" أغرب معايير الجمال في العالم "

لو مضايق إن مراتك بتصرف نص مرتبك على الميك آب

علشان تبان حلوة ، فأحب أقولك إنك ما شوفتش حاجة 

لأن إن كانت معايير الجمال في مصر 

آخرها شوية ميك آب ولينسيز بتنور في الضلمة 

ففي دول تانية معايير الجمال عندهم تقطع الخلف 

زي إيران مثلاً ، واللي من أهم معايير جمال الست عندهم

عمليات جراحة الأنف بسبب وبدون سبب 

طبعاً هتقولي بس دي حاجة منتشرة في العالم كله 

صح .. بس ده لما يكون مناخيرك كبيرة 

معووجة .. طويلة وبتحشرها في اللي مالكش فيه 

انما لمجرد انه عندك مناخير سواء حلوة او وحشة 

فلازم عمال على بطال تعمل فيها عمليات تجميل .. ده الغريب 

تعتبر إيران من أكثر الدول من حيث عدد عمليات تجميل الأنف 

واللي وصل بيهم الحد إنه عدد عمليات تجميل أنف الست 

يكون سبب للفخر بينها وبين الستات التانيين 

يعني متخيل إن قاعدة ستات ممكن تقلب بمزاد علني 

على مين عملت في مناخيرها عمليات أكتر من التانية ؟!

ده غير إن الست اللي مش قادرة تعمل عملية تجميل لأنفها 

فتخرج من بيتها حاطة ضمادة مزيفة واكنها لسه خارجة من العمليات 

ومن أغرب معايير الجمال في العالم هنلاقيها في تايلاند 

تحديدًا في قبيلة الكايان

و قبيلة الكايان، قبيلة عدد أفرادها 200 ألف نسمة 

كانت تعيش في ميانمار وعندهم أغرب معيار للجمال 

وهو طول الرقبة .. فالبنات هناك من سن خمس سنين 

بيحطوا حوالين رقبتهم حلقات معدنية ومع مرور السنين بيزودوا الحلقات دي 

لعند ما يصل طول الرقبة لشكل يليق بالست 

ده من وجهة نظرهم .. والحقيقة دي معاناه للست 

ولكل اللي حواليها .. دي اللقمة تنزل في زورها تقول دعاء السفر .. بس هنعمل ايه ؟

ومن معايير الجمال الغريبة كمان 

في جنوب أثيوبيا تحديدًا في قبيلة مرسى 

واللي الست هناك مجرد ما تبقى عندها ٦ سنين لازم تحط 

طبق فخار في شفايفها .. وتسيبه بقى مع العمر لعند ما شفايفها تتمدد 

وإن كل ما الست تكون شفايفها أكبر.. كل ما تتجوز رجل أعلى مكانة 

أما بقى لو انتي متضايقة بسبب وزنك الزايد 

وبتقضي عمرك في دوامة الرياضة والدايت ومفيش فايدة 

فشنطتك في ايدك وطيري على موريتانيا

لأن من معايير الجمال هناك السمنة المفرطة .. 

يعني مش الكام كيلو اللي مضايقينك دول .. لا المصطلح واضح 

السمنة المفرطة .. يعني هتاكلي وتبرطعي وتطلبي مهر بنت ملك كمان 

المشكلة بقى .. لو وزنك ثبت هناك هتبقي لا طلتي فورمة الساحل 

ولا سمنة موريتانيا .. 

كمان من أغرب معايير الجمال على مر العصور ، الغمازات 

والحقيقة الغمازات شيء محبب في وش الست 

لدرجة إن المطرب دياب غنالها لما قال الدنيا أكبر غمازات 

لكن في القرن العشرين في أوروبا موضوع الغمازات ده كان حتمي

والست اللي من غير غمازة كانوا بيعتبروها تقطع الخميرة م البيض 

وده اللي خلى بعض المخترعين في سنة ١٩٢٣ 

يسجلوا براءة اختراع لجهاز صانع الغمازات  

واللي كانت آليته إن الست تركبه على ودانها ويضغط على وشها بقوة لفترة طويلة 

علشان يسيب عندها اثر غمازات .. 

والحقيقة إننا رأينا الخاص .. إن الجمال ملوش معايير 

وإن كل مخلوق حلو بشكل ما بطريقته الخاصة

لكن لو انت لسه بتخاف من لينسيز مراتك ومش طايق الموضوع ده 

فبعد ما شوفت المعايير اللي فاتت دي تقدر تقوم تبوس راسها 

وتشكرها على عدم أفورتها .. وتقولنا في الكومنتات

ايه معاييرك الخاصة عن الجمال 

وما تنساش تاخدلك لفة في المقالات اللي فاتت

هتنبسط ..