيك ، وبمجرد ما تقول الشيك يا متر 

وأكنك قلت تعويذة سحرية .. إنت تقول الكلمتين دول من هنا 

وهو يختفي من هنا وأكنه لم يكن .. أكنه كان في خيالك بس 

يدخل الحمام بقى ، يقعد جوه ٣ ساعات 

يروح يسحب من مكنة atm في أسوان 

تجيله مكالمة انهم لقوا أبوه بعد اختفاء ١٥ سنة 

أي حاجة .. المهم إنه يغيب .. يغيب مدة تتطلب إنك تبلغ البوليس 

أو تجيب ميكروفون وتلف في الشوارع تدور عليه 

وتفضل انت قاعد بقى بتعد للمرة المليون في ال١٥ جنيه اللي معاك يمكن يزيدوا

والمتر والويتر والاستاف كله واقف على دماغك 

مستنيين وعلى أمل يا صاحبك يرجع .. يا تتصل بجراح 

يجي يخرجلهم كليتك ويصرفوها .. يا تمشي في اجراءات قرض 

كده يعني .. ولما تسلك وبمجرد ما الفلوس تدخل للكاشير 

تلاقيه ظهر ، ولا أكنه ساحر .. وخد بقى عندك كمية حجج ما وردتش على بشر

أصلي نزلت أسحب لقيت كل مكن مصر عطلان

 واضطريت أسافر البلد أبيع فدان الأرض وأجي 

أصلي بعد ما سحبت فلوسي وقعت وقعدت على الرصيف ألمهم من ولاد الحلال 

أصله حرامية طلعوا عليا قلبوني ورحت القسم وجيت 

أصل أصل .. كلام وحجج مش هينفعوا بحاجة 

لأنك خلاص حاسبت .. واتدبست .. ولو ما حاسبتش 

 ففيه ليلة سودا لسه مستنياك  

فتلاقيك بدل ما كان في دماغك انك هتقضي سهرة حلوة 

تلاقيك مقضي الليلة كلها بتغسل صحون المطعم اللي إنت أكلت فيه

أو بتسيق البلاط ، وفي الخلفية أغنية نحن لا نزرع الشوك 

والله يا زمن ما بإيدينا زرعنا الشوك ولا روينا يا زمن 

النوع ده يا أخوانا خطر جدًا .. يعني ممكن بسبب نصيحة سمعتها منه 

تلاقي نفسك في وسط 10 رجالة هينفخوك ، بسبب انه قالهم

صاحبي جاي هيعمل معاكوا الغلط 

أو تلاقي نفسك رايح وكلك عشم إنك هتتجوز ملكة جمال 

ده على حسب كلامه .. تلاقي نفسك بتتقدم حمدي الميرغني 

مع احترامنا ليه .. أو تلاقي نفسك رايح تتقدم على وظيفة 

وكلك ثقة إنك هتتقبل .. ما هو صاحبك قالك إن صاحب الشركة جوز خالته 

والقبض هناك بالبيتكوين .. تروح تلاقي الشركة نفرين وطفاية 

واليوم ب ١٢ جنيه وصاحب الشركة محبوس أصلاً

فالنوع ده من الصحاب ، لا تاخد منه نصيحة ولا تمشي معاه في طريق 

وخليك متأكد إن مشيك مع النوع ده من الصحاب 

هيوديك لسكك عمرك ما كنت هتمشي فيها

زي السجن مثلا أو العناية المركزة

ولو حلفلك على المياه تجمد ، وشوفتها قدامك كده بقت تلج 

ما تصدقش إنه معاه فلوس وهيحاسب مرة قبل ما يموت 

مش بخل منه ، ولكن المدبساتي بيكون شايف ان الدنيا وردي 

تقعدوا مع بعض مش معاكوا ٧ جنيه .. تلاقيه بيقولك 

يلا نفتح شركة ، ويدبسك في قروض وتقضي حياتك هربان 

تبقوا في بلاي ستيشن وتلاقيه فرد صدره 

وبيلاعب البلاي ستيشن كله على اللي يحاسب 

وطبعاً انت اللي هتحاسب .. لأنه لا بيعرف يلعب 

ولا حتى معاه فلوس .. وقبل ما ننهي كلامنا عن الصاحب ده 

عايزك تمشي معايا على الخطوات التالية 

أولاً إفتح سجل المكالمات وابحث عن اسمه 

وحطه على البلوك ، وفي أي حتة بقى .. الواتس 

الفيس .. التليجرام .. بلوك بلوك في كل حتة 

وما تنساش تكهرب الجرس علشان لو فكر يجيلك 

وانشر في الحتة عندكوا انك هاجرت بلا رجعة 

علشان لو اتربصلك تحت البيت وسأل حد من جيرانك 

أو علشان تخلص خالص بقى .. نزل نعي لنفسك في الجرنان 

  النوع الثالث : الحنين على حسب

والنوع ده يا جماعة تبقوا ماشيين مع بعض في أمان الله 

وقاعد يجعر بعلو صوته .. وبيحفظك عشر نصايح 

عن كيف تكون رجل كامل الرجولة .. صاحبك ده اللي تبص في وشه

تلاقيه شبه كفار قريش .. كمية حواجب مهولة 

وعضلات ودقنه بتجر ع الأرض تحس انك مصاحب رجل الكهف

ويفضل بقى يقولك ازاي تخشن علشان الحياة عايزة الخشن 

وازاي تبقى دكر علشان الدكر بس هو اللي بيمشي 

 وفجأة تليفونه يرن ، وجسمه يترعش وأكنه اتكهرب .. 

تلاقي دقنه اتنتفت بفتلة ، حواجبه وقعت 

عضلاته سابت .. وصوته نِعِم قوي وبقى مرهف الحس

وكل الهالة اللي حواليه اللي بتشير ان ده راجل 

عمره ما شاف ريحة الحنية في حياته انطفت 

طب إيه اللي حصله ؟ ولا حاجة دي البت بتاعته بتطمن على كتكوتها 

فتخيل صاحبك مفتول العضلات اللي جعيره مسمع مصر بحالها

مكالمة تليفون ولا صوت حنين بس .. خلاه بقى كتكوت 

ومجرد ما يقفل المكالمة ، تلاقيه بيقولك يا صاحبي البنات دول مقرفين 

مقرفين إيه يا ابن الناس ، ده انت قعدت في وسط الشارع 

تتقلب ع الأسفلت من الحنية .. ده احنا خرجنا عم محمد البواب 

من حضنك بالعافية ، وانت حاضن فيه ومكلبش وفاكره المخدة 

ويوم ما تطلب منه جنيه تلاقيه بيقولك والله الدنيا ناشفة 

وتلاقيه واخد للبت بتاعته شيكولاتات ب 1000 جنيه 

طريت دلوقت الدنيا واحلوت يعني

ولا لما تطلبه يقف معاك في أي حوار .. بتنقل عفش 

هتسافر ، هتتجوز ، أي خدمة المفروض دوره كصاحب يقف معاك فيها 

تلاقيه بيديك ١٠٠ عذر ، ويحسسك انه أكتر واحد مشغول في الدنيا

وبمجرد ما البت بتاعته تبعتله رسالة انها عايزة حاجة 

تلاقيه عبد ذليل عويل ، شايل صخور جبل المقطم على ضهره 

وبيزحف لعند باب بيتها بيوصلها طلبها ، دلوقت انت جدع يعني 

النوع ده يا صاحبي ، ما تمشيش وراه ولا معاه 

لأنه هيسوحك ، ويوم ما يتخير بينك وبين البت بتاعته 

هيمسح رقمك فورًا ، والحقيقة علشان نبقى حقانيين

الراجل ده ممكن تكون مشكلته انه عمره ما عرف بنات 

وما صدق كلبة بلدي تقوله هوهو .. 

أو ممكن المشكلة تطلع فيك انت ، إنه لما بيبيعك علشانها 

بترجعله انت بسهولة بعد ما يعملك بلوك 

المهم أيًا كان مين الغلطان في القصة دي 

صاحبك ده هتتبع معاه نفس اجراءات الصاحب اللي فات 

بلوك في كل حتة واقطع علاقتك بيه 

وهو مش هيسأل الا بعد فترة .. يا اما يكون فركش 

يا اما يخلص رصيده ورصيدها ولسه عنده طاقة 

هتلاقيه جايلك بقى .. لا يا ابن عمي .. انت مش موجود 

وكل قرد يلزم شجرته ..

النوع الرابع : المتشائم 

وده صاحبك اللي شايف الحياة سودا .. وعمرها ما هتضحكلك 

ما هو ازاي هتضحك لواحد متوقع دايمًا انه هيفشل ؟

ازاي الدنيا هتمشي مع واحد حاسس ان العالم هينتهي بعد بكره ؟ 

صاحبك ده اللي مجرد ما تقوله هعمل كذا .. وقبل ما تكمل يقولك هتفشل 

مش هينفع .. هتخسر .. هتتسجن .. هيضحكوا عليك 

هيتنصب عليك .. المهم انه شايف ان اخرة اللي هتعمله سواد 

حتى لو قولتله تعالى نطعم مساكين .. هيقولك هنفشل 

مش هتلاقي ولا مسكين فاضيلك .. 

وده مهما تحاول تحفزه مفيش منه رجا .. 

يعني تقوله هنفتح مطعم وأمسكك انت الإدارة .. 

تلاقيه بيقولك المطاعم بتخسر .. هنفتح قهوة 

الحكومة هتقفل القهاوي اخر السنة .. هنلعب كورة هنتصاب

هنعرف بنات .. محدش هيبصلنا 

وفي الحالتين سواء انت اشركته معاك 

أو عملت الحاجة اللي عايز تعملها لوحدك  

هو شايف انه أي حاجة مصيرها الفشل والموت والخراب 

هنذاكر هنسقط .. مش هي كانت هتذاكر هتنجح 

لا هي اتغيرت دلوقت .. هنصلي هندخل النار 

المهم انه أي حاجة هتحاول تعملها هيكسر مقاديفك 

والنوع ده يا جماعة هو محبط ولازم تقطع علاقتك بيه فورًا 

لأنه مش هيخليك تتحرك خطوة واحدة من مكانك 

فأحب أقولك .. إن أول خطوات النجاح في البعد عنه 

 اهرب ، واعمله بلوك وشوف انت ناوي تعمل ايه في حياتك 

وانت هينصلح حالك وتبقى برنس

والمهم إن  مهما تنجح وربنا يكرمك ، ما ترجعش له ، وتقوله أنا نجحت 

لأنه هيبقى رده عليك .. إنك أكيد بتهيألك إنك نجحت 

أكيد ده حلم ، وهتصحى على خازوق 

بعد ما اتكلمنا عن أنواع الصحاب في مقالين

مش هنقدر نقول ان كل الصحاب كده .. وفيهم كل الصفات المنيلة دي 

لسه فيه اصحاب جدعة وتتحب ويتمشي معاها 

ولما تمشي معاها تعليك ، ولو اخدت منهم نصيحة تنجحك 

بس دول في الجنة يا صاحبي .. ربنا يوعدنا 

وبكده تكون انتهت مقالتنا النهارده عن الصحاب وأنواعهم

ياريت لو تعرف حد فيه صفة من الصفات اللي حكينا عنها

اعمله مينشن .. وياريت لو مريت بتجربة مشابهة للي اتكلمنا عنه

قولنا في الكومنتات وما تنساش تشترك في المدونة

علشان يوصلك كل جديد .. 

وأشوفكم في مقال جديدة ..